Zumnak Mit

May 28
Tlawngkai Nikhat

Zumnak Mit

Jesuh cu Galilee peng khauzakip ah a feh ih Sinakok kip ah thu a zirh vingvo. Vancung Uknak Thuthangtha a sim vingvo ih natnak a phunphun a tuartu pawl kha a damter vingvo.
– Matthai 4:23

Bible Siar Ding: Isaiah 58:8-12

Nikhat cu minu pakhat Ramsbottom an tinak hmun ihsin a ra ih a hngawr ih bol (thyroid gland) a tuum vingvomi damter dingin thlacam a dil. Khawmnak hmun ih a rat hlanah a nu hnenah, “Ka Nu, hih ka natnak dam dingah thlacam dil dingin khawmnak hmunah ka feh ding,” ti’n a simta. Khawm ttheh tikah hmailam ah a ra suak ih a natnak hrang thlacam sak dingin in dil ih thla ka cam sak. A neta khawmnak ahcun a dingih mangbangza ih a dam zo thu tetti a khan. Hiti’n a ti, “Ka lungawituk lawmmam, ka tlung dingih ka dam zo ti’n ka nu ka sim ding.”

Inn ah a va tlung ih mangbangza tidamnak a co thu cu a nu hnenah tettikhannak a nei. A neta kum ih convention kan neih ttum ah a ra saal lala. Minunglam hmuh daan cun a orpaw cu a tum deuhdeuh. Sikhalsehla cumi nu cu Pathian zumzettu a si. A ding ih tetti a khan, “Kan dunglam kum ah hitawk hmun ah Bawipa in mangbangza in in damter zo. Ka lo sim duh, himi hi ka nunnak sungah kum tthabik a si,” Pathian in nasazet in a thluasuah a bang. Inn ah a tlung ih nidang hnakin cak sinsin in tettikhannak a nei.

Himi nu in Pathian a zumfek daan hi a danglam nasa. A kum thumnak kan khawmpi ttum ah khal a ra saal lala. Amah a hmutu pawl in, “Ziangti’n si na orpaw cu a tum deuhdeuh a bang ual!” ti’n an sut. Sihmansehla khawmnak sungih tettikhannak caan a thlen tikah cumi nu cu a hung dingih, “A liam ciami kum hnih lai ahkhan Bawipa in mangbangza in ka natnak in damter zo. Khuarauhharza tidamnak ka co ngah zo. Pathian huham in ka dam zo” ti’n tettikhannak a nei thotho.

Mi hrekkhat in hit’n thu an sut, “Mipi in ziangsi a cang. Ziangruangah thlalang a zoh lo? A orpaw cu a tum deuhdeuh si an lo ti?” ti’n. Cutikah cumi nu cu Bawipa hnenah a pan ih, “Bawipa, kan dunglam kum 2 lai ahkhan ka natnak mangbangza in in damter zo si. Ziangruangah kan natnak tidam a si zomi cu hih mipi pawl ih hmuh theih dingin na langter dah lo” tiin mitthli thawn thla a cam. Pathian rinnak in cuih zaan cu ithmuh thawzet in a itthat thei. A thaizing khua a vangih a hung tho tikah a orpaw cu a um nawn tariai lo, khuaruahhar mangbangza in a dam verver. Pathian sunglawi seh!

A tuarnaami thinlung cun laksawng a nei thei dah lo. Thil pahnih cu lo theih loin a ttul: a pakhatnak cu duhdawtnak a si ih a pahnihnak cu thutluknak – raaltthatzet ih zumnak in Pathian Thu famkimter dingah a cangvaiter.

@ Smith Wigglesworth

(Visited 26 times, 1 visits today)

Comments

comments

Comments

%d bloggers like this: