Zatlaknak Ihsin Hlawhtlinnak Ah

TITHUK LAM PANIN (Luke 5:1-7
Zatlaknak Ihsin Hlawhtlinnak Ah
Silas Ren (Pastor)
Yangon Revival Baptist Church

Thuhmai
Himi Bible sung um thu hi Matthai 4:18-22 leh Mark 1:16-20 sungih thu thawn an bangaw lo. Hi Bible bu hnih ah cun Peter le Andrew cu sur an deng rero lai in a lang. Luke sungah cun sur an deng theh ih nga kai lo in an cawl. Peter, Andrew, James le John pawl hi Jesuh thawn a hlanah Capernaum leh Galilee ah an rak um tlang dah (Mark 1:21-39). Cui hnu an an hnatuan hlunte an tuan sal. Tu ah cun Jesuh in a dungthlun taktak si thei dingah tehtawn mi hmangin zirhnak a pe thlang.

1. Hlawhtlinnak Phenah: Tumruhnak
Jesuh dungthlun lakah mi 7 hi ngakaitu an si ngelcel. Ziangruangah Jesuh in a dungthlun 12 lakah nga kaitu kherkher a rak hmang tam timi thu hi ruah tlakzet mi a si. Kei si ningna (midang tampi khal an si ve ka zum) cu zanvar it lo le sing lo ih hna ka tuan hnu khalih ka hlawhtlin lo ah cun bansan tahratin hnatuan dang ka hawl sawn ding. Asinan, Peter lepawl cu an hlawhtlin lo hnu khalah nehhnu ah sur an vawrh leh nak ding hrangah an sur an khawlh paih lai thotho (5:2). Ngakaitu hi tumruh (tumtah hnget nei) mi an rak si. Curuangah mi hlawhtling hi tumruhnak thinlung nei mi lawnglawng hrangah a si ti a fiang. Suahkeh thiamnak neih pakhat lawng hi hlawhtlinnak a si lo. TUMRUH mi si a tul.

2. Hlawhtlinnak Phenah: Tirhsiannak
Jesuh cu lawng par ihsin thusim a tum tikah Peter ih lawngah a va lut lawng si lo in, “tikapah na lawng tawlhter aw” ti in a fial bet. Zanvarte it lo le sing lo ih um hnu khalih hlawhtlin lo lai lakah Peter cu thin heng siang lo te in Jesuh hrangah a lawng a pe. Sai Thi Saingih hla ah, “lamzin parah rawlkhawng pa a it rero. Ziangruangah rawl a khawng? A pek lo ruangah maw, pek ding a neih lo ruangah?” timi hla a um. Cucu Buddhist thluak ruahnak parih thumaw mi hla a si ding. Khristian teh ziangah saw thlawsuah kan dawn lo? Kan pek lo ruangah maw, pek ding kan neih lo ruangah? Peter cun a sum laknak hrampi a si mi nga a nei lo, a nga hawlnak lawng lawng a nei. Cucu Jesuh hnenah a pe siang. A neihsun a pe siang. Unau nangteh, “pek ding ka nei lo” na ti maw? Cuvek cu ka zum lo, Pathian khalin a zum lo ding.

3. Hlawhtlinnak Phenah: Thungainak
Peter in Jesuh hrangah a lawng a pek tikah amah hi lawng mawngtu a si. Cutikah Jesuh ih kiangnai bik ihsin A thusim mi rak ngaingahtu a si tengteng ding. Cui a thu theih mi khal a zum, “Zumnak cu theihnak ihsin a ra ih, theihnak cu Pathian thu ihsin a si (Rom. 10:17). Pathian Thu thlauthla pang siang hlah uhsi!

4. Hlawhtlinnak Phenah: Thulunnak
Jesuh kha taksa danah thingkuang tuahtu ih fapa a rak si bangin nga thu cu Peter hnak cun a thei sawn lo ding a bang. Peter khalin cuti in a ruat ding ka zum. Nga cu zanah, tidai puan deuh ah an suak theu ih cucu kaih an awl laifang a si. Tidai thuknak fialfial ah nga an um cuang lo. Cui lailakah Jesuh cun, “tithuknak lam ah na sur vawrh aw” a ti (5:4). Kei si ningna cu, “nang maw kei saw thei sawn deuh” ti in ka thin a heng men ding! Asinan, Peter cun, “Na thu a si awkah” a ti paih lai (5:5).
Mi zo khal pitlingih thuruat thiam tiaw zo hmuahhmuah cun kan ruahnak ciau kan hmang theu ih, kan ruahnak ah cang thei lo dingih kan theih mi cu kan tuah duh lo. Rinnak ih ke kan kar tum can khalah kan ruahnak parah kan thumaw duh zet. Cutin ke kar ngah nawn lo in kan um phah can a tam lo sawm? Peter cun a ruahnak in thil cang thei dingah a ruah lo lawlaw mi khal Bawipai thu a si ah cun tuah a huam. Cutin, a surih tlem le tlem lo in nga a kai ngah. Curuangah hlawhtlinnak taktak hi kan ruahnak parah thumaw lo in Bawipai tawngkam suak mi Thu vek a si maw si lo timi par lawngih thum aw sawn mia a rak si. Pathian Thu in a sim mi cu kan thluak ruahnak ah cang thei lo ding bang khal sehla tuah uh si….cutin hlawhtlinnak cu NANGMAI TA.

(Visited 40 times, 1 visits today)

Comments

comments

Comments

%d bloggers like this: