Zoh Tthatnak

November 5

Tlawngkai Nili

 

Zoh Tthatnak

 

Siar:

Saam 139:1-10, 23-24

 

Maw Bawipa, i zingzoi awla i hniksak aw; ka duhnak le ka ruahnak khal hi khingkhai hnik aw. A thlengh aw dah lomi na duhdawtnak in i kil ih, Rintlak na sinak in i hruai ringring.       -Saam 26:2-3                

 

Kumkhat Sung Baibal:

–   Jeremiah 34-36

–   Hebru 2

 

Kan uico Dolly cu kum 7 a si. West Highland Terrier phun a si ih leilung laih a duhtuk ruangah a baalzet ttheu. Inn ah zarhkhat veikhat hrawng kan kholh sak ttheu. Asinan a baaltuk caan ahcun man pekmi uico kiltu hnenah kan fehpi ttheu.

      

Uico zohkhentu nu hnenih feh cu a duh lozet ttheu. Ziangahtile a hnattuan a tam ih a thin a tawi. A dawr hmuh men hman in a tlaan duh ttheu ruangah Dolly sangka sungih luhter cu a harzet ttheu.

      

Kan dungkum ah uico zohkhentu dang hnenih kan fehpi tikah a nuam awzet lo nain feh ding  a hrehtuk nawn lo. Ziangahtile a taksa nuam lo ko tiang a kholh sak nain uico tlun ah a nun a neem.

           

Sualnak le borhhlawhnak kan thinlung sungah a peng awk tikah kholhfai kan ttul. David bang in, “Maw Pathian, i hliakhlai awla, i hniksak aw, ka sungah tthat lonak a um le zoh awla” (Saam 139:23-24) tiah dil kan ttul. Bawipa in nuam aw lo ko in tuah thei men. Ziangahtile sualnak phuanlang cu a har ttheu. Hmanseh ttihphang lo tein Amah kan pan thei a si.

           

A caancaan ah Bawipa ih in hliakhlainak cu tuar naa in um hmansehla Amah cu a nun a neem ih zaangfah lainatnak a nei.

 

Ka lungthin zoh in tuihsun thei aw, Bawipa,

I hniksak in ka ruahnak thei aw Ruuntu, ka lo ngen;

Ka sungah hrokhrawlnak a um le hmu aw,

Sualnak hmuahhmuah i kholhfai in i luatter hram aw.

 

Sualsir ih natnak in damnak ah mi a hruai.

(Visited 25 times, 1 visits today)

Comments

comments

Comments

%d bloggers like this: