Ziangtin Hnangamdaihnak Kan Tep Ding

              ZIANGTIN HNANGAMDAIHNAK KAN TEP DING

Dr. Timothy Sui Lian Mang

Cang Hril : “Maw Bawipa, daihnak famkim cu nangmah in na  pe, an  tumtah mi ah a   hnget mi le nangmah a lo ringtu hnenah cun!” (Isa. 26:3).

Hih thutiamkam hi Israel mipawl mangbang vansang ih an um lai canih pek mi a si, curuangah tuisun thinpihnak le riahsiatnak tampi in in nuai can ah le dawnharnak, ṭihnak le rinhlehnak ral tumpipawl pathum thawn thlaphang ih kan um lai canah in bawmtu ṭha a si ding ti a langfiang.   Ziangkim a ṭhat lai le van khal a fai laiah cun hi Bible cang hi puan zetih siar men a awlte; asinan harsatnak, beidawnnak, ṭihphannak le thinlaunak khawdur in kan van a khuh thluh ih, boruak ni a hung thim tikah cun hih ṭawngkampawl hi kan hrangah a sunglawi zet mi , a hlu zet mi ah a cang. Lei taksa thawn kan um sungah buainak ihsin luatnak ding thapeknak Bible sung khui hmanah thutiamkam a um lo; asinan cu hnakih thil ṭhasawn a um – buainak sungih kan um laifang khalih hnangamdaihnak thutiamkam a um. Sung lam hnangamdaihnak neih lo pi cun buainak sung ihsin luatnak cu ziang saw a neih ding?  Ṭihnung zet mi doawknak lakah le thlisia phusing a hran laifangah Pathian rinsantu cun sung lam hnangamdaihnak, nun muril thlangamnak le pumhlum rinsanngamnak a hmu ding, ziang tluk duhnungza nun so a si!

1. KAN HNENIH IN PEK MI HIHTHLAWSUAH ROPIZET CU ZIANG A SI?

Cumi cu “Hnangamdaihnak famkim” tiih tarlang a si. Asinan hnangamdaihnak famkim ti mi cu ziang a si? Cumi cu kan simfiang thei maw? Simfiang thei e, cumi cu sung lam nun hnaihnawknak ihsi zalennak dinhmun a si; cumi cu sung lam nun remtei ukawk famkim a si. Hebru ṭawngfang “Shalom” ti cu harhdamnak a ṭha ti relnak a si, curuangah hnangamdaihnak famkim thawn khat ti cu thlarau lam harhdam le sung lam  nun remawklonak hmuahhmuah ihsi zalen tinak a si. Hnangamdaihnak thawi a khat mi nun sungah thikthusiatnak, iksiknak, diriamawklonak, supawk thei lonak, ṭanghmasialnak, hngalnak lole hmual tuar thei lonak pawl hrangah hmunram a um lo, ziangahtile hipawl hmuahhmuah cu thinlung sung hnaihnawknak suaktertupawl an si.   Pathian ih pek mi hnangamdaihnak le a zangfahnak thawi kan tawnteh mi hnangamdaihnak cu  nun ih um taktak mi a si.  Thu a pek ih a daihreh mi hnakih ropi mi thil dang a um lo. – Mar. 4:38 zoh aw. Pathian in amai pek mi “Hnangamdaihnak famkim” hi hnangamdaihnak tin a ko. Famkim a sinak cu ziang mi bikah a si|?

(1)  A TLINNAk ah a famkim; sim duh mi cu, hnangamdaihnak phun khat a sinak ah a famkim. A famkim lo mi hnangamdaihnak a um, ṭhimnak ah “theihlonak” ruangih hnangamnak, ziangkim a tluangin a ṭha ṭheh tiih kan ruah lai ah, thungai hmu thei dingin kan mit vanter si sehla ziangkim hi a rak ṭha thluh naisai lo (Jer. 6:14). Cangvaihnak um lo ruangih a famkim lo mi hnangamnak ti khal a um; tikhur sung ih tidai cu dai zirziar le daiten a um men thei, asinan a tang lamah ciarbek thawn a hring le a ṭawtthu in a um. Nupinu le pacangpa tampi cun cuvek hnangamdaihnak men lawng kha an thei. Ni khat khat ah Pathian thuṭhennak in an tikhur cu hninter sutsi pei khaw, hnangamdaihnak diktak an neih lozia an hmufiang ding. Ziangmaw parih ṭhumawk ruangih a famkim lo mi hnangamdaihnak khal a um, cumi cu thil pakhatkhat lole mi pakhatkhat rinsannak ruangih hnangamdaihnak a si. “Thilri” cu a siat thei, cule minung khal a thi thei! Curuangah ziang tluk thindirem um loza a si. Asile an hnangamdaihnak cu khuiah saw? Hi a famkim lo mi hnangamdaihnakpawl  kawkalh zawngin Pathian ih a famkim mi Pathian-ih hnangamdaihnak cu a si.

(2)  A TAM, A MAL lamah a famkim; sim duh mi cu, cui hnangamdaihnak pek mi cu hai a daih, cule kan ṭulsam mi cekci a phuhru thei. “Hnangamdaihnak famkim” ih a peksal mi cu “Hnangamdaihnak, hnangamnak” a si, thuah hnih hnangamdaihnak a si. Hihi Filipi 4:7 kan kau tikah a thupi zet, ziangahtile cui Bible cang in thuahhnih hnangamdaihnak ti cu thinlung hnangamnak le ruahnaklungthin hnangamdaihnak a sizia in sim ih, cumi cu kan ṭul mi hnangamdaihnak a si. Hih thuahhnih hnangamdaihnak cu a sinak khalah thuah hnih a si: (i) Pathian thawi remnak (Rom. 5:1) le (ii) Pathian-ih hnangamdaihnak (Fil. 4:7) tiin.

(3)  A HMUN RINGRINGNAK ah a famkim; sim duh mi cu, cui hnangamdaihnak cu a thlengaw dah lo mi le cawl dualdo lo mi a si. Thutiamkam,“Na kilveng ding…” tiah a ti-Sam 121:4 thawn khaikhin aw.

II. ZIANGTIN HIH A FAMKIM MI HNANGAMDAIHNAK HI KAN                           HNENAH A RA?

(1)          Jesu Khrih in. Filipi 4:7 kha vun kausal awla, Bawipa Jesu Khrih cu titler, amah ihsin Pathian-ih hnangamdaihnak kan nunnak thlarau ih a luan thu kha hminsin aw. Himi sung lam hnangamdaihnak cu khristianpawl lawng ih neih mi a si. Khrih a neilotupawl le rundamnak hrangih Khrih-ih hnaṭuan ṭheh cia mi a rinsanlotupawl hrangah cun hnangamdaihnak a um lo. Sung lam hnangamdaihnak a thupte le dimteih kan hna ih in runsimtu cu “Jesu Khrih thisen” a si (Kol. 1:20).

(2)          Thlarau Thianghlim in. Bawipa Jesu Khrih in kan hrang hnangamdaihnak cu Kalvary tlang Kraws parah in ngahsak, cule cui hnangamdaihnak cu titler vekin amah ihsin kan hnenih pek a si; asinan cumi cu Thlarau Thianghlim in kan thinlung le ruahnaklungthin ah a run thlen a si – Gal. 5:22 zoh aw. Thlarau Thianghlim in kan nun a khahter le a luanliamter bangin, amah cun kan sungah mangbanza rah a suakter a si.

(3)          A  kamsuak thu in. Sam 119:165 ih thutiamkam ropi zet kha vun zoh aw. Thilri le milai cun in hnaihnawk leuhleuh thei, cu lole baibah ko khal in tuah thei men, asinan Pathian kamsuak thu a duhtu, a ruattu le a thluntupawl hrangah  hnangamdaihnak  thutiamkam a um.

(4)          Thu kan lunnak in. Pui. 26:3-6 zoh awla, athupibik mi ṭawngfang “asile”ti kha hminsin aw. A dan vekin kan nung ih, a thupekpawl kan thlun asile, kan thinlung cu hnangamdaihnak famkim in in thuam ding; kanmah lamih ti ding mi mawhphurh kan ti asile Pathian in amai ṭuanvo cu a tisuak ve ding.

(5)          Thlacamnak le thangṭhatnak tampi in. Filipi 4:7 ih thutiamkam cu cang 6-nak ah milai lamih ti ding mipawl a rel hmaisak ruangah, cang 6 kha kan tisuakta a ṭul tinak a si.

III. A FAMKIM MI HNANGAMDAIHNAK KAN NEIH THEINAK                        DINGAH THIL PAHNIH TARLANG A SI

Zovek saw Pathian in hnangamdaihnak ih a thawm ding mi? A pakhatnak ah cun (1) “A ruahnaklungthin a hnget mi” le (2) “Nangmah a lo rinsantu.” Himi pahnih langternak hin zumnak a sawhkhih, asinan pakhat cu lu lam (thluak lam)ṭawngkam a si ih, culaiah pakhat deuh cu thinlung lam ṭawngkam a si. A bangawk lonak ziang a si? Kan lu in kan zum ih, kan thinlung in kan rinsan; kan lu in Pathian cu hnangamdaihnak famkim semsuahtu a si ti kan zum ih, kan thinlung in a thutiamkampawl a peksuak ti kan rinsan.

Thukharnak ṭawngkam khat in: Isaiah 26:3 hi Pathian thawn a thawk ih, Pathian thawn a cem; ‘Nangmah’ ti thawn a thawk ih, ‘Nangmah’ ti thawn a cemsal – Rinsantu nun cu a karlakah a feh. Hnangamdaihnak famkim cu himi ṭawngkam pahnih karlakah fehtlang tahratin cutawkih umta cih cu a si; hnangamdaihnak famkim cu Bawipa amah rori kan sungih a um kha a si, nun ih tawnteh menmen a si lo, thurin menmen khal a si lo, Bawipa amah rori sawn kha a si. Cule hla phuahtu in, “Jehovah parih kan cawlh tikah,” kan thinlung cu malsawmnakin a khat ding ih, cuticun amah ih in tiamta mi – “A famkim mi hnangamdaihnak le cawlhhahdamnak” kha kan hmusuak ding,” a ti vek kha a si.

  *****

(Visited 38 times, 1 visits today)

Comments

comments

Comments

%d bloggers like this: