Zumnak ih Hrampi

January 15
Zarhpi Ni

Zumnak ih Hrampi

A hramthok ah Thu a rak um. Cuih Thu cu Pathian thawn a um ih Pathian a si. A hramthok ihsin cuih Thu cu Pathian thawn a um zo. Amah sung ihsin Pathian in ziang hmuahhmuah a seemsuah; seemsuahmi thil hmuahhmuah sung ahhin Amah tel lo ih tuahmi pakhat te hman a um lo.
– John 1:1-3

Bible Siar Ding: Luke 6:27-49

Vanlam nunnak sungih a tthangso ringringmi si kan duh asile hrihram taktak kan neih a ttul ding. Kan hrangah ‘Zumnak ih Hram’ siar lo hram dang zianghman a um lo. Kan hnattuan cangvaihnak zate le kan hnenih thil thleng ding zate cu an thupi thluh, ziangahtile kan hrambunnak Jesuh Lungpi kan neih ruangah a si. Lungpi (Rock) parah na ding asile ziangvek huham hman in a lo tthawn thei lo ding. Pathian ih Ttongkam siar lo ziangdang thil parah saktuah theinak ding a um lo. Ziangtinkim cu vutnel an si. Ziangtinkim cu an kekkuai thluh ding. Ziangdang thil pakhatkhat parah si loin Pathian Ttongkam parih na sak a si ahcun – na thinlung ih na ruahmi, na thutheih theinak le na phuurnak pawl – cu hrambunnak ah rinsan tlak zianghman an um lo, hrambunnak hmun kan neihsun cu Pathian Ttongkam lawng a si.

Kan hrambunnak ding cu vutnel hnakin a tthat deuh a ttul, ih Pathian Thu a tel lo ahcun vutnel vek men an si. Thil ziangvek khal kumkhua a hmun ringring dingmi zianghman an um lo. “Bawipa ih Ni cu rin lopi ah fifir bangin a ra ding. Cuih ni ah van pawl cu huuk celcel in an hloral dingih van ih a ummi hmuahhmuah tla an kaang dingih an siatral ttheh ding. Cule leilung cu a parih a ummi thil hmuahhmuah thawn a hloral ding a si,” ti’n in sim (2 Peter 3:10). Sikhalsehla Pathian Ttongkam fang khat te hman a siatral lo ding ti’n in sim (Matt. 5:18). Ka nun diriamtertu pakhat cu, “Maw Bawipa, Na Thu cu kumkhua in a hmun ding; vancung ih a hnget zomi thu a si” (Saam 119:98) timi hi a si. Saam hlangantu in, “Na hmin le na thupekmi pawl cu a saangbik ih na langter ruangah” a ti (Saam 138:2). Ka nun saktuahtubik cu Pathian Ttongkam a si.

Pathian in leilung seemsuahnak dingah A Ttongkam a hmang. Kannih cu Pathian Thu ih sersiammi leilung parah kan um ih minung million tampi khua kan sa. Jesuh, Pathian Ttongkam in a langlomi thil pawl hmangin hna a ttuan. A seemsuahmi thil zate sung ahhin Amah tel loih tuahmi pakhat hman a um lo (John 1:3). Bible ih a simmi sungah nung aw, Cungnungbik Bawipa theihnak sungah hngatsan aw.

“Milai nunnak cu rawl lawngin a si lo. Pathian hmurkaa ihsin a suakmi Ttongkam ihsin a si sawn” (Matt. 4:4). Pathian Thu parah nung awla a lennak hmusuak in ceen aw.

@ Smith Wigglesworth

(Visited 26 times, 1 visits today)

Comments

comments

Comments

%d bloggers like this: