Ziang a si duhdawtnak…?

See full size image

Nitin te C.T. ram nuam ih a lengtu rual le pi, tuitum Chritmas zawngah C.T. ih caan reipi a rak khawlkhawmmi duhdawtnak ziang a si..? timi simfiangnak cu a raksuak thlang a si. Kan Chin mi upa le rinsan pawl mi 15 cun a hnuailam ah duhdawtnak ziangtin an simfiang timi na siar thlang ding….

Siar nuam!..

* “Duhdawtnak” cu rualremnak, ei le in khal ih seherhawknak, peksiannak, tlinlonak zawngte khalih thinsaute ih tuarthiam hi a si.

Pu Tial Khal

* “Milai le milai “duhdawtnak” cu a cem theiih a cemnak cu huatnak a si.”

Dr. NTK

* “Duhdawtnak” cu ngaihsakawknak, bawmnak, zohawktawnnak, tlamtlinglo cingte ih ngaithiamnak a si.

Dr. Run Bik

* “Duhdawtnak” cu ziangtinkim an sinak ti famkim tu a si. Duhdawtnak cu ricin neilo ih thilti theinak a si.

Rev. Dr Khaw Lian Uk

* “Duhdawtnak” timi cu a duhdawtmi hrangah nun pumhlum cemral ko pekawk ih ngahsal ding, mai hlawknak beisei neilo ruahsannak neih lo ramri neilo a si ih sualnak tampi a khuhlo sak.

Saya Sui Nei Piang

* “Duhdawtnak” timi cu ngaihsaknak hi a si. Kan nu ka ngaihsakih a lungawinak ding ka tuah asile keimah sawn ka lungawi in ka hnangam. Duhdawtnak cun thil a ti thei tukih mifamkim lo tla mifamkim bikah a cangter thei. Duhdawtnak neih ahcun ziang hmuahhmuah hin sullam a nei thluh.

Pate

* “Duhdawtnak” cu a thin a sau ih mi zaangfah a thiam;

Duhdawtnak” cu mi a iksiik lo, tluang a khawng lo ih a puarthau fawn lo. (I Kor 13:4)

Duhdawtnak cu a bei a dong dah lo. (I Kor 13:7)

Sapte

* “Duhdawtnak” timi cu thildang siloin pehsuah lam rori a si, lak luhlam ruatlo ih peksuah cu duhdawtnak diktak a si.

Saya Thuah Za Thil

* “Duhdawtnak” timi cu….
1. Thinlung ih feeling maksakbik pakhat a si.
2. Pathian in minung sungah a thunmi software ropi bik a si.
3. Minung lakah siseh, hmuh theih le hmuh theih lo tiang, ziangkim ah hman ttangkaimi a si.
Salai PP
Laihluum

* “Duhdawtnak” ti mi cu Awnmawi vek khi a si.  A cancan ah Country vek, a cancan ah Blues vek, a cancan ah Rock vek, a cancan ah Rap vek.  Cun a cancan ah Soft, a cancan ah Hard, a cancan ah Heavy, a cancan ah Thrash, a cancan ah Hardcore!

Salai Peter Din

* “Duhdawtnak” cu ruahnak men siloin a thabikmi pek suah khi a si. A tak ih tuahsuak rori a si. Mirang tong kan sang asile sacrifice nak a si.

Plato Van Run Mang

* “Duhdawtnak” cu tuartentonak, khat le khat rinsanawk tawnnak, saan let awknak.

Duhdawtnak cu nunnak pek rori a si

Evan Kyaw Swe

* “Duhdawtnak” cu lungawinak le riatsaitnak kom aw mi a si.

Salai DL Senling

Pathian ka “duhdawt” ka ti tikah,

A duhnak tuah thei dingin ka zuam;

Ka innsungsang ka duhdawt ka ti tikah,

An humhimnak pe thei dingin ka zuam;

Ka tuurual ka duhdawt ka ti tikah,

An thlarau nun tthanglian pitlinter ding ka zuam;

ih

Ka rualpi pawl ka duhdawt ka ti tikah,

Anmah thawn rualrem tei’ um tlang thei ding ka zuam.

Curuangah “Duhdawtnak” timi cu “Duhdawtmi hrangih Nun” hi a si.

– By Rev. Run Cung Mang

LCF Malaysia

“Duhdawtnak”: Unau Theipum Seu

Duhdawtnak cu pumkhat sinak

Pumkhat sinak cu zawnruah-awknak

Zawnruah-awknak cu ngahlam hnak in

Peklam sawn ah mai’ ei ding tiang

Midang seu siang, “Unau Theipum Seu.”

Iksik a nei lo, a porh aw fawn lo

Mi an tthat tikah, a lungawi ih,

An tlaksiat tikah, a tuarpi ve

“Unau Theipum Seu”.

Pathian duhdawtnak, vun zoh tikah

Vancung ih sin leilung pi ah

Sualnak sal ih luat thei ding le

Nunnak tlamtling kan neih theinak ding

Misual pawl kha hnong men lo in

Minung pawl thawn pumkhat ah cang

Ngah lam a tum lo, pek ding lawng tum

Rundam dingah, a nunnak in seu

A porh aw dah lo, a hngal fawn lo

Mi a taansan lo, ngol a hmang lo

Kan that tik ah, a lungawi ih

Kan siat tikah, in tah pi ve

A nun daan cu, “Unau Theipum Seu.”

Mai’ ei ding theipum, midang hrangah

Seuh siang lo cu, Pathian sung ih

Hram a bunmi, duhdawtnak thuk

A si thei lo, “Unau Theipum Seu.”

San No Thuan

Duhdawtnak an lo simfiang thei maw? Aw! Duhdawtnak simfiang na har ko, veikhat ten mikip lungthin ah…

Comments

comments

One Comment

  1. BIAZAI siar ding ih ka click tinten duhdawtnak thawn pehparmi comment pawl ka hmu. An relmi pawl cu a tha ka ti zet. Nan biazai timi role ahcun biazai taktak lawng umsehla, falam biazai pawl khop zet in siar ding um theisehla, a dang cazikno le tongfim pawl cu role dangten in tuahsak thei uhla a tha sinsin ding tiah ruahnak suah ka duh. falam mi 11,000 lai ih zohciomi website ka lungawipi nasa.

Comments

%d bloggers like this: