Zumtu le Zuam man Laksawng

– Rev. Run Cung Mang (LCF Malaysia)

Thuhmaihruai:

Bible in zumtu thutthennak hi phunthum in in sim: a liamcia caan (past) ah misual vekin thutthennak; atulaifang (present) ah faa vekin thutthennak le, a ralaidingmi (future) caan ah hnattuantu sal vekih thutthennak ti’n. Jesuh Khrih cu i Runtu le ka Bawipa tiih kan zum le ka pom vete’n sual thutthennak in kan luat. Thihnak ihsin nunnak sungah kan lut zo. Khrih ih kan rin umnak le Khrih hrangih kan pumpeknak parah thutthen kan silai ding. Vancungram cu hnattuan man (reward) a si lo, laksawng (gift) a si. Cuvekin Rundamnak khal hnattuanman a si lo, laksawng a si. Aliamcia caan ahcun Pa Pathian in Khrih ah thu in tthen. Atu laifang ahcun kanmah le kanmah sualsirnak in thutthen awk caan a si. A ralai dingmi ah Khrih le Kawhhran hrangih pumpeek hnattuannak kan neihmi parah thutthen kan si ding. Kan zumnak le kan hnattuannak parah zoh in Pathian in thu in tthen dingih kan hnattuan man laksawng in pe ding.

Bible sungah kan hmuh theimi zuam man laksawng pawl kan zoh tlang hnik pei:

1. A siat thei lomi sui lukhum (uncorruptible crown)

“Sikhalsehla, kannih in kan taksa duhnak kan hrem tikah

a vuai thei lomi sui lukhum ngah duh ah a si” (1 Kor. 9:25).

Paul in leitlun minung pawl hi tthen thum ah a tthen: zum lotu (unbeliever-natural man); zumtu asinan leitlun tisa duhhiarnak ih nehmi: zumtu-tisa mi (carnal man); le zumtu thlarau nun ih tthanglian mi le pitling nun neitu: zumtu-thlarau mi (spiritual man) ti’n. Himi phun thum sungah tuni mi tampi cu zumtu kan si kan ti aw cio ih a hmin men cun Khristian kan si thluh. Amah lawngte mah bulpak thlarau nun ngaingai ah Jesuh Khrih cu i Runtu le ka Bawipa a si tiih zumfektu le Khrih dungthluntu, le thlarau mi taktak cu a mal aw ngaingai. Zumtu le zumlotu hi nitin nunnak ah siseh, hnattuannak ah siseh, thleidan thiam a harzet ding. “Kan dang cuang lo ee” tivek fang kan tamtuk thlang.

Curuangah, Paul in, “zumtu pawl cu lei tisa duhhiarnak ih nehkhuhmi, si loin an taksa ruangpi a humhim theitu, sualnak sungah pil hlo loin an taksa duhnak a suup aw theitu, le leitlun nunnomnak ah ceen aw lo ih thianghlim teih a um theitu si a ttul ti’n in zirh. Tlan zuamnak ih laksawng ngahtu pawl le Bawlung lek thiam hminthang pawl in an hminthan theinak cu an taksa duhnak an hrem ih an hmuitinmi hlawhtling dingih an taimak suah le an zuamnak ruangah a si. A siat theimi le caan rei daih lomi leitlun hminthannak hrangah cutluk ih an suup awk le an hrem awk thei vekin kannih khal kumkhua daih a siat thei lomi sui lukhum kan co thei venak dingah tisa duhnak hrial in Bible siar, thlacam, khawm le Kawhhran hrang pumpek cangvaihnak sungah taimak suah ih tel zuam cio uhsi! Cuti cun Khrih ih Thutthennak Tokham hmai ah nehnak co in zuam man laksawng ah a siat thei lomi sui lukhum kan khum thei ding.

2. Lungawinak Sui lukhum (crown of rejoicing)

Nanmah hi kan Bawipa Jesuh a rat saal ih nehnak thawn a hmai ih kan din tikah,

kan ruahsannak, kan lungawinak le kan hmaihngalnak nan si ding.” (1Thes. 2:19)

Paul in zumtu a faale pawl ih kan lungawinak taktak cu ziang dang thluasuah hnakin mission hnattuannak ih a rah le a par a simi thlarau hlo kaih hi a sizia fiangte’n in sim. Pathian ih umpit lamhruainak thawngin ramkip ah rundamnak thuthangttha a sim zirh. A thusimmi thawngin mi tampi in an sualnak sir in Rundamtu Khrih Jesuh hnenah an ra pan. Thessalonica khua ah a thuthangttha simnak ruangih piangthar pawl tampi an um. Paul in a nunnak le a hnattuan a vun zoh saal tikah Khrih hmaika ih hmuh ding, ken ding, le uar awk ding a neihsun cu thlarau hlo rundammi pawl hi an si. A ruahsannak umsun khal a si. A lungawinak saangbik khal himi lawng a si.

Curuangah, Jesuh Khrih cu i Runtu le ka Bawipa tiih a zumhngettu zumtu mi piangthar pawl kan nunnak ah thupibik ih kan ret dingmi cu thlarau hlo ruun ding hi a si. Kan thlacamnak, kan tettikhannak, kan thuthangttha simphuannak, kan peeknak, le kan hnattuannak hmuahhmuah hi mission a si ding a thupi. Bulpak nun, innsungsang ihsin Kawhhran le Khristian Pawlkom ih kan hnattuan thupibik khal hi mission a si. Nang le kei tla missionary pawl ruangih rundam kan si bangin midang rundam an si ve theinak dingah nangmah le keimah in thungaithlak ih evangelism & mission hna kan ttuan a ttul. Ni netabik ni ah Khrih hmai ih kan hmaihngalnak ding umsun cu “thlarau hlo kan hruai suah mi” an si ding. Thlarau hlo kaih hnattuan cu lungawinak sui lukhum conak a si.

3. Dingfelnak sui lukhum (crown of righteousness)

“Cuih laksawng cu dingnak sui lukhum a si ih keimai’ hrang lawng a si lo; duhdawtnak thawn amah a lang ding a hngaktu hmuahhmuah hrang khalah a si” (1Tim.4:8).

Paul ih nunnak kan zoh tikah dawt dingzazet le cawn ding ttha tampi a um. Cumi pawl lakah, a ruahsanmi, a hngakhlapmi le a hngah ringringmi hi leitlun lennak le hminthannak si loin Khrih hmin sunlawinak hrang liolio ah a si ringring. Dingfelnak sui lukhum a ruahsan tikah a zumfekmi cu Khrih a ra kir saal tengteng ding timi a si. Cuih ni ih ningzak mualpho ih a um lonak dingah nitin a nunnak ah borhhlawhnak le sualralnak hrial in suup awk theinak le ziangkim dikte in a tuah. Khrih a ra saal ding ruangah mah duhpoh ih nung ding kan si lo, kan Bawipa ih thuthennak hmaika ih kan din tikah midingfel pawl cu sui lukhum in pe ding ti a zum.

Curuangah Jesuh Khrih vei hnih rat saalnak ding thu hi thupizet in ruat ve uhsi! Vei hnih rat saalnak thu zum duh lo hi leitlun tisa duhnak ah mah duhpoh ih nunnak a si. Paul in Khrih hrangih rin umzet ih a umtu, mission hnattuantu lawng si loin Jesuh Khrih a ra saal ding ti zum in duhdawtnak thawn a hngaktu hmuahhmuah hrangah dingfelnak sui lukhum co ding kan si a ti. Kan san hi san siava taktak a si. Leilung cem netnak ding caan netalam kan thleng taktak ko. Zumtu daithlang ih um ding kan si nawn lo. Raalring te’n um thiam kan ttulzet. Zuam man laksawng ngah dingin rin umnak thawn hngak uhsi!

4. Sunlawinak sui lukhum (crown of glory)

Nanmah ih kilkhawi dingih retmi tuurual kha a uk in uk tum hlah uh; an zohtthim dingin nung sawn uh. Cule Tuukhal bawibik Khrih a lang tikah a tleunak a dal thei lomi bawi lukhuh sunglawi nan ngah ding” (1Pet.5:3-4) .

Tirhthlah Peter in khuahra vantang ih a tthekdarh awmi zumtu pawlkom kawhhran zate hnenah thazaang a pekmi le ahleice in hruaitu pawl hnenih thucah a neihmi cu “Tuukhal ttha si ding” hi a si. Phundang in kan sim asile hruaitu ttha si ding hi a si. Kawhhran le Fellowship tampi ah pastor an um ih a hrekkhat ahcun full time minister nei lo tla a um. Zumtu mibur um khawmnak kip ih hruaitu cu tuukhal dinhmun ttuanvo neitu kan si thluh. Thuneitu ttuanvo nei upa pawl hi kan thupi ngaingai. Hruaimi pawl parah duhdawt zaangfahnak le zawnruahnak nei pumpah loin mai’ zawn lawng ruat in thunei duhtuk in mipi hi a uk ih uk tum khal a tam aw vingvo hmang. Pathian Thu cun mipi kha a uk ih uk tumtu si loin an zohtthim ding sawn ih um ding in fial.

Curuangah, tuni hruaitu ttuanvo nei upa zate’n, Khrih le Kawhhran hrangah, mipi hrangah rinsantlak hruaitu, riantu ttha kan si cio ding a thupituk. Ziangahtile kan dinhmun hi a thupi ngaingai. Kawhhran le Fellowship tthanso tertu maw asilole ttumsuk tertu so kan si ding? Thuneih duhtuk, mi uk duhtuk si loin zumnak ah siseh, thlacam ah siseh, nitin nunzia thianhlimnak le tangdornak ah siseh mipi ih zohtthim tlak le cawn tlak keneh neitu si a ttul taktak. Culawng ah “sunlawinak lukhum” cotu kan si thei ding.

5. Nunnak sui lukhum (crown of life)

Hniksak harsatnak a tuar ih hngette ih a ding theitu cu mi thluasuak an si.

Ziangahtile cubangtuk hniksaknak a neh thei ruangah Pathian in amah a duhdawtu pawl hrangih a tiam ciami nunnak sui lukhum an ngah ding” (Jeim 1:12)

Jeim in, Zumtu nun cu a nuammi, pangpar ih phahmi lamzin a si lo; hniksak harsatnak ih a khat hling le so phahmi lamzin a sizia in sim. Sihmansehla, zumtu diktak cu kan Bawipa Jesuh Khrih ih a zawhmi thinglamtah lamzin thlun ding hrim2 kan si. Nitin kan nunnak ah siseh, Khrih hrangih tettikhannak ah siseh, Pathian ram kauhnak dingih mission hnattuannak ah siseh, dokalhtu, ngiartu le dawnkhamtu a um ringring ding. Hniksaknak le sualforhnak a phunphun a ra thleng ding. Thinharnak, beidongnak le buainak phunzakip in a lo tlunhnawh ding. Cuvek caan khal ah zumtu cun tlu le sawntu si loin hngetkhohzet ih ding theitu si a ttul. Paul in Efesa kawhhran tha a pek bangin Pathian raalthuam famkim hruh tahrat in fekte ih din thei zuam a ttul. Culawngah zuam man laksawng co tlak kan si thei ding.

Curuangah zumtu nu le pa u le nau pawl, nitin na nunnak ah kan raal Satan ih bumnak le thlemnak hi theithiam dingin thlaraulam fimnak nei cio uhsi! Nitin thlacam le Bible siar in Pathian pawlkom ringring uhsi! Kan hnenah ziangbangtuk tukforhnak hman thleng hmansehla, Thlarau Thianghlim bomnak in kan neh thei ding. Nunnak liam ngam tiang, thih thleng rin-umnak thawn Khrih a riantu lawngin “nunnak sui lukhum” an co ding.

Thunetnak:

Zum lotu, piangthar lo na si le atu hi rundamnak ni le caan a si. Na sual sirin, na lung thlengh in Jesuh Khrih hnen ra pan thlang aw, a caan na tlai pang ding. Zumtu ka si ti na cingin thlaraulam tthanlen pitlin tum lo, leitlun tisa duhnak ih ciahnehmi na si pang le atu ihsin thlarau thazaang thar laak in thlacamnak, Bible siarnak le cangvaihnak nei in pumpe thlang aw. Cuti cun, tisa duhhiarnak suup theitu na si dingih a siat thei lomi sui lukhum na co ding; mission hnattuantu na si dingih lungawinak sui lukhum na co ding; Bawipa ih rat saalnak ding hngakhlaptu mi rin-um na si dingih dingfelnak sui lukhum na co ding; hruaitu le hotu dinhmun ih ttuanvo neitu na si ahcun zohtthim tlak ih pumpetu na si dingih sunlawinak sui lukhum na co ding; ih tukforhnak na ton tikah thih thleng ih rin-um na si ahcun nunnak sui lukhum na co ding.

Zumtu hmuahhmuah zuamman laksawng cotu kan si thei fingfingnak dingah

Pathian in thluasuah in pe cio hramseh!

Comments

comments

Tags:

One Comment

  1. Saya Run,

    Na sermon a tha .
    Thazang ka ngah nasa.

Comments

%d bloggers like this: