Zin Dang Sawnin

Zin Dang Sawnin

(The Another Way by Terry Dobson)

Lettu : JC Kip Ling

Tu cun patar ttawnttai ka si thlangiih, ka suakthuan tthat lai kum 20 mi hrawng ka si lai, Japan ramih ka thil tonmi khan ka nun ah tuini tiang thu a rel ringring. AIKIDO zirin kum thum sung rori Japan ah ka khawsa ih ka zirnak khal hlawhtling zetin ka tthehfel.

Ni khat cu tlangleng kan to laiah pa tum tiangtiang hi kan khaan ah a ra lut. Zu a ri besia ih, mi tawh ding hawlin a hrangkio zok rero. Ka pawnih nupinu nau-no pom lai cu a thehpet vurvo hnuah nutar pakhat vun sit a tum hrih. Sinan, cui nutar cu a rak kiang lohli.

AIKIDO zir ttheh pek tha za ttiattia, ka thiamnak show hiar dohdoh, tifam cu ka thin in a tuar nawn lo. Vun laklawk ih a tom tih hlon ka nuam thlang. Hmansehla, ka sayapai’ i simmi “AIKIDO  hi rualremnak zin zawhnak a si, thahrum thawh tum pohpoh cu AIKIDO  ah an ong lo tinak, cuvek thinlung nei cu mi ttawnttai pawl umdan a si,” a rak timi kha ka vun mangsuak dukdi ih ka thin ka sup thei sal hram.

Sikhalsehla, zuripa cu mangmittokza hi a siih, midang a tuahmawh pang ding ti ka phang fawn tikah ka thin tuar lo cu, vun nuai manin ka hung ding. Annih khal cun lakawk man herher in i ra pan turto. I tham zawngah rak nuai nek keng khaw tiih ka rak nawpawk laifangah ring zet le fiangfel zet, “Nang kha hinah ra hnik,” ti aw ka theiih kan pahnihin kan hoi rual vukvi. Ka kehlam ka hoi ih, zuripa cun a vawrhlam a hoi ve. Kan pawnih rak um patar kum 70 mi hrawng hmaiah kan rak ding ringring hi a rak si. Patar cun a zaa zap phahin zuripa cu, “ Ra awla, ka kawmah hin ra to hnik e, thunuam kan rel pei,” tiah zaangkhai fahran hin a run sawm.

Zuripa khal cun, a ziang thuthok ah henha, a kut dungsih feufeu in a va pan luamlo. Ka thinhrip cu a nung thotho ih, cui patar cu a thong ciamco pang dah pag kei tiah ralring cia in ka rak zoh ringring. “Na ziangnakah ha nang patar hin i kawh?” ti phah cun a va naih vivo. “Ziang zu saw na in i?” tiah a rak sut. “Ziang zu khal ka va in tak le, nangih theih a ttul ngelcel a sawm?” tiah aw-hro in a vun let. Patarpa cun thinthir riai lo mithmai thawn, “A ziangha maw, kei khal Saake cu ka duh thihrulh si lawm, a thaw ho khaw, ti aw? Kum 76 mi ka nu thaw hin zan tinte kan in tlang ttheu ih, thla-eng lawm phah tlain kan in ttheu, a caancaan ahcun  titi thunuam rel phah tla’n, khuimawcang ahcun nitlasur cuan phah tlain. Ka pai’ in rohta mi kan thingkung duat zetmi PERSIMON cuan phah tlain kan in tlang ttheu. Tui kum thlatang mithi rimnam vohvo ah tla le kha cun khawsik in a hmetthat ding hmang tiah kan thlaphang zet ih, a ra cerh sal thei nerno cu kan lungawi dan hman. Kandungte ih ruahsur thlurthlo khalah khan a kiangah kan dingih ciin thlekthlek cingin kan cuan cuahco silawm,” tiah a rak ruah kurhko.

Zuripa cun awnai loin a rak ngaiih, nuamte tei’ a kuttum phawih hrethro phah hin, “Kei tla PERSIMON  cu ka ngaina thei zet si,” a run ti phuatphi.

“PERSIMON  cu a mawi hongei ti aw! Na nupi khalin mawi a ti zet lo sawm?” tiih a vun sut cu zuripa cun ttah-aw le lungzur fahranin, “ Ka pu, ka nupi cun i thihsan zo ih, nupi dang ka nei nawn hrih lo. Hnattuan khal ka nei loih, inn le lo khal ka nei fawn lo. Hiti hin zahpium zetin zuri na’n ka vaktawi rero men a si hi,” a ti zawng le a hung ttapsuak ih, mitthli rualriat thawn a nguk hrunhro.

Suakthuan thaza, cakawter tak cu leisin bihih ningzakin ka ding ngernger.

Kan tlangleng tomi cu a dingih, ttum dingih ka pawh zawngah ka vun dungleh cu zuripa kha patarpai’ kawng lukhamin a rak it. Patarpa cun a lu rak zut diahdo pahin, “Na lusun thuhla cu a hramthokin i vun ruah hnik e, rak ngai keng khaw,” tiah a rak be rero hi ka vun thei ta.

Tlangleng a tlanliam hnu’n tlangleng cawlhhmun ahcun ka to ih thu tintian ka ruat, ka khawruahnak cu a vak-hla vaih. Thahrum thawhih nuaidaih ka rak tum laiah aw-ka nem cun i rak neh khelh ngah riai. AIKIDO ngaingai, duhdawtnak parsuak cu ka mit rori’n ka hmuh thlang!

Khaisi khan lungput thar in ka AIKIDO zirmi cu ka hmang thok ve thlang.

Source : Chicken Soup for the Soul

(Visited 55 times, 1 visits today)

Comments

comments

Comments

%d bloggers like this: