Zalennak

August 13

Tlawngkai Ninga 

Zalennak 

Siar:

Rom 13:1-10 

Zohnen hman ah baakmi nei hlah uh. Nan baakmi cu pakhat le pakhat duhdawt awknak lawng kha siseh. Duhdawtnak a neitu cu Daan thluntu a si.   – Rom 13:8 

Kumkhat Sung Baibal:

–   Saam 87-88

–   Rom 13 

Kan dung caan reinawn ah kan nu in mawttaw car mawng dingzat an tathmat mi vekih mawn cu zalenzet in a theih awk thu a sim. “Radar timi cet ih kaih ka ttul lo hlei ah khua haltu palik mawttaw ton tik khalah fungzet ih mawn le cawhkuan tong ding phaan a um lo,” a ti.  Lamhla feh le khualtlawn tik khal ah speed limit mi zat ih mawng cu a nuamzet. “Cuhleiah daan thlun khal a si fawn” a ti.           

Rom 13:1-10 sungah leitlun uktu pawl ih daan le Pathian ih daan thlun a ttul thu in sim. Acozah daan kan thlun tthat tikah cawhkuan ding zianghman kan phang lo, kan tuah tthatmi ruangah thinlung thiang le hnangam te’n kan um (cc. 3, 5).           

Paul in Rom khua ih Khrih dungthluntu pawl hnenah acozah thuneitu pawl hnenih an pek ttulmi – ngunkhuai le upat ttihzahnak pek dingin a sim (c.7). Culawng si loin, “Zohnen hman ah baakmi nei hlah uh. Nan baakmi cu pakhat le pakhat duhdawt awknak lawng kha siseh. Duhdawtnak a neitu cu daan thluntu a si,” a ti bet (c.8).           

Milai daan thlun ding cu kan ttuanvo a si ih midang duhdawtnak caan ttha kan neihmi in Pathian ih daan kan famkimter. Cule A daan cu “a famkimmi daan in zalennak a pek” ti a si (Jeim 1:25).    – David Mc Casland 

Pathian cun daan pawl kan thlun ding in duhsak,

Kan kiangkap minung pawl a uk;

Asinan pakhat le pakhat duhdawtnak cu,

Pathian ih daan famkim in zalentertu a si. – Sper 

Thulunnak in milai ih daan cu kan thlun;

Duhdawtnak in Pathian ih daan kan famkimter.

 

 

(Visited 24 times, 1 visits today)

Comments

comments

Comments

%d bloggers like this: