Ziangvek Nikhua Khalah

March 25 

Tlawngkai Nithum

 Ziangvek Nikhua Khalah

 Siar:Tirhthlah 18:9-11

 San a cemlai hlan lo nan hnenah ka um ringring ding,” tiah a ti.-Matthai 28:20

 Kumkhat Sung Baibal:   Joshua 19-21   Luka 2:25-52

Jesuh in A dungthluntu pawl a thlah tikah hiti’n thukamnak a pek hngai, “San a cem tiang nan hnenah ka um ringring ding” (Matt. 28:20). “Ringring” timi ttongfang hi Greek Bibal thiam pawl Jamieson, Fausset, le Brown ih an simnak ah, “Ni hmuahhmuah ah” (all the days) tican a si an ti.

Jesuh in, “ringring” lawng a ti lo, “ni hmuahhmuah ah,” a ti. Cumi in kan cangvaihnak hmuahhmuah; thu ttha siseh, ttha lo siseh kan kiangkap thuhla, nitin ttuanvo phunphun kan neihmi le buainak siseh lungawinak siseh a tel ttheh.

          Kan Bawipa cu ziangvek thil a ra thlen khal le kanmah thawn a um. Lungawi ni le riahsiat ni, dam ni le dam lo ni, hlawhtlin ni le sunral ni khalah kan hnenah a um ih thazaang in pe, in duhdawt. Zumnak, ruahsannak le duhdawtnak thawn in khatter. A thlangam daihnak le humhimnak sungah in tuam ruangah kan raal, kan ttihnak, kan tuarnak le kan rinhlelhnak pawl an hlo. Ziang tivek dinhmun ih kan um hmanah tuar theinak thazaang kan nei. Ziangahtile Paul hnenah, “Na hnenah ka um a si” (Tirh. 18:10) a ti bangin Bawipa cu kan hnenah a um.

           Na man lolai ah cawl ta awla, “Bawipa cu hinah a um,” tiin Pathian ih umpinak thei dingin zir aw. Hmuh thei lo Pathian hmu dingin thlacam awla nitin zoh aw.

 Mit hmuh lo Pathian ih umpinak in i hnem,

Ka kiangah a um ringring ti ka thei;

Buainak in i kulh tikah,

“Ka faa hinah ka um,” in ti.

 

Ton theih a silai ah Bawipa cu hawl uh,

A nailai ah Amah ko uh (Isa.55:6).

Comments

comments

Comments

%d bloggers like this: