Ziangtik Hmanah timi Ziangtik Khalah Ttong Hlah

May 29

Zarhte Ni

‘Ziangtik  Hmanah’ Timi

‘Ziangtik Khalah’ Ttong Hlah

Siar:

Tirhthlah 9:1-22

An pumkhawmnak Sinakok Inn pawl ah a va feh ih “Jesuh cu Pathian Fapa a si,” ti thu a sim.     -Tirhthlah 9:20

Kumkhat Sung Baibal:

–   2 Sansiarnak 7-9

–   Johan 11:1-29

Ka rualpi pakhat thawn khuahlan ih Berlin phardawl kiang kan feh rerolai ah, “Himi hi ka nun sungah, ‘ziangtik hmanah’ timi ttongfang hi ‘ziangtik khalah’ ttong hlah, timi hmun pakhat a si,” tiah i sim. Hih phardawl in Berlin khuapi tthen hnih ah tthen in ram pahnih a rak siterlai ah Nisuahnaklam Germany ram ih kawhhran thazaang pe dingin vei (12) lai a va tlawng. Ramri kiltu raalkap pawl ih kaih le thawngthlak, thusuh le hnaihnoknak a ton ttheutu thu pawl tla i sim.

1988 kum ah a faate tleirawl pawl kha Nitlaknaklam Berlin ah a hruai hngai ih, “Hih phardawl hi tthate’n zoh uh; ni khatkhat ah nan faale pawl hitawk hmun ih nan rak hruai leh tikah hih phardawl hi a um ringring lai ding,” tiah a ti hngai. Cuti ih a sim hnu kum khat ah phardawl cu an bal.

Tarsus khua mi Saul in Jesuh dungthluntu pawl a hrem hngai tikah himi pa hi ni khatkhat ah Jesuh ih dungthluntu a si leh ding ti zohman in an ruat dah lo. Sihmansehla Damascus khuahnar ah Jesuh thawn an tong aw ih a mit khua a hmu nawn lo (Tirh. 9:1-9). A nunnak a thlengh awk hnu ni rei lote ah Damascus khua sungih Sinakok pawl ah Jesuh cu Pathian Fapa a si thu a sim ih a theitu hmuahhmuah cu an mang a bang ttheh (cc.20-21).

Mi heerzet ih kan theih mi pawl nunnak ah Pathian ih hna a ttuan tikah, “ziangtik hmanah a si dah lo ding,” tiah ti ding a si lo.   –David McCasland

Pathian ih huham cu rikhiah sak a theih lo,

Na ruahmi pawl cu thilcang theimi an si;

Curuangah nunnak ih thlengh awknak a ra thlen tikah,

A cang thei lomi zianghman a um lo ti kha ruat aw. –Sper

Pathian in a tuah theimi a tuah tikah,

ziangtik hmanah a cang thei lo ding ti hlah aw.

(Visited 19 times, 1 visits today)

Comments

comments

Comments

%d bloggers like this: