Ziang kan kai hnget ding?

March 3

Tlawngkai Nihnih

Ziang kan kai hnget ding?

Siar: 1Timote 6:11-16

Zumnak hrangih do awknak ahhin na tha neih patawp suah aw. Theihpitu tampi mit hmuh ah na zumnak felfaizet ih na rak phuan tikah Pathian ih a lo kawh sannak a simi kumkhua nunnak hi kai hnget aw. -1Timote 6:12

Kumkhat Sung Baibal:    Mipumsiarnak 28-30

   Marka 8:22-38

Tolkien ih Lord of the Rings timi zuknung sungah Frodo cu a thin a hartuk ih a rualpa Sam hnenah, “Himi cu ka tuah thei lo,” tiah a sim. Sam in, “Thuanthu makzet sung vek a si ko… Thimnak le ttihnunnak in a khat. Cumi thuanthu sungih mi pawl cu dung kir theinak caan tampi an nei na’n kir loin an feh rero. Ziangahtile kaihhngetmi an nei,” a ti tikah Frodo in, “Kan kaihmi cu ziang a si?” tiah a sut.

Himi thusuhnak hi kanmah te kan sut awk ve ttulmi a si. Thimnak huham in in nen ih thinharnak in kan um tikah Paul in Timote ruahnak a pekmi hi kan thlun ve dingah a ttha. “Zumnak ih tlan zuamnak ah na tha neih patawp suah awla kumkhua nunnak co dingin zuam aw” (1Tim 6:12).

Nunnak raal kan do tikah siatnak cu tthatnak in a netnak ah a neh ding timi le nikhat ah kan Bawipa le in hruaitu cu hmaiton in kan hmu leh dingih Amah thawn kumkhua kan uk tlang ding ti ruahsan uhsi! Rundamnak hrangah Jesuh na rin ngam ahcun nehnak hrangah tiamkammi na si ih thuanthu maksak sungah na tel thei ve.

                                                                              Nun harnak sungah derdai in um hman ningla,

Pathian huham cu ka kaihhngetmi a si;

Ka sung ka leng ihsin Amah in nehnak i pe ding,

Hlawhtlin theinak hrangah nehnak thazaang i pek.

 

Vancung nehnak thawn tahtthim tikah leitlun harsatnak cu an fate.

Comments

comments

Comments

%d bloggers like this: