Ziangah Rong A Um?

October 12

Tlawngkai Nihnih

Ziangah Rong A Um?

Siar:

Saam 19:1-6

Van pawl khin Pathian sunlawinak an sim ih, tlolak kaupi cun a kutsuak an langter. Saam 19:1

Kumkhat Sung Baibal:

Isaiah 39-40

Kolose 4

Thlatang caan (autumn) ah ziangruangah thinghnah pawl hi an rong (colour) phunkim: a sen, lingmaw, aihre ti’n thlengh aw tahrat in an ttil si pei? Thingkung pawl cu fuur ah an hnah a hring (green), ziangahtile thinghnah sungih a kopmi chlorophyll timi in nitleu ihsin a rami a sen (red) le mepian (blue) rong a hawp. Thinghnah ihsin a feh saalmi tleunak cu kan mit ah a hring rong in a lang.

Chlorophyll timi cu reipi a daih lomi thil a si ih a tleuzetmi nitleu in zamrang te’n a siatter. Curuangah thingkung pawl in thli an hawp ih an suah saal ringring. Hiti ih hnattuannak cu thlatang ni tawi le zaan dai tikcu in a hnaihnok. Chlorophyll a cem tikah thinghnah hring pawl cu an mal vingvo. Thinghnah hrekkhat cu chorophyll a cem tikah a hring rong ihsin aihre (yellow) rong ah an thlengh aw. A dang pawl cu an hnah sungih a ummi thanthling vek a thlummi ruangah a sen ah an cang, chlorophyll a cem vingvo tikah rong dangdang ah an cang.

Kannih tla ziangah sipei rong kan nei ve? Thuhrampi ngaingai cu a um lem lo a bang. Scientist pawl khal in an theifiang thei thluh lo. Ziangahso kan mit sungah rong tampi zuk vek cosangtu a um ih khua in hmuhter thei?

Pathian ih tthatnak hi A sersiammi ah a thupibik in a lang ti’n ka zum. Amah cu “Mi hmuahhmuah parah a ttha; A tuahmi hmuahhmuah tlunah lainatnak a nei a si” (Saam 145:9). Ka lungawinak famkimter dingin leilungpi hi rong phunkim in a ceimawi. Amah cu cuvek Pathian a si kha na thei maw.    – David Roper

Pathian, ziangtinkim sersiamtu ih,

Ttong suaknak ihsin mawinak hram a thok;

Cule Amah in rundamnak sunglawi in pek,

A Fapa neihsun ih raithawinak sung ihsin.   – Hess

Pathian ih sunlawinak cu a sersiamnak in a tleu.

(Visited 21 times, 1 visits today)

Comments

comments

Comments

%d bloggers like this: