Zumnak thawngin Nehnak

February 4
Zarhte Ni

Zumnak thawngin Nehnak

Dungthluntu pawl in, “Kan zumnak hi tthangter sin aw,” tiah an Bawipa cu an ti.
– Luka 17:5

Bible Siar Ding: Luka 18:1-14

Cangvaih lonak cu nehnak ah hruailuh a si ding. Cangvaih lonak – cu a vaivuan, a tthuktthun, ttihhrutnak in a khat ih rin ngamnak a nei lo – ziangtinkim hmakhua a pitter, ziangahtile Pathian zumfeknak ai ah rinhmainak in a khat ruangah a si. Zumnak cu ziangso a si? Zumnak cu Pathian Ttongkam sungih nungmi cangvaihnak daan hrampi a si. Cumi cu nunnak a si; cumi cun nunnak a suahpi; cumi cun mi nunnak a thlengh. Zumnak cu a va mak ve, ziangahtile zumnak tel loin rundamnak co thei kan si lo. Zumnak tel loin humhim aw thei khal kan si lo. Zumnak lawngin baptisma co thei kan si ih zumnak ih kaihthawh mi kan si; curuangah a nungmi Pathian cu thluasuah hrampi taktak a si.

Mangbangza thil khuaruahhar tampi Jesuh in a tuahmi ruangah mi tampi in Amah cu an zum ih an nunram khal a thlengh aw a si. Aw, kan thinlungput le kan khuaruah daan ah siseh, kan nun daan le cangvaihnak tinkim ah siseh, kan khawkhan lairelnak tinkim ah siseh Amah kan bang ding cu a va thupi ve. Saam cangantu in, “Na Biakinn ka tlaihsannak cu ka sungah meisa bangin a alh; Nangmah an lo hmuhsuamnak hmuahhmuah cu ka parah an tla ttheh,” a ti (Saam 69:9).

“Ka duhdawt mi pawl, atu cu Pathian faate kan si zo; asinain ziangbangtuk kan silai ding ti cu a fiang hrih lo. Sikhalsehla Khrih a rat tik ahcun Amah bangtuk kan si ding ti kan thei; ziangahtile Amah a si vek cekci in kan hmu ding” (1 John 3:2) timi thu hi ka thei thok thlang. Pathian Ttongkam ah ka thinlung a phur deuhdeuh tikah ka nunnak pumhlum cu Pathian Fapa ih huham cahnak thawngin a thlengh aw vingvo ding.

Bawipa cu a kekkuaimi le tangdormi thinlung sungah a um ih ramcaar hmun ah lamzin a tuah. A hrangah lamzin na on sak asile Amai’ nunnak in na nunram cu tidai a luangter ding. Nangmah te’n ziangtik hmanah na sualnak na kholhfai in na tlianghlim thei dah lo ding; sualnak sung ahcun ziangtik hmanah na thazaang a cak dah lo dingih vision khal na nei thei lo ding. Na nunnak sungih sualnak a rat tikah vanlam thuphuan cu a cawl a si. Minung thlarau cu a thih taa a ttul ih Khrih ih Thlarau sawn na sungah nung in a cangvaih a ttul. Minung thlarau a thih tik lawngah Pathian in a thi theimi ruangpum cu a nungter ding (Rom 8:11). Nun thianghlimnak tel loin zohman in Pathian an hmu thei lo ding (Hebru 12:14). Jesuh in, “Thinlung a thiang mi pawl cu mi thluasuak an si, ziangahtile Pathian an hmu ding,” a ti (Matt. 5:8).

A fatezetmi sualnak in nunnak pumhlum a siatralter thei.

@ Smith Wigglesworth

(Visited 31 times, 1 visits today)

Comments

comments

Comments

%d bloggers like this: