Zumlonak in Pathian Huham a Kham

February 11
Zarhte Ni

Zumlonak in Pathian Huham a Kham

Zumnak an neih lo ruangah cutawk ahcun mangbangza tampi a tuah lo.
– Matthai 13:58

Bible Siar Ding: Hebru 3:8-19

Thluasuah famkim cotu kan si theinak dingah zumlonak (unbelief) siar lo zianghman in in hnaihnok in in dawnkham thie lo a si timi thu hi theihfiang dingin Pathian Thlarau cun in duhsak a si. Zumlonak cu ttihnung raapthlakza hnaihnoktu le dawnkhamtubik a si. Thlarau Thianghlim cu A fehnak ding lamzin kan on sak le vete’n ziangtiklai caan khal ah khuaruahhar thil maksak a cang ringring ti kan hmu ding. Sikhalsehla, kan minung fimnak le khurkhua ruah theinak zianghman nei lo sihman ningla, minunglam ih khawkhan lairel le tawlrel thiamnak nei lo hman ningla Pathian zumnak hngetkhoh kan neih ahcun ziang a ra cang ding? Pathian ih Thlarau Thianghlim cu kanmah ih vanlam khawkhannak sungah kan nun pumhlum kan ap top ahcun mangbangza thutak a langter thei a si timi khuaruahnak hi ka duhtuk.

Kan lakah mi ziangzat in so Pathian Thu a zumfek ngam? Bible in a ti tiih vun ciinken le vun laak duak mai cu a olte ko ding, asinan a thupituk sawnmi cu Bible caang vun ron hnakin Pathian Thu kan theihmi kha atak in kan nunnak sungih vun nunpicih rori ding hi a si. Ka hrangah, “Atu ahcun Pathian fahniang kan si zo” (1 John 3:2) vun ti cu zianghman a harsa lo, sikhalsehla a thupi sawnmi cu “Kei cu Pathian fa ka si zo” timi thutak thlarau nun rori ih theihfiang ding hi a si.

Pathian Fapa Jesuh leitlun a leenlai ah mi tampi in Pathian Fa a si ti an cosaang thei. “Zohman hi vekin thu an sim dah lo” an ti (John 7:46). A ttongkam cu huham in a khat, ih a simmi vek cekci in thil a cang thluh. A caancaan ah “Na sungih a ummi cu hih khawvel ih ummi hnakin a cak deuh” (1 John 4:4) timi hi na laak dah men thei. Asinan, unau cumi cu na nun ah atak in a si taktak maw? Khawsia khuavang in na nun an lo buaipi theilai maw? Khawsia hnakin caksawn ding na si. Na taksa parih natnak hnakin caksawn ding na si. Pathian Thu parah dingin harsat buainak kan hmason ngam maw?

“Zumnak timi cu kan ruahsanmi kan ngah tengteng ding ti zum le kan mit ih kan hmuh thei lomi a um rori a si ti zum khi a si” (Heb. 11:1). Zumnak cu Pathian Thu a si. Pathian Thu ih hrinmi na si; Pathian Thu cu na sungah a nung; Pathian Fapa ih nunnak cu na sungah a um; ih Pathian in zum dingah a lo duhsak a si.

Na sungih a nungmi cu hih khawvel ih a ummi hnakin a cak sawn timi thutak hi atak ih na nuncih thei asile hih leilung in a lo dodal in a lo kaihrem thei nawn ding maw?

@ Smith Wigglesworth

(Visited 37 times, 1 visits today)

Comments

comments

Comments

%d bloggers like this: