Ziangruangah Buaithlak?

June 18
Tlawngkai Nikhat

Ziangruangah Buaithlak?

Bible Siar Ding: Puithiam 19:9-18

Zo ih par hmanah phuba la hlah; mi na huatnak khan a thinlung sungah taapter ringring hlah; nangmah le nangmah na duhdawt awk vekin midang duhdaw ve aw. Keimah cu Bawipa ka si.
– Puithiam. 19:18

Bawipa in khuahlanlai Israel mi pawl hnenah thlun dingih a rak pekmi daan pawl thu ah, mihrekkhat pawl cun, “Ziangruangah buaithlak?” ti’n ol-aizet in an thinlung sung te’n an sut duh men ding. Bawipa in daan terek te tiang an thlun dingah a duh a si. Pakhat le pakhat an pehtlaih awk ding daan tiang a tel, asinan atak in an thlun maw?

Yahweh Pathian in A minung pawl pakhat le pakhat pehtlaih awk tikih an thlun dingah a zirh hngaimi hi a duhsannak a um. An nunzia in Amah ttihzahnak an langter ding a duh. Hih a khaanpi (Lev. 19) sung lawngah Pathian in, “Keimah cu Bawipa ka si,” timi ttongfang hi vei hleinga rori a nolh cingcing. Pathian in A mi Israel mi sungah A Hmin a ret, ih a mi pawl in an tuahnak kip ah Amah an upat ding a ruahsan. Miharsa zawnruahnak, dingfelnak, diknak, ngaidamnak, le duhdawtnak tivek pawl cu Yahweh Pathian ih minung a simi pawl cun an nitin nun ih an langter ding hrimhrim a si.

Bawipa in tuni tiang khalah kan pehtlaih awk daan zoh in, zo ih taa kan si timi langter ding in duhsak lai thotho a si. Jesuh in a dungthluntu pawl hnenah, “Pakhat le pakhat tlun ah duhdawtnak nan neih ahcun zokhal in Keimah ih dungthluntu nan si kha an lo thei ding a si,” tiah a ti (John 13:35). Kanmah in kannih cu Christian kan si ti’n sim hlah sehla mi in kan nun zoh in Khrih ih dungthluntu kan sinak an theithiam pei maw?

Yahweh Pathian ih minung kan si ahcun leilungmi in pakhat le pakhat kan pehtlaih awknak daan in zohnak ihsin in theithiam mai ding a si.

Yahweh Pathian, ka mi pehtlaih daan ihsin Na taa ka si zia langter thei ka duh. Nangmah ih i pehtlaih bangin midang ka pehthlaih theinak dingah i bawm aw.

Kei cu Yahweh Pathian taa ka si ka ti vekin
tuni ah midang pawl ziangti’n ka pehtlai ding?

@ Ava Pennington

(Visited 23 times, 1 visits today)

Comments

comments

Comments

%d bloggers like this: