Zumnak ih Tettikhannak

January 9
Tlawngkai Nikhkat

Zumnak ih Tettikhannak

Curuangah annih in, “Pathian in ttuan hngaiseh ti in duhsakmi tuah dingah ziangso kan tuah ding?” tiah a sut. Jesuh in, “Pathian in ttuan hngaiseh ti a lo duhsakmi cu a thlah mipa zum kha a si,” tiah a ti.
– John 6:28-29

Bible Siar Ding: Saam 4

Rilte peng thling natnak besiazet ih ka tuarnak ihsin Pathian theihnak parih hrambunmi zumnak thawngin ka hung dam saal. Midang pawl hrangah heh le manglaw tiih hna ka ttuan rerolai ah Pathian in Amai’ duh daan vekin ka ttulsamnak zawnah a tthabik in thluasuah i pek. Pathian cu a huham cahnak thinlungtak teih kan rinsan ahcun kan parah thil a tisual dah lo ding ti ka thei. Raalbawipa in Jesuh hnenih thu a simlai ah himi vek zumnak rori hi a nei: “Bawipa, cuticun si hlah seh; Nang ka inn tiangih ratter dingah ka tlak lo. Damnak thu pe awla ka hnen-um pa cu a dam ko ding” (Matt. 8:8). Jesuh in a hnenah, “Inn ah va tlung awla na zumnak vekin tuahsak na si ding,” tiah a ti. Raalbawipa ih hnen-um pa cu cuih caan cekci ah a rak dam (c.13).

Hmun pakhat ih ka caamlai ah mino pakhat a rak ra ih a fala duhdawtzetmi a thizik timi thu i sim; ruahsan ding zianghman a um nawn lo, a ti. Cutikah kei in, “Zumnak lawng na neih a ttul” ka ti. Himi hi Pathian theihfiangnak parih a tthum awmi zumnak a si. Pathian in ka parah ziangti’n hna a ttuan zo ih hi minu par khalah ziangtivek in hna a ttuan ding ti ka thei. Cuti’n a inn ahcun kan va feh. A tuar daan cu tettikhan dingah a zualkaituk. “Jesuh hmin in hi minu sung ihsin suak aw,” ka ti. Anih in, “Ka Nu, ka Nu, ka dam zo,” ti’n a au. A dam taktak zo a si ti kan fiang theinak ding tetti cu amahte tho tahrat in a hnipuan hrukmi a thlengh awk ding hi a si ka ti. A rei hlanah hnipuan thlengh aw in a rung ttum. Siibawipa a ra ih a harhdamnak a fel maw tiah raalringzet in a check. Siibawipa in, “Himi cu Pathian ih damtermi rori a si, hihi cu Pathian ih kutcak ruang rori ah a si,” a ti. Cumi cu Pathian theihfiangnak parih hrambunmi a nungmi zumnak a si.

Mi pakhat hnenin paisa thawngkhat man cheque lethmat ka ngah tibang sehla, i kuattu pa ih mizia le sinak diktak felfaizet ih ka theih fiang lo ahcun raalringzet ih ka tawlrel a ttul ding. In kuatmi cheque kha upat tlak lomi a si ahcun cuih paisa parah ka hngat aw thei lo ding. Khatlam ah Jesuh in khuaruahhar thil maksak tampi A Pa a theihfiangnak thawngin a tuah suak. A Pa cu ziangvek ih huham neimi a si ti a nun in a fiangtuk. Zumnak cun theihnak, pawlkomnak le pehzom awknak a hring. A famkim lomi zumnak, rinhlelhnak in a khatmi, a thlengh aw dualdomi zumnak tivek pawl cu nunnak rori ih theihfiang cuca lomi ihsin rami a si.

Pathian cu kan dilngenmi hnakih tumsawn in in let duhtu a si.

@ Smith Wigglesworth

(Visited 18 times, 1 visits today)

Comments

comments

Comments

%d bloggers like this: