Ziang Hmuahhmuah Hnakin A Cak Sawn

August 15

Nipi Ni 

Ziang Hmuahhmuah Hnakin A Cak Sawn 

Siar:

Saam 93 

Bawipa cu siangpahrang a si. Sunlawinak huham in a thuam aw ih thazaang cahnak in a khat.    – Saam 93:1 

Kumkhat Sung Baibal:

–     Saam 91-93

–     Rom 15:1-13 

Brazil le Agentina ramri ih a ummi Iguazu tlaser cu peng 1.67 a saumi Iguazu tiva ih tlaser 275 lakah zoh mawizet pakhat a si. Brazil ramlam kap ihsin a rami tlaser pawl ih aw hi Saam 93:4 ih, “Bawipa cu vancung ah uktu bawibik a si. Tipithuanthum ih huuk aw hnakin a nasa sawn ih tifinriat ih tisuar hnakin a cak sawn,” timi vek a si. Pathian ih tumzia cu, “Pathian cu kan harsatnak hmuahhmuah hnakin a tum sawn ringring,” timi ttongkam khal a um.

Saam 93 ngantu in a nganlai ah siangpahrang pawl in ram an uk nain Bawipa Pathian cu ziang hmuahhmuah tlun ih uktu a si ti a thei. “Bawipa in a uk” tiah a ngan. “Na Siangpahrang tokham cu a hramthok ihsin a rak ret zo, caan a um hlan ah Nang cu na rak um zo” (cc.1-2). Ziangtluk in tilet le tisuar cu saang hmansehla Bawipa cu, cumi pawl hnakin a nasa sawn ringring.           

Tlaser huuk cu a nasa ngaingai, tisuar umter ding hi thu danglam a si. Tuih sun ah sumpailam le pehtlaih awknaklam harsatnak tlaser in in fen hlo ding vekin kan ruat aw. Cuvek caan ah zumtu pawl cu kilvengtu kan nei. Amah cu Bawipa a si, kan ruat theimi le kan dil theimi hnakih nasa sawn in hnattuan theitu a si (Efe. 3:20). Amah cu kan harsatnak hmuahhmuah hnakin a tum sawn.   – C.P. Hia    

Na nunkhawsak raaldonak ah bawmtu nei lo si hmanla,

Pathian ih huham cahnak cu na ttanhmun;

Na thazaang ttawnttainak a tharter saal ding,

Na zawn a lo ruattu Pathian a si ruangah.    – D.De Haan 

Pathian ih cem ni nei lo huham cu

na hmuhnak bite thawn ziangtik hmanah va tah hlah.

 

 

(Visited 14 times, 1 visits today)

Comments

comments

Comments

%d bloggers like this: