Zofa Global Network Khawmpi Țhehsuak

IMG_541508033603059

Leitlun ramkip ih a rak um dah lo mi le an rak hmandah lo mi Leitlun huap zofa khawmpi cu thehfel a si thu thuthang kan ngah.

Zofa pehtlaihawknak a that sin theinak dingah le Unau kan si zia pumkhat ih kan langter thei vivo nak ding ruahsannak thawn Zofa Globle Network khawmpi cu kan dung November 20-21 tiang India le Myanmar ramri Zokhawthar ah neih a si thu thuthang kan ngah.

Hih khawmpi ah hin Mizoram lam ihsin Mino tampi ram ri ih an rat hleiah, Myanmar ram khal in Tedim unau, Hakha Unau (Lai Senno), Tahan A Group, Tahan B Group pawl khal in an telpi. Falam mi le sa pawl khal hih khawmpi neihnak dingah sawm an si nan, rem can lonak ruangah Falam aiawh ihsin feh thei lo in, Falam Phunsang Tlawngta Pawlkom hmin in, ahleice ih sawm mi in an telpi. Sim duhmi cu Falam mipi pawl le lungkimpinak ti siloin mikhual pakhat dinhmun in an telpi.

Hih khawmpi ahhin, ram hnih kom Hlasak thiam  pawl khal sawm tel cih an si.  Cumi sungah kan Chin mi hlasak thiam telpi tu pawl tla cu Salai Jesses Kipling (Krillung), Salai Hmingte @Kianghrol (Krillung), Mai Makim (Me & Ma Gril) Salai Philip Cung Lian Thawng, Salai Billy, Mai Cingpi, Salai Cingpi, Salai Van Siang Mang le Lalpanliani pawl tla an si. Awzai thawn lawng siloin awnmawi tumtu (Musicians) pawl Salai Peter Wright ih hohanak thawn an telpi.

Britist pawl in leitlun ralpi veihnihnak ih an suahsan hnu Chin mipawl cu ram 3 ah thek kan si.  Cui ramthum pawl tla cu India ram, Baladesh le Myanmar rampawl ah kan si. Cui a thek aw rampawl cu rualremnak a um theinak dingah le khat le kan thinlung muril sungah unau sulkhat suak taktak kan si timi langternak ding hrang hmuitin mi thawn tuah mi a si. Hmanseh hmuitin awk mipawl thawn a deng aw lo deuh a bang tiih felselnak tuah tu khal tawkfang nawn an um tiah thuthang kan ngah.

“Hi tivek rualremnak kan tuah hi cu a lungawi um nasa kan theih lo mi a si vek in phur zet in kan hlung. Hmanseh tui dinhmun cu Program vek in zianghman an feh ter nawn lo ih, an mah le an mah lawng ziangkim ah an duhsak awknak hi cu ka duh lo lawlaw” tiah Tripurah ih palai pakhat a si mi Muan cun The Chin Voice Media hnenah a sim.

Hlasak thiam tawkfang nawn an um nan Program tuah mipawl zoh tik ah a si dan vek in zianghman a feh thei nawn lo ih cu tik ah Chin Hlasak thiam tampi cu lungkim lo nak nei tu khal an um.

Hakha unau lam ihsin awzai lam ihsin palai a ratu Salai Billy khal cun, “Tuvek ih an tuah thil fehdan ding vek ih an feh lo tik ah Performance kan tuahnak ah kan feeling out theh nuam ding zat kan nuam thei nawn lo” tiah a sim.

Mipi tampi Chin ram ihsin a ratu pawl tla cun kan mipi awzai thawn ra hler dingih ra mipawl tha pe dingah tin, khawsik le dai tiamtiam lak ah an hngak rero ko nan zohman kawhsuak ti hi a um thei lo. Mipi pawl an cem ngah maw tilawngah Chin Hlasak thiam pawl cu kawh an si. Cumi thuthawn pehpar aw in fakselnak pawl khal a um hnuaihni.

“Tampi cu theih thiam ding a um ko. Ziangruangah tile a hmaisa ahcun Myanmar ram, Sagai Divisionah tuah ding tiih ruahmannak a um, cun remcang lonak ruangah Mizoram, Champhai ah an thin leh, cun a rem cang lo lala ih Zokhawthr ah bicilh tak in an run tuah leh. Ziangkimah an buai zet ding ti cu theihthiam an um tuk. Sinan ngaingai in cun tuvek ih mipi um nawn lo dinhmun ih mi an ko hi cu feeling out theh pan teh! Nan kan ni cu hna pakhat vek in kan ra tik ah kan hna timi cu theh ding kha kan tuan vo a si” tiah Mai Makim cun The Chin Voice palai pakhat hnenah a sim.

Falam vocalist pawl. Zuk; Jesse Kipling

Falam vocalist pawl.
Zuk; Jesse Kipling

Ziangtik ah in ko ding? Ziangtik ah kan can a ra sal ding tiih ngahk kuah ko tu Musicians lam ih Drumer Bo-Tought khal cun, “hivek ih rampi kom ih nan thei hi cu nan lungrualnak rori nan langter thei ih a lungawi um tuk. Program lam thawn pehpar aw in cun hmuhton tampi kan nei zo tik ah ka tha cu a nau cuang lo” tiah a sim.

Rualremnak kan tuah kan timi hi ziangvek in kan tuah, rualremnak kan tuah kan ti rero lai ah huattawknak a suak pang pei maw ti khal a pham um tuk. Duhsakawknak in rualremnak a suahpi taktak thei pei maw? “A thuhla ahcun zofa te in suih khawmna ti a si nan a ngaingai ah an duh taktak lo si ding tiah ka ruat men” tiah Musicians ih Guiterlist Salai Peter Wright cun a sim.

Hih lairelnak ih zaanhnihnak ahcun Chin mi hlasak thiam pawl cun can an neih mipawl cun hnuk dirawknak an nei thu Thuthang kan ngah. VIP pakhat a si mi Salai Philip Cuang Lian Thawng cun, “kan dungih ram thum kom tlawngta kawmpi ahcun inntek lam pawl cun VIP tin mikhual pawl cu kan theitawk in kan zoh ih, nuam tla kan nuam awk zet. Hmanseh tuvek ih kan mai can a thleng zo mi in ko lo ih, duhtawk ih in thawn sal hi cu poi ka ti. Cumi ruangih a tu vek ih kan can pawl cu kan hnuk dirawknak a si tiah a sim. Cui hleiah zaankhatnak pawl khal ah mipi zohman an um nawn lo hnuah in ko tik ah kan ni in le theih mi kan nei lo ih, an mah pawl khal in in thei lo cutik nuamawk ding zat cu kan nuam aw thei lo, kan mah le mah VIP tin kan ruat aw lo ih a zia um” tiah a sim.

“In rak sawm veten kan ni lam cu a hlawhtlingpi ding thinlung thawn kan ra ih, Zokhawthar YMA Hall kan colih cutin khual thlennak tla in zem. A can ahcun nauhak khawmpi zawhvek tla kan bang ka ti! Himi program thleng thu ahcun zohman ka hmawhsiat thei lo. Ziangah tile an tuan tla a tam tuk. Sinan kan lam ih hruaitu pawl hi tuanvo tumpi nei vek si in hitawk hmun thlenghnuah zianghman lairelnak an nei lo cu mangbang thlak zet. Ralleh lam ah kan tuah tik ah kan ni pawl cu a te bik in a tum bik tiang ramdang ihsin ra mi khual lian kan si mai. Thilpakhat um mi cu program vek in feh lo in le a dungih um mipawl ko theh tahran ih a  zaan hnih pum an tuah cu a dik lo deuh. Hitawk ih hla hungsak ding tla hi paih zet kan bang ka ti aw! Cun rualremnak thu ah kan ni  san thar ahcun “I am Ok! You are Ok” timi thawn lawng rualremnak a um thei” tiah The Chin Voice palai ih suhnak a tuah mi cu a let.

Ref: CV

(Visited 562 times, 6 visits today)

Comments

comments

Comments

%d bloggers like this: