Zawnruattu Pathian kan nei

Zawnruattu Pathian kan nei

– Rev. Run Cung Mang (LCF Malaysia)

 Nan zate in tangdornak thawn thuam aw uhla pakhat le pakhat bawm aw uh. Ziangahtile Ca Thianghlim in, “Mihngal pawl cu Pathian in a dodal ih tangdor mi cu mit-hmai ttha a pek a si” tiah a ti. Curuangah a cakmi Pathian ih kut hnuai ah tangdor tein um uhla Amah in caan a kim a ti tikah a lo khaisang leh ding. Nan donharnak hmuahhmuah cu Amah ih hnenah tthum uh, ziangahtile Amah cu nan zawn a lo ruattu a si.  – 1Pet.5:5-7

Thuhmaihruai:

Saam cangantu in, “Nan thilrit cu Bawipa hnenah tthum uhla nan tha a lo damter ding,” a ti (Saam 55:22). Saduhthah kim lonak, thinharnak le buainak, iksik nahsuahnak ih khatmi hih leiram ih caan tawite kan nun sungah hnangam daihnak sungih tthum awknak umsun cu “Zawnruattu Pathian” hnen lawngah a si. Mikip in mah le tawk cio in thilrit phurhmi le donharnak cu kan nei fingfing. Cuih kan neihmi donharnak cu khat le khat theihsak awk le zawnruah awknak a um ahcun a tuarzia a nuam ih a hlo saal thei.  Hlaphuahtu in, “Zawn in ruattu a nung Pathian kan nei” a ti, ka lungkim ngaingai.

1.                  Tangdornak thawn thuam aw uh

Ca Thianghlim in, “Nan zate in tangdornak in thuam aw uh” in ti. Bawipa in, “Mihngal pawl cu Pathian in a dodal ih tangdor mi cu mit hmai ttha a pek” a ti fawn (1Pet. 5:5). Bible in, “Pathian hmai ah tangdor in um uhla, a caan a kim a ti tikah Amah in a lo khaisang leh ding” in ti (1Pet. 5:6). Curuangah Pathian hmai ah siseh, zumtu midang pawl hmai ah siseh puarthaunak le hngalnak nei loin, tangdornak thilthuam thawn thuam aw dingah Bawipa in in duhsak a si. Mifim, mithiam, micakzet Moses hmanin a sinak ah a uang aw ngam loih “Bawipa Nang locun” ti’n thinlung put tangdorzet in a um (Suah.33:15) . Milianzet Solomon hmanin mi puarthau a ngaih lo (Thufim 6:16). Curuangah zumtu pawl cu Pathian ttihzah le rinsan in tangdor nun neitu ding kan si. Culawngah thinlung zohtu Pathian ih lainatnak le zaangfah thinpemnak kan co thei ding.

Thlarau nun khalah mah le mah khaisang aw le uar aw ding in siang lo. Thlarau mizet Paul in a pitling deuhdeuh tikah amah lam sinak a hlo deuhdeuh ih a tangdor sinsin vekin kannih tla thlarau nun ih tthanglian pitling mi kan si le kan nitin nunram ah midang ih hmuh theih le cawn tlak in tangdor nun a lang ding. Kan mit-men, kan kam-aan le kan hoiher daan in Khrih sunloihtu kan si ding a thupi ngaingai.

2.                  Pakhat le pakhat Bawm aw uh

Bible sungah kan Pathian hi zawnruattu a sinak hmun tampi ah tarlang in a um. Thianhlimnak ngainazettu Pathian asinan thianhlimnak a tlasammi a faale pawl kan zawn in ruattuk ih in ngaidam. Dingfelnak duhzettu Pathian asinan miding fel lo kannih pawl kan sinak vekin thu in tthen siang loin in zawnruat ih in ngaithiam. Duhdawtnak Pathian asinan mi duhdawt thei lo le mihuatnak hlir ih khat milai pawl duhdawt tlak lo in duhdawt ih kan zawn in ruat ringringtu Pathian a si. A mi Israel pawl in thungai loin an umlai caan khal ah mi tlasam an sizia a thei ih a bawm hngai. Thukam Hlun sungih Pathian ih mi pawl nunnak kan zoh tikah pakhat le pakhat bawm awkton ding hi Pathian ih fialmi le duhbikmi a si zia kan hmu thei. Khat le khat zawnruah awknak an nei awton.

Thukam Thar sungah zumtu pawl ih nunzia tla kan zirzoi asile an neihmi thilri hlawm awton le an ttulsamnak ah bawm awton in an umzia kan hmu thei. Samaria mittha pa ih thuanthu in zawnruahnak thinlung nei ih mi rethei harsa bawm ding a thupitzia in zirh. Hebru Cabu ngantu in, “Pakhat le pakhat bom awkton le tthatnak tuahton awknak hngilh hlah uh. Ziangahtile cumi cu Pathian lungawitertu raithawinak a si” a ti (Heb.13:16). Paul in, “Caan ttha kan neih tinten zo hnen khal ah a tthami cu tuah uhsila, ahleice in Khristian kan zumnaklam ih kan innsungsang hnenah tuah uhsi!” a ti (Galati 6:10). Curuangah zawn in ruattu Pathian in a faahniang pawl pakhat le pakhat zawnruah awkton ding le ttulsamnak zawn ah bawm awton ding in duhsak.

3.                  Nan Donharnak hmuahhmuah A hnenah tthum uh

 Bawi Jesuh in, “Nan ei dingmi rawl hrangah siseh, nan sinfen ding hnipuan hrangah siseh, donhar in um hlah uh,” “Ei ding le in ding thu lawng ruat le helhkam ringring in um hlah uh. Ziangahtile leilung tlun ih khawvel mi pawl in cubangtuk thil cu an ruah ringringmi a si. Vancung ih nan Pa in hi bangtuk thil nan ttul ti cu a thei. Curuangah nan Pa ih Uknak kha helhkam in hawl sawn uhla thil dang pawl cu a lo pe leh ding” tiah a ti (Luke 12:22, 29-31). Thlaraumi Paul khal in, “Ziang thuhla hmanah donhar in um hlah uh; thla nan cam tinte in nan ttulmi cu Pathian hnenah dil uh. Cuticun minung ih ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding” a ti (Filipi 4:6-7).

Bible thiam pawl in, “ttih hlah, phaang hlah, na thinhar hlah, donhar hlah,…” tivek thawn a bang awmi hi hmun tampi ah a um an ti. Mi pakhat cun, Ca Thianghlim sungah “ttih hlah” timi ttongkam vei 365 lai a cuang. Curuangah zumtu cun kumkhat sungah ni 365 a um ih nikhat hman thinhar ih um ding kan si lo, ziangahtile Pathian in in siang lo” a ti. Curuangah duhdawtmi zumtu unau, kan Pathian hi thlangamnak Pathian, daihnak Pathian, a faale pawl ziangtinkim ah helhkam le donhar ih um in siang lotu Pathian a si. Jesuh in, “Thilrit a phur mi le rethei zonzai mi ka hnenah ra uh, colh hahdamnak ka lo pe ding,” in ti (Matthai 11:28). Peter in, “Nan donharnak hmuahhmuah amah hnenah tthum uh, ziangahtile Amah cu nan zawn a lo ruattu a si,” in ti (1Pet.1:7).

Thunetnak:

Zumtu mi pitling cun puarthaunak le hngalnak thuamhnaw hlit aw in tangdornak thuam hruk ding kan si. Mai’ zawn lawng a ruattu si loin, midang zawn a ruattu le pakhat le pakhat duhdawtnak thawn bawm awton ding kan si. Culawng si loin, kan kiangkap khawvelmi pawl ih an buaipimi ei le in, lennak lawngah ah buai vezettu si loin Pathian zumfek ih hngetzet le fekte in ding ding. Pathian lawng rinsan in thlacamnak le Bible siarnak thawn kan helhkammi le kan thilrit phurmi a hnenah tthum ding. Kan donharnak hmuahhmuah a kehram ah tthum ding le “Bawipa Nangmah locun” ti’n Amah rinsan in nung ding kan si. Cuti’n kan nung thei asile thlangam daihnak le ungawinak thluasuah kan co ding. Ziangahtile “Zawn in ruattu a nung Pathian kan nei” a si.

(Visited 54 times, 1 visits today)

Comments

comments

Comments

%d bloggers like this: