Ziang Ka Tuah Pei?

February 3

Tlawngkai Nithum

Ziang Ka Tuah Pei?

Siar:

Jeim 1:21-25

A thu kan theih taakah a tawk ko ti men in nanmah le nanmah bum aw hlah uh. Nan theihmi kha a tuahsuak tum uh. Jeim 1:22

Kumkhat Sung Baibal:

–   Suahlannak 31-33

–   Matthai 22:1-22

Kum reipi ka rualpi ttha le ka thuron a si mi pa in, Baibal ka siarmi hi keimai’ bulpak nunpi dingah a si tiah in sim ttheu. Theihnak ihsin atak ih nunpi ding a tumtahnak parah ka lungawipi. Ziangahtile Baibal hi kan siar, kan rel tlang, kan zir ih kan ngan nain thutheihnak ding men in kan ruat.

Oswald Chambers in, “Pathian faate pawl hrangah thil maksak theihtuk hi ttih a nung. Mangbangza a cang ngaingaimi thil, kan sim nain kan nunnak ah langter ding kan hngilh ttheu. Thudik hi kan sim ringring ruangah kan nunpi cih a si, tiih ruah sual a olte,” tiah a ti.

Jeim in raalrinnak in pek, “Mi a luattertu a famkimmi daan kha felzet in a ruat ringringtu cu a thei mentu le a hngilhtu men si loin a tuah suaktu a si, cuti’n a tuah suak ruangah Pathian ih thluasuah mi a si ding,” tiah a ti (Jeim 1:25). A thupimi cu ziang kan sim, ziang kan ngan, ti si sawn loin ziang kan tuahsuak, timi hi a si sawn.

Pathian Ttongkam kan siar tikah kan suh awk hmaisabik dingmi cu, “Himi thu hi ziangti’n ka sim pei?” ti si loin, “Himi hi ziangti’n ka nunpi pei?” ti a si sawn.

Pathian Ttongkam mi zirh ding kan duh,

“Amen, a dik,” kan ti;

Hmanseh, kan hrangah malte lawng a tthahnem,

A duhnak kan tuah lo ahcun.

Thungainak thawn hmailam kal khat feh cu

kum reipi A Thu zir tlukin man a nei.

(Visited 22 times, 1 visits today)

Comments

comments

Comments

%d bloggers like this: