Zuu Ka Hua


Zuu Ka Hua

Mai Zilthli Lal Nei Thluai

Ka zumawk vek cekci in tuisun phunhra result ah cu ka hmin “Zilthli Lal Nei Thluai” ti mi cu a tel lo ngai ngai. “ca a zuam lo tuk si, ca a zoh dah lo mi cu a sung pei cu” tin in diriam thup tu tla nan um men thei. Cuti ih nan ti khal le “thuphan a si” ti’n ka lo el cuang lo ding. Thu dik a si ko. A sinan ziang ruang ah ca ka zoh thei dah lo? Ti hi in suttu an um dah lo mi te hi a na ka ti zet. In sut tu nan um lo nan minung cu kan thinlung sungih ummi lungawinak, riahsiatnak pawl hi mi pakhat hnen ah ka phuan suak le kan tuardan a nuam deuh theu, kei khal ka awm sungih thuthup ka tuarnak pawl nan hnenah ka run irhsuak law law mei ding. Mihrek in cu zohniamnak ah tla in hmang men thei. Keimah vek ih tuartu nan um ve pang le in theithiampi ve ko ding ka zum. Kapa tla cu nan theizet ka ring. Kan dung baite ah zuu ruang ih mual in liamsan tu kha. Kan sungkua kimtei kan umkhawm lai ah cun ka nulepa hi cozah hna an tuan veve. Ka Nu’i hnatuannak zarah cozah inn (U-ing)ah kan um. Kan umnak cu cozah hnatuan pawl lawng um theih a si. Kan venghnen / inn hnen pawl khal cozah hnatuan lawnglawng an si thluh. Kan inn kiangkap ah cun kan laimi hmuh ding an um lo tluk a si. Kawlmi lawng lawng an si ih kawl biaknak betu (zumlo tu) lawng an si. Kan inn sangka tlun ah cun Ka Pai’ hmin, kohhran hmin le Christian timi te cu thingtlep fate parah cangan thiampawl in kutngan mawi emem in an ngan mi cu kan tar lengli. Zokhal in kan innhmai zin a zawhtu pohpoh in christian kan si cu an thei thei mai. Kan inhnen pawl cu kawlmi hlir an si tikah kawl rualpi tampi ka nei.

Cawlhni tin ten ka nu in biakinn ah Sunday school kai ding cun in fial theu. Keimah te cun biakinn ka pan ngerngo ring ring. Kan biakinn le a hla si mahte feh hi ka paih theu lo ih ka innhnen ka rualpi kawl nauhak pawl cu kan biakinn ah Sunday school kai ve ding cun ka sawm hai theu. “ka nulepa in nan biakinn ih khawm in siang lo, nan nih Christian pawl ih biakmi Pathian cu biak tlak, zum tlak a si lo” tin in sawn theu. Ka thin hngir a teu thei nasa. Asinan ziangah si pei kan nih Christian pawl ih Pathian hi zum tlaklo/ biak tlaklo an ti nak san? ti mi hi ka rak thei fiang lo. Cutivek ih in ti le ka thin a tawk tuk ih a biak khal ka paih hai lo. A hmuh khal ka hmu paih hai lo. A huat in ka hua hai. A sina’n an mah pawl ka kawm lole kawm ding dang ka neih lo tik ah rei cu ka rak hua thei dah cuang lo. Cupawl thawn kan hung upa tlang vivo ih tuikum phunhra kan kai kum tiang cu thate’n kan kawmaw ring ring hai ko. Aww phunhra ka sun nak san kha a theih nan duh tiatia ding ka zum. Tlawng ka kai phun hrek ihsin phunkua tiang ah hin cathiam lo em em tla ka rak si dah lo. Cathiam sunlawihnak laksawng ka dawn velo hmanah cathiam lam ah cu ka rak tang ve ring ring. Tuikum phunhra ka kai kum ka parih thil thlengmi pawl hi ka ruahban lo mi le ka zumbanlo mi vanduainak lawnglawng an si thluh. Minung pawl ih kan do neh thei theu lo mi ral cak bik cu beidonnak hi a rak si theu.”ka tuah thei tengteng ding” ti ih kan mah le kanmah kan zum awk lo tikah kan hrangah hlawhtlinnak le a rak um ve fawn lo. Kei tla cui beidonnak ral ka rak do neh thei lo ruangah pan the maw phunhra ka rak sun nak san cu. Phunhra ka kai kumcu cozah tlawng ih ka kai lawng duhtawk lo in a leng tlawng (border) ah tla ka kai bet. A leng tlawng in kai man (border fees) cu cozah tlawng ih ka kai man hnak in a let a za in a tam. Tlawngman cu a khung law law si ko. Kanu cu cozah hna tuan a si tikah thlacemni hlawhman a suah tinte’n a leng tlawnginn ka kai man cu malte ten’ in kuansak theu. Kapa tla cozah hna tuan hlawhman nei a si ve ko na’n a hlawhman cu a mai zuu  man hman a daih dah lo. Innsang hrangih tulmi fangfai, cite, sitii, sahpian tivek pawl leinak ding ah a paisa cu a hmang siang lamlam dah lo. Amai duhmi zuu leinak ding ah cun a paisa a ui lo nasa. Nitinte’n a ri biaibiai ringring. Zaanlam a zung tum a cut le innlam pan hmaisa lo’n zuudawr lam a pan hmaisa sawn ih khawmaw zik hrawng ah hawr cuaco in inn a thleng theu. Inn a thlen cun rawl ei ding a hawl hngal. Hmeh a thawt lo le phei hi cun a buai cih si mai. Cuvek caan le kanu in ziangtin a rak sawn ding nan zum? Rawl rak lak huahhi in le thate’n rak cukha lo’n “keimai paisa ih ka leimi fangfai a si, rawl ei na duh le zuu na lei ai ah fangfai, sitii, cite, thukkhat vek tal lei ve awla” tin’ a rak kawk theu.

A mak nan ti zet ding ka zum. Innsungsang pakhat si ih “keimai leimi, keimai ta, nangmaita, ka ta a si lo” tivek tongkam pawl hi. “hmehthaw ei tla na duh le bazaar ih sat la lei hmen, fate pakhat ih “kappa” ti ih kawhmi na si ve, na santlai lo biarbiar thei tuk aw, thathnemnak khal na nei lo”:na pasalhi thathnemnak neilo ti’n maw in hmuh?ka lo vaw that lawlaw ding ho khaw. Uico nu.” A caan ah cun ka ruat theu kan inn maw helram ih um a har sawn pei? Kanu le kapa cu thlakhat ah ni sawmthum le zan sawmthum sung an toaw ringring. A leng tlawng ih ka kainak tlawnginn ahcun zan hi riahcih a si theu ruangah inn ah ka riak dah lo. Zaanriah inn ah ka ei tai h a lengtlawng ih ka kainak ah cazoh in zaan khal riakcih ding cun ka pawk theu. Ka zaanriah ei tikcu hrawng hi kappa inn a thlen cekci hrawng a si theu. Kappa inn a ra tin cun kanu a lungawizet laifang a si hmanah “kiosa itthat lai thangmi bangin a mithmai a se lohli hngal ih a thin a heng vukvi. Kappa zuri hawr cuaco phah cun ka rawlei lai I run zoh ih “thlite, nanui’ thathnemlo dan le lo duat lo dan hi zoh hman! Fading hman a lo nei lo, a neihsun a fanu phunhra na thleng thlang. Phunhra cu cazoh ding le a tam, zan le nan mengsim theu thawn eiin thaw deuh te tla lo ei ter cuang lo’n nitin ngapih lole behrum lawnglawng a lohmeh ter ringring” ti’n I run ti theu. Kapa in cuti’n in ti le kanu ziangti’n a rak um ding nan zum? Ziangti’n a rak um cuang ding ih a thin a heng tukah a mit ti hrehre in kappa a zoh ih “ thluaite, ngapih lawnglawng ka lo hmehter ih ka lo duatlo tuk ruangah ti’n tla na ruat pangkei. Santlai lo, hmantlak lo, zu in lawng ih thathnemnak nei mi Pa na rak neih pan he curuangah ho khaw” ti’n keimah be ngai khal silo kapa zawtphah cun in run ti theu. Kapa cun “Thlite ti’n in ko ih kanu cun”thluaite” tin in ko. Kanui’ tongkam cu kapai hrangah cun a ka sungih samphang vunsan vek khi a simai a hun hro bet, kawk bet, ek tengteng lo cun thil cang thei lo vek khi a si. Kan sungkaw daan te’n ka nulepa cu “Uico Nu” le “Uico Pa” ti’n an sarman aw ciamco.

Ka dinhmunah vun ding ve sanhman rawl na ei lai fangah na nulepa na kiangkap ah toaw, kawkaw ciamco haisehla rawl thaw te’n na ei thei kem? Puarko the na ei thei kem? Ziangtluk ih hmehthaw khal hmeh sehla thawzet le puarko ih na ei thei ding ka zum lo. Ka ei thei ve lo. Rawl ka ei le eilo tla in theipi dah cuang lo. Veitampi caan ahcun tlawngfeh a cut lo khal le ka nulepai’ tawhawk rero ka ngai paih lo ruangah tlawng tuanzet ih ka feh can khal a tam. Kei ka duhthusam cu ka rualpi pawl bangin thinbang beidawn can ah innah um in “innsang hi cawhhahdamnak hmun’ si ve sehla cucu ka duhthusam sangbik a si. Asinan keicu inn ih um hi ka thinbang, beidawn, riahsiatnak tamtertu sawn an si. Na nulepa zantin hauaw ringring ve sehla ca thawzet in na zoh thei kem? Kei cu ka zoh theilo rori a si ko.”nangmah in ca na duhlo hrimhrim ruangah khal a si” inti thuptu tla an um men thei. Asinan maw ka nulepai kawkawknak awkam sia pawl ka vun theih hi cu cazoh ding lamlam cu ka ruat theilo lawlaw. Keimah vek a tuartu nan um ve ahcun in theithiampi ve ko ding ka zum. Ka nulepa an kawkawk awkam ka theih can te ah khin ziangtluk in ka riahsia, ka thin a nau/na, ka bei dong tipawl hi ka nulepa in theihthiampi sehla cu ka thei ah kawkaw ngam ding ka zum lo. Ziang khal lo le in theipi hnuhnu cu ziangaw titha ka kham ruangih reh ding le a si cuang fawn lo. Veikhat cu tlawngin hna malte ka tuanta ih nidang ai in in kan tlun a sim deuh. Inn ka thlen cu kapa inn a rak hlum man zo. Kanu hi tuizan hrang zanriah khal a rak suang hrih lo.. tui sun ih ka eihlei beltawne buhcak malte lai lawng a um.. buh nepnawi le tawcak cu daile a dai tiamtiam tuk. Zianghman tonglo’n daite’n cui buh cu ka ei ih tisa thawn ka in.

Tlawngluh ka khelh lo pang ding ka phang tuk ih rawl cu zamrang theitawk in ka bar/ei hlohhloh. Ka kiangah ka nulepa cu an me hleuhleu veve. Uico sualaw zik bangin an lip tiatia. Ka rualpi pawl vek in phunhra ka kaikum ahhin ka nulepa in in duat ve theu sehla ka cak nasa. Ka rualpipawl cu phunhra an kai sung cu an nulepa pawl in neilo cingte khal hmehthaw deuh an hmeh ter. Hnatuan khal an siang lo. Cuvek nun hi nikhat te tal in tepve she ka va hiar lawman ve. “thenawk na duh ngaingai le tu rori na thilri la awlla tlan aw” rinlopin kapa cun kanu a vun hro. Kan thingkuang le bizu ih kanui’ thilri hmuahhmuah a lak ih tapthlang a thekdarh thluh. Culawng hman lungkim thei hrih lo’n a pal, a hlawn, a den, a sit ciamco. Keicu um ngaihnak khal ka thei lo. Ka theih man lo sungah ka mitthli cu an rak dawk zulzo man. Nangteh na mithmuh rori na nulepa thenawk ding thu rel bang hai sehla ziangtin’ na um pei? A va poi lawman ve kei an fanu ih khamtheinak le dawn theinak ka rak neihlo hi cu. Ka tuah theimi umsun cu an kiang ah dingin mitthli le canghnap thawi rak tah rero lawng hi a si. Kanu cu kapai tongmi le tuahmi theilo, hmulo bangin ihkhun parah a to ih a lu a kun ngernger. “Sung Hlei Cuai, thenawk na duh silo sawm? Kan thenaw tuk lam ding tu rori tlan aw ka lo vawthat lawlaw pang ding ho khaw.” Kei cu ka nulepa an thenawk ding cu ka lung a kim thei hrimhrim lo. “ka nulepa thenaw hram hlah uh maw” tapphah cun thenaw lo ding zangfah ka dil. “ kapa, kanu hi then hram hlah aw ka rualpa David bangin tlawnginn ah mi in ‘nu na neilo pi thawn’ in ti ding ka duhlo. Kanu cun i run pom thutthi ih “Thluaite, kan fanu neihsun te si maw nasi, cuvek in mi ih lo nautat ding cu kan lo siang lamlam lo. Napa thawn kan thenaw lamlam lo ding ho khaw” ka liang parah kanu cu a tap thluahthlo. Tikcu le can cun mi a hngak lo ih khua a maw cuahco thlang. “thluaite, tlawng tla na tlai pang kei, zamrangten’ va feh zang aw.. nan saya pawl tla in an lo kawk pang ding. Thinhnangam te’n ca va zoh aw maw napa le kei cu kan thenaw dah lo ding ho khaw” ttahaw thawn hnap hnuk hnuphno phah thawn kanu cun tlawng feh in fial. Tlawng ka hnu zik thlang ti ka theih cu ka vaidip ka la ih lamzin tluanah a tlan in ka tlan, a zuan in ka zuang,a leu in ka leu.

Tlawnginn ka thlen cu ka thlanhri a put man. Ka calhmai sam le ka dukput sam pawl cu an cin/ ciar bekbek thluh thei. Thawsa hehe le manhlap zet cun khansung ka vunglut cu Sayapa in to le ding thleithlak vei 50 in tuahter bet ih kake, ka tampawr le ka kawng, ka cawn pawl kha an na thluh. Ziang ka cang cu ka thei lo lamzin ih ka feh lai le sayapai cawhkuan in pekmi ka tuah lai ah ka pum kehlam ka hnakruh tang cu a rung na ciamco. Cawhkuannak ka tuah theh cu ka tonak ah ka va to. Ningzak le pumna a ceem ih ka hmai a sen, ka thaw a sa hehe thluh. Tikcu hman te ih rawl ka ei theulo ruang bik ah a si ding kazum kapum a na hmiarhmi deuh ringring. Na tuk tla cu a si hran lo nan’ umnuamlo ding, rualpi kawm paihlo ding tawkfang hrawng in a na hmiarhmi theu. A zan cu ca khal ka zoh theilo ih ih khal ka it that thei lo. Ka it thah man hlanah zing khua a hung vang. Zingpit ca kan zir theh cu inn kan tlung cio. Inn ka thlen cu kan innah nupinu pakhat ttawl tteng tti te a “aw” le a ring tuk ah hnasung tiang a khawk ih a khing ngongo thei. Puartak le misawp-sa-tawl tak cun kanu cu leiba a rak cawh rero. Kanu cun neta deuh ih pek ding cun zangfah a dil rero, cunu khal cun tu rori ih pek ding cun a cawh ve rero. Kanu tla hi ka zang a fah ve tuk ee.. nupinu pakhat a si ve nan’ a mai nupinu pi ih hivek ih hro le kawk a tuar rero. Cui leiba cu innsang hrang ih hman mi le siloin kapa in a bak ih a rak in mi zu man pawl an si. Veitampi can ah cun kanu in ka pai tong a el theu tikah “kanu khal hi kapa a tihlo tuk a bang” tin ka rak ruat thup theu.

Khatlam ahcun kanu khal a mawh lo ee. Kapa in zu man a thawngthawng in leiba a nei theu ih dawr neitu pawl in le kanu an ra cawh theu. Veikhat veihnih lawng kahl a silo siar cawk a sin awn lo. Vei khat cu mak ka ti nasa “thluaite, tui sun tlawngkai duhhlah. Na saya pawl hnenah tuisun cu tlawng kailo dingin ka lo simsak cia zo” kei khal kanui’ tivek cun tlawng ka kai lo. A sun cu ka nu in dawrah in vahpi ih “cumi ka duh, khami ka duh” tin’ ka sim le rel tul lo’n hnipuan in leisak ciamco. A man khal an khung zet. A mawi khal an mawi. A rong khal ka duhthusam cekci. Kedam khal cawlhni sun khawm ih hman ding, tlawngkai can ih hman ding le puai vek um can ih hman ding ti’n an tawng tawng in in leih thler thler. “na tlawngkainak ih na hmanmi vaidip khal a tet tuk thlang” in ti ih a thar in leih thotho. Rawldawr ah in fehpi ih rawl mankhungzet ka ei dah lo mi tla in ei pi bet. Cuihleiah “na rilrawn can le thil tuktak tete ei aw maw” in ti ih thwngkhatca panga rori tamhnem (pocket money) in pe ka lau rori ka mit hmuah a kau thluh. Nidang tlawng kakai ah hman “hmuk pakhat na leinak ah”  tin paisa fangnga khal in pe dah lo. Tuisun kanui thlengawk dan hi a mak ka ti tuk. Ziangruangah si pei? Tikhal a theih ka hiar tiatia. Kanui thil in lei sak mi pawl cu a tam liai liai tuk ih kakut keh le vorh in ka keng ka bawrthlar nasa. “kanu, ziangah saw hiti ih thil in lei sak ciamco, na tthi thut mi nap oh maw si?” “aw si ee, a sinan napa cu simaw hlah maw, napa in a theih cun ka paisa hmuahhmuah in lawng thluh kei zu innak ah a hmang thluh tengteng ding. Tuisun ih na lungawi mithmai vek in nitin ten hni siamsi thei ringring ding zuam aw maw” kanu a tong a theh cu a mitthli a hal tiam tiam. “kanu ziangah saw na nitthli a hal tiamtiam” “mitu ih kan eimi rawl kha hmehthak a thak tuk si ka rak dawlhsual ih kadang tutiang a hal hehe thluh curuangah ho khaw” kanu cu hmehthat a rak eisual deuh a si cu. Kanu hi kawlpawl ih zuarmi tthi ( awng-ba-li) vek khi a rak thu ve theu ih cumi ah a van that a tawngruangah tuisun ah hivek in thil phunphun in lei sak thei nak cu a si. Tuisun cu ka lungaw, ka aipuang dan cu keimah te khal ka hni zupzo phahphah heeee. Kaha tla hi dai a ngah ding ti khawp tiangin ka ka cip ka hngilh. Ka lungawi dan ka simfiang thiam lo “ka lungawi tuk ih umdan ding khal” ka thiam lo ka ti hiamhiam hi a si mai. Ni a ling tuk thaw a sa tuk lawm mam ih kanu cu a sam thlahmi samtemnak thawn a vawn tem cu a hngang hrawng cu cuaknak vek an vual teptep, a angki hlum hrukmi a vun hlit cu a kuk,  a kiau kiangkap, a ngel le a ban pawl cu hriamhma hlir in an khat “hi vek in kanu hi zoha tuahmawh tu” tin ruah ciamco a tul lem lo kapa in a zurit can ih a cangvaihdan kel te a si mai ko si. Cuisun cu cutin kanu thawn can kan hmang tlang.

A zan cu cazoh dingin tlawng ka feh a thaizing in ka tin cu kanu a rak um lo kapa cu a rak itthat lai. Kan coka cabuai parah ka thaithawh ding retciami cu ka hmu ih ka ei. Kanu ih a hnatuannak lam ah a buai deuh ruangah si ding tin ka ruat men ih hnangam huahhi cun tlawng ka va kai. Zanlam tlawng kan tum ih in ka thleng cu kanu in a rak hlum cuang lo. Kapa cu zuri bengbeng in namtawng a keng ih hawr cu co cun tapthlangah a her luai lo rero. “kapa tuizan cu nava tlung tuan ve, kanu teh a tlung hrihlo maw si?” “khavek mi hlothlau, kanu khal ti aw hlah, a tlan hlo zo” “kapa ziangtin ee kanu cu? A tlanhlo zo ee? Khawi a feh ih?” “ khawi a feh ka thei lo, ka hawl hmuhni cu a thih ni si mai” “kapa ziang le ziang saw na tlawk phuatpho rero kanu cu khawiah saw a feh?” “a hnipuan le a thilri zaten a la ih a tlanhlo famteh nanu uiconu kha, a pasal keimah le a sungsuak a fa nangmah hman in duh nawnlo a tlanhlo zo” kapai tong ka theih cu ka mang a bang tuk. Zumthiam a va har ve kanu in in tlansan ti cu. Ka nui hnipuan le thilri retnak pawl ka zoh kan insungah kanui thilri pakhat hman a tang nawn lo a la fai verver thluh. Cucun kanu cu a ra kirsal nawnlo ding ti cu ka thei fiang. Ziangtin ka um ding na zum? Nang si aw la the ziangtin na um ve pei? Keicu nung cing in “kanu” ti ih kawh ding ka nei nawnlo. “kanu mi in nun a neilo pi thawn in ti ding ka duhlo zangfahten rakirsal aw maw zangfah ten”” ti’n tang cum in katap thluahthlo. Asina’n ak nu cun in thei cuang fawn lo. Kanu hi kapa thawn tan ding ih thu a rat ruahcia ruangah sihi maw mizan ah khavek in ka lungawi ding ih I tua ciamco. Kanu hi a va aa lo lawman ve. Riahsiatter i duh ruangah ka lungawi dingin i tuah ta. Kum 16 ka kim tiangah khavek lawman in kanu in i zohthat hi cu mizan nikhat lawng a si. Nikhat ka lungawi ding ih I tuah mi cu ka sansung riahsiatnak ding a rak si.Kanu in in tansan levete’n kapa cu lungfim lamlam ai in a zu in a luar deuh deuh. Kapa cu zu khal a in thei nawn lo zu sawn in kapa a in thlang. Zu ih a ciahawktuk ruangah kapa cu a hnatuan nak ihsin dawi a tawng ta riai. Kanu le hna a tuan nawn lo tik ah kan umnak cozah inn khal in dawi kan tawng betbet. Himi laifangte ih ka ruahmi cu “keitluk ih mi vanduai  an um lai pei maw? Hmainawrnak ding lamzin khal ka neilo ih dungkir nak ding lamzin khal kanei nawn cuang lo, ka tong ding neihsun cu “van ka zoh ih a sang, lei ka zoh ih a pit” ti lawng hi a si. Van that ah kan kohhran darvuan (biakinn kiltu) umnak inn a rak lawng ngelcel ih cutawkah kohhran pawlin duhsak/zangfahnak thawn in um ter.Inrin sun cu sunhrek lang tlawng kan kai theu. Sunder 12:00 hrawngah tlawng kan tum ih kan tlawnginn hmai lamzinpi kiangahcun mi tamnawn a burpi in an rak ding hlerhler ih ziangsi maw an rak zoh khawm. Ziang an zoh ti theihduhah dawksang nawn cun mi burpi lakah ka va theraw ihka va zoh ve.

Ziang ka hmu ding nan zum? Thi le hnai thawn a khat ih “a hnuk a cat zo maw cat hrihlo saw?’ ti ih suh ding khawp ih besia kapa cu ka vun hmu. Cucun ka theiman hlan ah ka mitthli a rung dawk zulzo hngal. “kapa, kapa” ka vun ko. Kapa cun mitmeng thei cucalo cun i hun zoh. Kiangkap minung pawl hnenah “in bawm hramuh, kappa hi sizung ah ka fehpi ding ih a damcak sal ko ding” ti’n tap phah cu sizung ih fehpi ding cun zangfah ka dil. Zohman cunin sawn lo. “kapa na dam mai ding ho khaw, kanu le a um nawn fawn lo ka damsan cu nangmah lawng na si. Kapa na dam tengteng a tul hokahw maw,” kappa cu ka ko ka be rero. Simduhmi nei bang cun kapa cu a ka a cang pherhpho rero. “kapa sim duhmi na nei maw si? Ziang ka lo tuahsak ding na duh?” ka hna cu a ka ri ah ka vun naih “thlite zu in va lei sak aw, zu in ka duh” tonghman a tong suak thei lo thli “aw” tethawn in sim. Lamzin kap ih zudawr ah ka va tlan vurvo ih zu langkhat cu a man khal pe cuang lo in ka va lak tawp. Khuat sungah ka vun thle ih ka pai ka ahcun malte ka vun tulh. Kapa cun a rak dawlh thei nawn lo. Ka mithmuh rori ah kapa cu a thaw a vung cem muarmo. “kapa na duhmi zu ka rak keng zo, hung tho awla, hung in aw” ka ko rero san a tlai nawn lo. “kanu, kapa” ti ih kawh ding ka neih nawn lo hi cu a naa tuk ti lo bak sim ding ka thei lo. Kei cu zu hi ka hua tuk. Zu a tuahtu ka hua zet ah tla nan rak ruat men thei ka hua cuang lo ee. An pumcawmnak a si ve si. A in tu sawn hi ka hua ti’n tla nan ruat men thei ka hua cuang lo ee in ding ih tuahmi an rak in cu an mawh lemlo pi. Ka huatbik mi cu a mah zu rori khi a si.

Zu cu ka hnak ih caksawn le mi nunnak/ thinlung neh theisawn a si ruangah si ka huat. Ka iksik tuk, ka nahsik tuk. Kapa a thaw a cem zik tiangah a fanu kei in hlam lo zu sawnsi a hlam. Kei ai in zu in kapai thinlung a neh sawn. Kanu in in rak tlansannak khal kapai zu in tuk ruangah a si. A fanu kei ka um na’n kanu cu a ra kirsal cuang lo. Cutawkzawn khal ah zu hin kei ai in thil a ti thei sawn ih kei ai in a cak sawn. Kan insangah zu in lal nak a ngah. Mi a uk thluh. A thu kan ngai thluh, in thekdarh thluh. Kapai nunnak tiang a dawlh hlo thluh. “maw zu ka lo hua tuk aw” ti lo bak sim le rel ding ka thei lo. Ka nei lo. Hi pawl hi zantin cazoh thei lo ding ih i tuah ringring theutu pawl an si. Asinan tuisun phunhra result ih kahmin a tel lo veten’ k arak ruahsual/ tuahsual mi thil pakhat a um ti ka thei fiang. “ka tumtahmi ka tuahsuak le tuahsuak lo cu keimai parah si a thum awk. Ziangah saw zu cu nehnak k arak pek?” keimah le keimah ka mawh thluk awk. Thlakhat a kim hmuah cozah inn ih k arak umlai ih kan inhnen kawl nupinu cun ka um nak inn ah a ra leng. “thluaite inn nan thawn lai ah himi hi a lak cem nan hngilh. Kan mai kawl biaknak be ve mai awla tu hnak in na nun a nuam sawn ding. Na thinheng hlah maw ka lo duhdawt zangfah tuk ruang ah ho khaw”  A hlan kan innsangka tlun ih kan rak tarmi kapai hmin, kan kawhhran hmin le christian ti ih nganmi zialphek te cu in pe. Cumi lawng in “christian pawl ih Pathian cu biak tlak lo, zum tlak lo, an biakinn khalah khawm hlah uh” tin a fale a rak cah rero nak ih a san cu ka vun thei fiang ruangro. Tu khawi ka um ding nan zum? Nulepa neilo pawl um khawmnak tlawngah ka um. “kan tuahsualmi remthatsalnak ding ah a tlai tuk zo” ti a um lo an ti si tu ihsin thawk ca ka zuam ding ih mi pakhat cangsuak tengteng ding in. Leitlun ah kan rak um ve ti mi hi ka phuansuak a rak tul theu. Cumi ni khua a thlen tik ah cun kanu thawn tla kan tawngawsal a si men thei. Mi pakhat ka si ah cun kanu tla rakir sal ding a tha tho in in hawlsal tla a si men thei. Kanu thawn tawnsal can a um ve leh ko ding. Ziangkim parah minunglam ka ti thei tawk in kazuam ding ih Pathian khal in “kanu” ti ih kawh ding in neiter sal ko ding. Thlaza ka cam kanui’ nunkhua sau hram she. Kanui’ umnak a theitu nan um le rak sim uh maw a fanu Zilthli Lal Nei Thluai in a lo hawl rero, a lo ngai tuk” tin…………..

(Visited 134 times, 1 visits today)

Comments

comments

4 Comments

  1. Dear, Thluaite,

    Na ngan thiam theituk. Siar manhla in mi nun a sim nasa.
    Na ca siar ding ka rak bawh ve ringring hokhaw. Zuam vivo aw maw.

    Na rual nute,
    MDD.

  2. hi.
    Rual, na ti tha ee. Ka siar thluh ih siar nuam in lesson tam pi k zir.
    Mi tuarnak le sinak thei taktak loin mawhthluk le mawhphurh ding a si lo ti le Zuu in insang hell ah tuah in kan nunnak tiang in ruk sak thei timi hi na ti duhbik in k thei.
    Hi hi, na life tak tak maw? hi tawk ah reply teng teng a tul lem lo mw kha cu.
    Na ca ngan mi siarduh tu an tampi ti thei aw la tha sinsin in tampin run ngan tum vivo aw mw.

  3. Siangte Senhri says:

    Thluai te,ka uar tuk aw,kan nun ah miih zoh tthim ding a um lo ah cun Ram thim nor hi cu a har fualfo tuk ti aw.Zum tu mi piangthar Christian Insung sang cun kan nun in mi hnen ah Pathian thu sim tu dg kan si….Thluai te,Cherrs up!

  4. Mai Zilthli Lal Nei Thluai says:

    Rual, Mai Dai Dim le Siangte, nan commentedmi ka hmu ih ka lungawi tuk. Ka tha khal a tho ngaingai. Nan nih vek rualpi lo neih hi cu a manhla thei cuarco tuk aw. Lungawi ngaingai.

    @Za Lal S. Ai..ha na hmin ka hmuh cu tlawngkai lai ka mang rori. Ngai na um nasa. Ka c na rak siar ih lungawi tuk maw. Cule, himi nunthuleng ka ngandan thuhla malte na gmail cabawm ah k lo kuat hokhaw. Tha in pe ih k lungawi tuk

    Nan commented ka siar cu ka tha a tlung hlunhlo.

    Lungawinak tumpi silo lungawinak tampi thawn
    Mai Zilthli LNT

Comments

%d bloggers like this: