Zuk Tumpi

August 30
Tlawngkai Nili

Zuk Tumpi

Bible Siar Ding: Seemtirnak 9:8-17

Nanmah thawn thukamnak (covenant) ka tuah ding. – Seemtirnak 6:18

Vangro (Rainbow) in Pathian ih fahniang pawl kan zatei’ nun in thamdai fingfing ding. A tleuzetmi le a mawizetmi vangro in kan thinharnak (worries) pawl sungin in hlirso ih lungawi hnangamnak hmun ah in khaisaang. Sihmansehla, vangro pawl cun cumi hnakih nasa sawn le rei sawn a daihmi danglam hleicenak (significance) an nei.

Ca Thianghlim sungih hminsinmi thukamnak (covenant) kan hmuh hmaisabik cu; Pathian in Noah hnenih a tuahmi thukamnak a si. Pathian in milai parih a tuahmi thukamnak cu a lungkim, a nemhnget ih ziangtik hmanah leilung cu tilik (flood) thawn ka kholhfai nawn lo ding ti’n thu a kam (promise) hngai. Cumi cu ruangah a nei lomi thukamnak (unconditional convenant) a si. Sim duhmi cu Pathian in thukamnak a neihmi hi Noah ruangah si loin Amah Pathian ih thinlung liolio ruangah a si.

Bible sungih a cuangmi thukamnak pawl cu mangbangza hminsinnak pawl (signs) thawn an kop aw ringring. Pathian in Noah hnenih a thukamnak cu vangro in a langter. Noah in ruahpi nasatak ih surmi le tilik in mi tampi a siatsuahmi a hmuh tikah ziangtluk in a mangbang ding timi khi vun ruahsak hnik hman! Asinan vangro a hmuh tinte’n Pathian in ziangtik hmanah tilik hmangin leilungpi cu a siatsuah nawn lo ding, a timi A thukamnak cu a kilkhawi ding ti’n a zum fek.

Vangro cu kan nunnak ah Pathian ih thukam in ciingkengtertu a si, ti’n a hrekseu cu kan thei thei, asinan Pathian lawng in thil umtu daan famkim cu a thei. Thuphuan 4:3 in, Pathian ih hmuh suakmi a luzik thlengin in sim. Vangro in A uknak bawi tokham cu a kulh thluh, a ti. Li (bow) bangin a hrek lawng kulhmi (arc) vek si loin a hluumpi in famkim ih kual (circle) pianhmang a si. Pathian cun a zapi huap in thil a zoh ringring. A thukam cu kan tthatnak dingah a si ih thukam pelh dah lo Pathian a si.

Bawipa, rinsan tlak Na Ttongkam parih rinnak i neihtermi parah ka lungawi,
ka parih Na thukammi cu ziangtik hmanah a pelh dah lo ding ti ka thei.

Pathian cun Amah thawn kan pehtlaih awknak ding thukam cu ziangtik hmanah a pelhter dah hrimhrim lo ding, ti ka rin ngam a si.

@ Ava Pennington

(Visited 24 times, 1 visits today)

Comments

comments

Comments

%d bloggers like this: