Zukneng Pinu Hruaitu Putar

13124589_1083422101715073_3610051086726492239_n

Arabian Zan pawl:

(3) Zukneng Pinu Hruaitu Putar

“Na siangpahrangram thawn a hlat zetnak khawpi pakhat ah ka rak um. Nupi mawi zet pakhat ka tthi. Kum tampi a liam nan fa kan nei thei lo. Rinum zet ih i riantu salnu pakhat ka nei. Ka salnu ih fapa cu ka cawmfa ih la ding in thutluknak ka tuah. Curuangah ka rocotu ah ka phuang ih, zunglam thil ttul le sakhawlam cindan pawl kan tawlrel thluh cun ka fapa ah a cang. A rei hlan ah ka fapa cu harhdam le cakvak zet in a hung tthanglian. Kum hra a si ahcun nauhak fimvar zet pakhat a si.

Ni khat cu khual lam hla tlawng ih ka suahvah a ttul can a rung thleng. Sumtuahnak lam ah mi pehtlaih ding tthenkhat ka neih ruangah a si. Curuangah ka cawmfa le ka salnu cu inn ah ka tanta. Ka ra kir sal tiang in an ttulhai mi run ngaihsak ding ah ka nupi cu ka cah ta.

Ka um lo sungah thinlung ttha lo nei mi pakhat in ka nupi cu dawi siava hman theinak a rak zirh. Ka nupi cun iksiknak thinlung a neih ruangah ka cawmfa le a nu cu hlohralter a duh. Curuangah ttongkam siava tthenkhat a samh ih kum hra mi ka fapa cu cawcang no ah a cang. Cui’ cawcang no cu ka hnen-um hnenah a hruai. Cawcang no harhdam zet cu man khung zet ih a lei mi a si thu a sim ih, tthatei’ kilkhawi ding in ka hnen-um cu a fial. Cu thluh in ka nupi cun ttongkam siava dang tthenkhat a samh lala ih ka salnu cu cawpi ah a canter. Cawpi khal cu rak kilkhawi ding in ka hnen-um cu a fial lala.

Kum khat zikte a rei hnu ah ka tlung. Malte ka cawlh hahdam ta hnu ah ka fapa le a nu, ka salnu, ih thuhla cu ka suthlam. Cutikah ka nupi cu riahsia zet in a lu a kun ih, “Duhdawtmi, na feh hnu ni malte ahkhan na salnu a thi timi ka lo sim a ttul hi poi ka ti zet. A dam lo ih tuamhlawm theih lo tiang in a besia. Na cawmfa thuhla ahcun, kan dunglam thla hnih hrawng ahkhan lek ding in a suakvak ih a ra kirsal hrih lo. Khuitawk hman ah kan hawl hmu lo,” tiah i sim.

Ka salnu ih thih thu ka theih tikah ka thinlung cu riahsiatnak in a khat. Asinan ka fapa cu a nungdam lai tiah ralttha zet in ka ruat. Ka fapa cu hawlsuah tengteng ka tum. Khawpi sung hmun tin ah ka hawl vivo nan ka hlawhtling lo. Cutin thla riat a liam. A rei hlan ah Bairam puaipi tuah can a rung thleng. Bairam puaipi ahcun sakhawlam cindan vekin cawpi pakhat thawn raithawinak ka tuah a ttul. Curuangah ka hnen-um ka ko ih raithawinak ding cawpi pakhat rak hruai ding ah ka fial. A rei hlan ah ka hnen-um cun cawpi pakhat a rak hruai. Cawpi cu ka thah zik tikah lungai zet in a bu. A mit ihsin mitthli an luang ti khal ka hmu. Cawpi zangfakza cu ka lainat ruangah hmun dang ih hruai sal ding in ka hnen-um cu ka fial.

Cutikah ka nupi cun, “Ziangruangah cawpi kha na that lo? Na thlah sal ahcun ziang thawn rai na thawi ding?” tiah i sut.

Curuangah ka hnen-um cu ka ko sal ih, cawpi cu a rak hruai. Asinan cawpi ih mitthli pawl cun ka thinlung i neh lala. Curuangah cawpi cu hmun dang ah hruai in ka hrangih raithawinak tuah ding ah ka hnen-um cu ka fial. Ka hnen-um cun cawpi cu a that nan a vun a hawk tikah a sungah titsa zianghman a rak um lo. Ruh hlawmkhawm lawng a rak si. Cawpi harhdam pakhat in ruh hlawmkhawm lawng a rak neih ruangah ka thin a phang. Curuangah, “Duhdawtmi hnen-um, cawpi kha cu nangmah in na rak co men lo ding maw? Kei ih raithawinak ahcun cawcang no harhdam le cakvak pakhat rak hruai aw,” ka ti.

Malte a rei hnu ah ka hnen-um cun cawcang no pakhat a rak hruai. Cawcang no cu ka fapa a si ti ka thei lo. Cawcang no cu hnen-um hnen ihsin a tlan ih i ra pan turto. Zangfah dil bang in ka ke hram ah a ra bok. Ka lainat ruangah cawcang no cu ka thlah sal. Ka hnen-um hnenah, “Himi cawcang no cu hruai sal aw. Tthate’n kilkhawi awla maw. Cun, cawcang no dang i hawl sak thei pei maw?” ka ti.

Ka hnen-um cun, “Aw,” ti phah in cawcang no cu a hruai ih a aiawh ding a va hawl. Mallai a rei tikah ka nupi cu thinheng zet in ka hnenah a ra.

“Aw! Ziangsi na tuah mi hi? Cawpi na thlah sal ih tu ah cawcang no na thlah sal. Bairam puaipi ahhin ziang thawn rai na thawi thlang ding?”

“Ziangvek ra thleng khal sehla sualnak nei lo rannung hi ka that lo ding. Nungdam ko seh.”

A thaizing, keimah lawng ka to lai ah, ka hnen-um cu ka hnenah a ra. Ka hnen-um cun, “Ka pu, na hrangah thuthang ttha tthenkhat le thuthang sia tthenkhat ka rak keng,” a ti.

Kei cun theih hiar zet in, “Ziangmi si? Tu ah i sim lohli aw,” ka ti.

“Ka pu, mizansun, caw-inn ih cawcang no ka hruai lai ahkhan ka fanu in a rak hmu. A hmaisa ahcun a hmuh ruangah a lung a awi ih, cu thluh ah a mit ah mitthli an hung tlingkhawm. Ka fanu hin dawi siava thuhla a theih ruangah cawcang no thuhla theih mi a neih ka zum. Ka zingzoi tikah, cawcang no cu a taktak ahcun na fapa a si thu i sim. Mizansun ah na raithawinak hrangih ka rak thah mi cawpi kha na nupi in dawi siava hmang in cawpi ih a canter mi na salnu a rak si. Na nupi in an nufa a huat ruangah hivek thil ttha lo a tuah mi a si thu ka fanu in i sim.”

“Asile ziangruangah a lung a awi lawk hnu ah a riah a sia?” tiah thinthir zet awkam thawn ka sut.

“Na fapa a nungdam lai ti a hmuh ruangah a lung a awi lawk nan, a nu cawpi cu raithawinak ih hman a si ti a theih lala ruangah a ttap.”

Kei cu ka riah a se zet. Cu thluh ahcun ka nupi ih thil ttha lo tuah mi pawl ruangah ka thin a heng. Ka hnen-um ih fanu hnenah ka va feh. A thiam mi dawi siava huham hmang in cawcang no cu ka fapa ih cangter sal ding ah zangfah ka dil. Titsa le thisen neitu ka fapa hun pom sal ding cu ziangtluk ih lungawiza a si ding!

Ka hnen-um ih fanu cun, “Ka pu, cawcang no hi na fapa ah ka cangter sal ding. Cumi ka tuah man ah a nupi i siter aw. A pahnihnak ah na nupi ttha lo hi nunsimnak pakhat ka tuah tikah i dawnkham aw hlah,” a ti.

A dil mi pahnih cu ka lung a kim ih, a rei hlan ah mitthli rualriat thawn ka fapa cu ka pom thei sal. Ka hnen-um ih fanu in ka nupi hremnak a pek zik tikah, “Hamkha tuk cun tuah lo awla a ttha ding tiah ka ruat. A cang thei asile a nunnak cu that hlah aw,” tiah ka sim.

“Awle. Asinan a fapa in rannung nun a hman lai ah ziangvek a tuar timi ka theihter ding.”

Cutin dawi thusamh tthenkhat a ttongsuak ih, ka nupi ttha lo cu hitawk ih nan hmuh mi zukneng pinu ahhin a cang. Kum tampi a rei tikah ka fapa ih nupi cu a thi. A riah a siat tuk ruangah inn ihsin a suak ih tuini tiang in kan hawl hmu hrih lo. Curuangah ka zukneng pinu hruai phah in leitlun ka fang kual vivo ih, ka fapa cu ka hawl rero.

“Khah, asile, Khuavang, sumdawngpai’ thuanthu maw kei ih thuanthu hi a maksak sawn?”

Putar ih thuanthu cu ngai nuam zet khal a si ngai. Curuangah khuavang cun sumdawngpai’ nunnak tthen-thum tthen-khat cu zuah ding in a lung a kim. Tu ahcun zuknengnu hruaitu putar cu a sir ah a tthawn. Can mallai a rei tikah uico dum pahnih hruaitu putar cu a tho ih, “Maw, Khuavang, khami thuanthu kha a maksak lawlaw a si ti ih na ruat asile, ka thuanthu na theih tiang in rak hngak hrih aw. Asinan sumdawngpa dan na tatnak tthen-thum tthen-khat na hlitsak ding tiah thu i tiam ta aw,” a ti.

Khuavang cun a lung a kim ih, uico dum pahnih hruaitu putar cun a thuanthu cu a rel thok.

Sianglianuk Kianghrol

(Visited 152 times, 1 visits today)

Comments

comments

Comments

%d bloggers like this: