Zohthim Tlak Joshua Nun

ZOHTHIM  TLAK  JOSHUA  NUN

Stephen Tha Nei Fai

 

Joshua hi 1482 BC ah a suakih 1372 BC ah a thi. Kum 110 tiang a dam (Josh.24:29). Minung hi santawi zetnan nun man nei emem an um (eg. Bochuk Aung San vek) San sauzet nan nunman sullam um cuang lo an tampi. Khrih neitu le a fialmi poh tuahtu hi minung lakah suahman nei bik le nunman um bik an si. Nunman nei ngaingai Joshua nunin Pathian thu kan zir khawm pei.

(1) Moses kut hnuaiah riantu tha kum 40 sung a tuan (Joshua 1:1)
Mi kuthnuai ih tangdor zetih riantu hna a tuan hmasa ta lo tu cu hruaitu tha taktak a  suak thei lo. John C. Maxwell in, “Minung in hotu hnakin hruaitu tha kan tul,” ati. Pathian in zumtu pawl hi a hman thei dingah training a phunphun in pe theu. A training ong ta locun thupi, hlapi ah a hmang thei lo. Joshua cu Moses hruainak hnuai ah training a pe ih a ong viahviah a si kha.

(2) Pathian phuanawknak puanthlaam a suah san maimai dah lo (Exodus 33:11)
Pathian in Moses cu puanthlaam suangah a biak, a pawl theu. cutheh in mipi pawl hnenah a feh theu. Joshua cun,”Moses bangih Pathian ih in biak, in pawl ve hlan lo,” tiah puaniin suah san mai loin Pathian a dawr ta theu. Pathian aw a theihin hnangamte’n a tuah dingmi a tuah peh theu. Tong dangih kan sim a sile thlacam nun a nei tuk tinak a si.

(3) Pathian hnatuan a tum daan (Joshua 24:15)
Joshua cun a mah lawngih Pathian biak le Pathian hnatuan a duhtawk lo, a di a riam lo. Curuangah, “Kei le ka innsang cun Bawipa kan rian ding”, a ti. Innsang pa si maw, innsang nu si maw heh le heh Pathian hnatuan rero ih sungkua dang ih theihpi lole buaipi lo lawlaw an tampi. Unau! nan sungkim ten mahle theihtawk cio ih Bawipa nan rian ding khi pathian in  a lo hngak sokhaw. Thlacamnak le ruahnak thatha thawn kan bawm aw thei theh.

(4) A thih ding Pathian in a ui (Joshua 13:1)
Joshua cu a kum a  tam ih a tar tuk thlang. Cutik ah Pathian in,”Na tar zet thlang ih ramlak ding le a tam lai fawn,” a ti. Pathian rori ih uitlak, hahio tlak si cu  a va manhla ve. Pathian tihzahmi le mifel an thih tikah Pathian in a ui theu. Ziangahtile leitlun ih  a sunlawinak an lang ter theu ruangah a si.

# Pathian ih uitlak le lom tlak, satan ih thiiktlak khopin Pathian rian lawlaw cio uh si.

(Visited 58 times, 1 visits today)

Comments

comments

2 Comments

  1. lungawi…..cui hmun ka thleng ban ve lo sihi.hmanseh P.T in ii duhdawt ih ii um pi tih ka thei ih ka hna a ngam.
    cui hmun thleng cu ka si lo nan a nun hi ka daw in thazang ka ngah zet a si.

  2. Ava ropi ve. Siartu thazang a tlungter tuk. Pathian in lo hmang sinsin hramseh.

Comments

%d bloggers like this: