Zo Si A Tthabik Theitu

October 31

Tlawngkai Nithum

 

Zo Si A Tthabik Theitu?

                                                           

Bible Siar Ding: Isaiah 40:12-17

 

Kan sia-ttha thleidan thiamnak thinlung in in mawhthluk hmansehla,

Pathian cu kan thinlung hnakin a tum deuh ngaingai ih

Ziang hmuahhmuah theitu khal a si, ti kan thei.  

– 1 Johan 3:20

 

Mi malte hrekkhat pawl khi an raalttha awter nawn paam – asilole dawt riam in an aa thladang ngah paam – ziangahtile “Pathian in ziang hmuahhmuah a thei thluh lo,” tiih an simrel ngam ruangah! Cumi cu atu tiang khal ah a cang rerolai ko. Kan aw suak in cu cuti cekci cun kan ttong lo men ding na’n kan nunzia le kan cangvaih daan in nitinte cuti vek cun kan nung ttheu a si. Pathian in i hmu lo hmang ti’n kan ruat ttheu si lo maw?

Pathian Thu in “tuah hlah” tiih in khammi (forbidden) ka tuah thotho caan ah siseh, “tuah aw” tiih thu in pekmi (commanded) ka tuah lo caan ah siseh, thungai te’n kan sim asile A tuahmi hnakin kan thei sawn ko si kan ti thawn a bang aw a si.

Bawipa ih Daan pawl hi mizakip hrangah a ttha cu kan ti, asinan kan kiangkap dinhmun le thil umtu daan a thlengh awk caan ah le danglam deuh hlekih a vung um caan ahkhin kan tahfung a thlengh aw ve ttheu. Kan hrangah thil tthabik in tuah sak dingin Pathian kha sim le zirh duhnak thinlung kan nei ttheu maw? Tahtthimnak ah, “Bawipa, himi hi ka hrangah a ttha sawn ding na’n,” ti vekin.

Profet Isaiah in, Pathian ih ziangkim theih theinak thu ah, milai ih bomnak zianghman a ttul lo thu thusuhnak tampi um theimi pawl kha thulehnak thawn a sim fiang. Tlang pawl ih saannak kan tah thei maw? Leivut khi kan suumpi in kan tah thei maw? Bawipa cu diknak cungcang ah teh ruahnak thuron kan pe thei maw? Pe thei lamlam hlah!

Tuih hnu hrimhrim ahcun zumtu thutak theitu cun kanmahte duhhrilnak kan tuah tikah kan cangvaihnak ih kan langtermi kha ciing ringring uhsi! Pathian thu kan thlunnak hi vancung ih um kan Pa cun ziangkim a thei thluh a si ti kan phuanlangnak tthabik a si.

Ziangkim theitu (omniscient) Bawipa, ka nunzia in na thuthluntu ka si lo zia a langtermi pawl parah in ngaidam hram aw. Nang cun keimah hnakin ka hrangih thil ttha Na thei sawn ti hmu fiang deuhdeuh dingin in bawm aw.

Pathian in ka hrangah tthabik dingih in remruahmi parah ziangmi zawnbik ahkhin A thu ngai loin ka thinlung sungah tthuktthun aw in ka um ttheu?

 

@Pennington

(Visited 24 times, 1 visits today)

Comments

comments

Comments

%d bloggers like this: