Zinglam Darkhing

Zinglam Darkhing

Zanlam ninu tlangah a liam
Ram kilkipih kaiva hramthiam
Phunkim le riakmawva lungleng
Zai-aw tlain lungsung a  deng
Tuanzai relnak zankhua a sim
Zalam fehnak zinpi a thim
Vanlai parih vanpuak situr
Phunkim leennak vanpi a dur
Totum zothli napin a hrang
Van khawri, tektla thawm a thang
Luanglu thluin thimpi a zing
Ih zai relin  mit ka vun sing
San ziangzat tiangkhal nungdam ning
Hnilh ngelcel zai ka rel lo ding.

Cucik awn-au khal um hlah hai
Daitei’ tintling par ka zau lai
ka hmaika ih thlengmi tihnung
Zanmang sebik tuksumza sung
Ka hmuh tonmi thin lau tertu
A maksak kthil tihnung bik cu
Dam sung ka tuahtuanmi fiang te’n
I zohhliahtu thihnak mitsen
Phenthlam bang len dimte’n a ra
Ka hringnun vakvai i thlingthla
Misual tiin tacik i khen
Ka thi i zuuk kang ding bang len
Hozum a suah a ha i lih.
Thihnak zalam tluanpi a khih.

“Khinah ! Khinah! Khi, Hell ramah
Fehzang! Zamrang! na thukthun hlah
Na ci tuhmi rah seng a cu.
Hremnak ramih luh ding na phu,”
Tiin rulhreng bang len a huk
Thihnak hriamnam phunkim a hnuk
A kebeu tiang a kawr a fual
Fihnungza pawl cennak thlanmual
Thihnak khurpi hmuahin a uk
Thihnak vaipuan dumpi a hruk
Somei bang len a mit a vam
Miruak hluanin a hmai a raam
San ziangzat tiangkhal nung dam ning
Hmuh hleihlo sal ka ngam lo ding.

Raisia suahnak dawium a phur
Vanpi cimding hluan khua a dur
I zoh zawngah nimthla a kau
Ka zohhliah le ka mit a rau
Lingpi a hnin ramkip a hngor
Tlangpi a min buainak a tor
Nunnak neimi pawlih ram sung
Harnak thim khawzingpi a tlung
Thlan sung khur thuk bikih tan tak
Miruak pawlih lungphang taprak
Zanih zuangmi ramhuai thla zap
Pawl khin cat lo’n ka lung i rap
San ziangzat tiang khal nungdam ning
Hmuh ngelcel sal ka ngam lo ding.

Thil dang aiin ka tih besia
Thia thlohthlo cingin ka hun bia
“Ka venghnen hrang thatnak ka tuah
Natnak tuartu hliamhma ka buah
Sualnak sungih tangmi ka suah
Misual hleice tla khi ka kuah
Pathian thangthat zaihla ka phuah
A thu thianghlim tla mi ka ruah
Ei ding harsa pawl khi ka cawm
Zonzai le hngaktah pawl ka hlawm
Pelh riai loin tuan te’n ka khawm
A khawm lomi tla khi ka sawm,”
Tiin tha bik bang ka hun pha
Vei hleinga in vei thawngzahra.

Lung duh loin a lu  i thin
“Misual hrokhrawl ka lo hminsin
Sualnak phunkim na thi’n a ciah
Ka thisen in na hmai na phiah
Zoh law! na hmin nganmi tumpi’n
A cuang, phat ding tum hlah,” tiin
Thihnak a kut dai pi’n a za
I zap, “Feh zang!” tiin, aiha!
Ka tih tukih ka hmai a dup
Zoh ngam loin ka hmai ka hup
Zaunak tintling par in ka raak
Zing khuavan ding cat lo’n ka hngak
San ziangzat tiang khal nungdam ning
Hmuh ngelcel sal ka ngam lo ding.

Sing thiam lo len lung i phan ter
Ka lukham hman verhra ka her
Thlanhri a put ka dang a ro
Tuar thei nawn lo’n dim ten ka tho
A eng ceumi ka sathau far
Kengin dimte’n ke cu ka dar
Ka theih dah kel lomi thuanthu
Ngannak bu-dum sahpi tla cu
Thlanhri phulsen tla ko ka siar
Ka tak pum te’n thlanin a ciar
Ka beidongin a net bikah
Ka sathau far kenmi ka thlah
San ziangzat tiang khal nungdam ning
Hngilhzai rel lai a theih lo ding.

I delhkilhtu cansia pawl hin
Tuksum thinnau le beidongin
I tuah, cauin ka tha a zawng
Ka hna sungah tahnak awthawng
Cat bang loin dimten a thang
“Sualnak thim sung tangih vansang
Hringmi zalam tluanih tawivak
Ka beiseinak le ka nunnak
lungsuing buainak thimzing sungin
Suahnak a um lo maw?” ti in
Dim thektho te’n hmur cu ka phun
Ka tha nau in ka lu ka kun
Ka ning a tih, ka hmul a ding
Hoi ngam lo len ka mit ka sing.

Thinphang le thlatemin ka um
Ka lungthin sung tapina hrum
Ka feh zalam tluanih cansia
Thihnak tursia aiin a kha
I delhkilhtu thihnak leiba
Ka ruah ahkhin ka lung a aa
Ka luak a suak ka awk a tok
Ka ning, ka fih, ka lung a hnok
Ka thla  tem in ka tuk a paw
Thin hnangamnak a um lo maw?
Ka hna ngamnak khuiah na zuang?
Zinglam arcang mawite’n a khuang
San ziangzat tiangkhal nungdam ning
Hngilh zai rel lai a theih lo ding.

A cu ti ka buai fang ahkhin
“Thinak na hmin ka malh,” tiin
Ka hna sungah awthawng a thang
Thlungdar awnmawi a iang ka hrang
Khuiah a um, khuiin a ra
Theih feng tumin fiang te’n ka hna
Ka thong. “Thihnak sungih ka hmin
Zei tin a malh sal ding,” tiin
Ka zoh fiangsal ka ca siarmi
Thil ra thlengmi a mak ka ti
Ka ringhlelih a tule tu
Siarin ka ruat a bu laimu
A dik ti thu ka theih fiang cun
Ka lunghnoin ka lu ka kun.

Biangno parin luaithli a luang
Mitthlam sungah fiangte’n a cuang
Tlangsang lerih taklawng thlaimi
Hremnak tuarin a tlai hnianghni
Vun dawn thul ing ka lungthli te’n
Hrinhniang lungmawng tualleng bang len
Hrenak tawpkhawk tuarin a thi
Thin hnangamnak tlangsang zilthli
Lungril sungah thiangte’n a hrang
Phannak thimzing hmuahin a kiang
Zinglam darkhing mawite’n a thang
Ka zuatza-ar khuan kim siar tiang
San ziangzat  tiang khal nungdam ning
Tih zai ka rel nawn lai lo ding.

S. Kei Uk

(Visited 77 times, 1 visits today)

Comments

comments

Comments

%d bloggers like this: