Zo Pawl In Thuthang An Tuah

Salai Lal Nun Uk

‘Uico in minung a keu le thuthang a si lo. Minung in Uico a keu lawngah thuthang a si’ ti’n an sim theu. Sihmansehla Uico in Daw Aung San Suh Kyi keu sehla cumi cu thuthang a si thei. Ziangah tile Daw Aung San Suh Kyi cu mi hminthang a si ruangah. Sile thilcangmi ta poh hi thuthang ah ngan a theih maw?

Ni tin te’n lamzin parah mi an pah aw, bazar ah thil leitu le a zuartu an to aw, cozah zung in cangvaihnak a phunphun an tuah. Cun zatlang pawlkom, le sakhua pawlkom in cangvaihnak le hmailam fehdan ding thuhla tampi an rel rero.

Himi thilcangmi tampi lakin mipi hrang hmual a nei bikmi thuthang lawng kan hril a tul thlang. Sile ziang tin kan hril ding? Ziangmi tahfung kan hmang pei?

Thu pakhat hi thuthang ih ngan dingah a tling maw, tling lo timi an tahnak tahfung pariat a um. (1) tu rori thil cangmi a si ding; (2) thilcang pangai a si lo ding; (3) casiartu thawn hmunhma in siseh, thisen in siseh an nai aw ding; (4) mi hminthang a si ding; (5) a hngongmi a kau ding; (6) mangbang khawp thilcangmi a si ding; (7) mipi elawk reromi thu a si ding; (8) thuthang dunghnu thlurhmi a si ding timi lak in pakhat khat a tel ding.

Thuthang pakhat hi tahfung pariat thawn milaw sehla elawk tam tul loin thuthang ca hmai phaw ih cuang cih ding a si. Thuthang pakhat hi tahfung zate’n tla an mil aw lo men thei. Cuvek in a milawk lo tam poh le cui’ thuthang cu thuthang ca kerkawm ih thulu cafang fate te’n an cuang ter theu.

Tu rori ih thilcangmi a si hmanah thilcang pangai a si ahcun thuthang ah ngan ding a si cuang lo. Thimnak ah lamzin parah bike an pah aw ti men cun mangbang khawp thilcangmi a tling lo. Ziangah tile lamzin parah nitin te’n a dim le a roh ti men an pah aw ringring. Cumi hmuahhmuah cu thuthang ah kan ngan theh cun kan casiartu pawl an ning zet ding. Sinan Tahan khawsungah bike an pah aw ih a hmunah a mawngtu le a phurhmi an thi cih tivek tla si le cu casiartu thawn an hmunhma in an nai awk tlunah casiartu in ka unau, sungkhat, ka mitheih an si maw timi theihhiarnak a neih ding tikah thuthang pakhat ah a tling. Sinan Tuluk ramah bike thawn an phah aw ih mi pahnih an thi timi thuthang cu kan hrangah thuthang maksak a si lo ding. Ziangah tile kanmah thawn hmunhma a hlat awk tuk ruangah si. Sihmansehla Tuluk ramah bike thawn an phah aw ih Chinmi pakhat a thi timi thuthang si sehla kanmah thawn hmunhma hla aw khal sehla Chinmi a sinak in kan hrangah cucu thuthang a tling thei thotho.

A tlun ih thu pariat lakah mi hminthang a si ding timi thu lawng kan relkhawm pei. Hminthang timi ah minung le hmunram ti’n phun hnih a um thei. Falam peng pakhat lawng ih kan sim a sile Rihli, Lailun le Surbung…. Tivek pawl an tel pei cu. Kan dung kum 2015 ah Lailun ih lungto kha bomb in an puah. Cumi thu cu thuthang ah kan ngan. Hmun dang ah tla lungto cu bomb puah in an lak theu ko nan thuthang ah kan ngan lo. Ziangah tile Lailun cu Laimi pawl kan suahkehnak a si tin kan urhsun zet ruangah a si.

Mi hminthang timi sungah Falam khawvel ah Lengzel (Love song)hla sak hminthang; Pathian thangthatnak hlasak hminthang; Evan. hminthang; Cangan thiam hminthang; Pastor hminthang; ramkheltu hminthang; thil dangih mipi kan theih larmi pawl an tel. Himi lakah zatlang mipi in celebrity pawl thu hi thu sia a si ah maw, thu tha a si ah maw theih kan cak. An cangvaihnak pakhat khat hi thuthang a si mei. Sihmansehla riahsiat za cu Falam media cahmai ah Laimi celebrity pawl ih thuthang in cahmai an luah thei hrih lo mi hi si.

Ramkheltu pawl cu media cahmai ah kan cuanter thei zo ih thil tha a si. Ramdang ahcun celebrity pawl ih fala le tlangval neih thu, an thuamhnaw hrukdan pawl tiang cat lo in siar ding a um. Casiartu pawl in kan thinlung ih kan ngainat mi pawl thuhla hi theih kan cak ringring ruangah Laimi celebrity pawl siseh, Evan. pawl siseh, Cangan thiam pawl siseh, Pastor pawl siseh an cangvaihnak pawl media cahmai ih cuang ding an si. Cumi cu thuthang ngantu pawl ih kan tuanvo a si.

Comments

comments

Comments

%d bloggers like this: