Zinghmuh Tlang Ramkulh Lentualhmun National Park Ah An Tuah Ding

Salai V Bawi Lian

May 22, 2017 Falam | Chin ramkulh ih Tlangsangbik pakhat a si vemi Zinghmuh tlang cu Chin ramkulh acozah in Ramkulh Lentualhmun (National Park) ah tuah dingin Chin ramkulh Chief Minister Pu Lian Luai le a kaihruai mi tlangbawi upa pawl cun an haal thok. Hi hmun hi Chin ramkulh ih pengkulh pathum Falam, Hakha le Thantlang pawl ih ramri sihcihawknak hmun pawl an siih hmunkhat ah pehzomin tuahtum a si.

Zinghmuh Tlang | Zuktu – Pu Dar

 

A kauhlam Acre 20000 tluk ih tuum cu humhual dingin Chin ramkulh acozah cun tuini May 22, 2017 ah hmun zohfelnak an nei. Falam Municipal Chairman, Pu Dar cun hi hmun an zohfel mi thu ah Chin ramkulh CM Pu Lian Luai ih kaihhruainak thawi tawlrer rero mi ah Chin Hluatdaw Chairman hotu Pu Zo Bawi, Myanmar rampi Vice President Pu Henry Van Ṭhio khalin thazaang an pek zet tiin a ti.

‘Kiangkap um khua le ram pawl hrangih harsa silo dingin, an rantlahnak le an eiin hawlnak hmun pawl siatsuah lo dingin le mipi pawl harsatnak peklo dingin tawlrel rero a si’ tiin Pu Dar, Falam Municipal Chairman cun Chinland Today Media hnenah a sim. ‘Pastor zate, Party zate, NGO le CSO zate le Cozah hnaṭtuan le mipi kan zaten thinlungṭha le ruahnakṭha thawn kan zuam cio ding. Hi National Park sunmang le tumtahnak hi kum reipi rak man ciomi a si ih tu kan Cozah le kanmah san cio ah hin tuah suak ding ṭuanvo kan nei’ titla in a sim.

Hi an zohfelnak hmun Zinghmuh tlang cu; Falam peng ihsin Dokṭhek, Ṭaal, Ramthlo, Tlangzar, L.Zamual, Rulbu, Hrianghnang ram pawl, Thantlang ihsin Sihcaang le Lungzarh ram Hakha ihsin Chunchung rampi pawl an kulh ding. Timit le Laivaa tivahnaa pawl khal a huap tel thluh cih ding.#

 

(Visited 336 times, 1 visits today)

Comments

comments

Comments

%d bloggers like this: