ZOHṬHIM TLAK CAZI U SAN NI


Leitlun Ralpi vei hnihnak a can hlanah Yangon khawlipi ah Perock tiih kawhmi Mirang pawl ih company pakhat ah Mirang (10) le Kawlram mi cazi (60) pawl cu hmunkhat ah hna an ṭuan tlang.

Nikhat cu an hnaṭuannak zung ih luhnak sangkapi cu darwan in ṭha ten a rak khar ngah lo. Curuangah thli a hran tikah sangkapi cu a ong aw thul, a khar aw thul in a um rero ih, a awn ring thawn hnoksak a um zet.

Company ih hnaṭuantu vuanṭhan zate an kim nain zozo khalin sangkapi awn cu thei lo vekin an umsan ṭheh. Curuangah sangkapi ihsin umtu U San Ni cu a um thei nawn lo ruangah sangkapi lam ahcun a feh vivo ih sangkapi cu ṭha ten a vung khar. Hi ni ih thil umdan hmuahhmuah cu manager in a hmu ih thil umdan le cazi U U San Ni ih hmin pawl kha ṭha ten a rak ngankhum.

Kum a cem tikah company hnaṭuantu pawl cu thla hlawh ṭhan an si ih, an lung a awi nasa. Manager in kum khat hrangah a ṭhang hi fang (5) lawng a pek. Asinan cazi U San Ni cu kum dang ih a ngah dahmi hnakin a let li tam in a ngah. Cuih thu cu vuanṭhan zaten an lungkim thei lo. U San Ni cu a let li rori tam in a ngah hi a dik lo tin manager hnenah duhphorhnak an nei.

Cutikah manager in, “Nan zate in hnaṭuan hi thinlung tak in nan ṭuan lo. A mawinak men fang in nan ṭuan. Zung ṭum caan hi nazi 4:00PM a si nain, nazi 3:00PM a kim cun nan cafung, nan file pawl le nan thilri dangdang pawl bizu sungah nan thun/ret ṭheh zo. Hnaṭuan laklawh zet lai khal nan cawl. ṭheh ko in ka ṭuan ding timi lungput hrimhrim nan nei lo. Curuangah kum a cem tikah kum dang ih tidan keel ten fang (5) lawng ka lo ṭhannak a si. Asinan U San Ni cu nannih vek a si lo. A zuam ih taimak a suah. A lungput a ṭha. A zelthem dah lo. Ruahpi sur dingih thli hran ni ah a hmaiih cazi mi (15) lan in sangkapi a vung khar. Nannih cun cuih sangkapi cu nanmah thawn pehpar/seng aw lo vekin nan um men. Curuangah himi copany le zunginn sungih ummi hi ka ṭuan ding hnaṭuan hrimhrim a si thei ih, ṭuantu cu a let li (Ks.20) ṭhan in ka pek,” tin a ti.

Cucun a lungkim lotu pawl zozo khal ṭong ngam nawn lo in, thengre vuakthlak bangin ziang awn-au khal nei ngam nawn lo in manager zungkhan ihsin an suaksal.

U San Ni cu amai’ san lai ah hna a ṭuannak ah dik zet, fel zet, rinsan tlak zet le taimak suah in zuam zet ih hna a ṭuan ruangah a san sungah mi ih neihnak dawtu si lo in, mi ih dawtmi dinhmun ah a um thei. Kawlram mi micungcuang le zohṭhim tlak mi (100) an hrilmi sung khalah a tel baan thei. A mizia, a sinak le a lungput umdan cu a hnuailam vekin a sinak theitu pawl le thuthuan ngantu pawl in an tarlang.

(1) A thinlung a pacang ih, nasatak in a zuam.
(2) A dik, a fel.
(3) A dikmi cu raltha zet in a tuah ngam.
(4) A rinum.
(5) A parih thil ṭha tuahtu pawl a hngilh lo.
(6) A hnaṭuanpi pawl a duhdawt thiam.
(7) Peksuah nun a nei.
(8) A hnakih upa a ṭihzah, mifim pawl a kom.
(9) Mi hnenah ruahnak ṭha a dil.
(10) Biaknak a upat.
(11) Phunhnam duhdawtnak a nei.
(12) Tisa nom cennak le thil ṭha lo pawl a hrial.
(13) Hna ṭuannak ah cin le daan felfai ten a nei.
(14) A hna ṭuan a upat.

Credit: Dahma Gawtaka U Maung Maung (၁၉၉၉ -မတ္လထုတ္ သင့္ဘဝေအာင္ၿမင္ေရးမဂၢဇင္း; ျမန္မာလူေက်ာ္ ၁၀၀ – ေမာင္ေဇယ်ာ)

Lairawn Meifar
(225/500)

Comments

comments

Comments

%d bloggers like this: