Zaanriah Hrangah

February 10

Tlawngkai Nihnih

 

Zaanriah Hrangah

 

Siar:

Seemtirnak 22:1-12

 

Cuhnu ah Pathian in Abraham cu a hniksak ih, “Abraham” tiah a ko. Abraham in, “Hinah ka um” tiah a ti.

 

Kumkhat Sung Baiblal:

          Puithiam. 8-10

          Matthai 25:31-46

 

Rualpi tthazet pawl rawl ei sawm tahrat in rawltthing sat saalmi pek mai sehla ti ka ruat ban lo. Cuti’n tuah bang sehla an tlunah ziangvek thinlung ka nei ti cu sim cawk loin rel ding a um ding.

 

Pathian khal kan nunnak ih a hleifuanmi lawng kan pek asile kan hrangih a tthathnemnak ziangti’n kan ruat timi tampi rel ding a um ding a si. Pathian in Abraham kha a fapa Isaac in mei-ur thawinak tuah dingin a dil (Seem 22:1). Abraham ih nunnak ah Pathian hnakih khungsawn ih retmi a nei pei maw tiah hniksaknak a si.

 

Kannih hrang khal cuvek thotho a si. Pathian hnattuannak dingah a ttulzetmi thil pakhatkhat a um ttheu. Amai’ ngaidam duhdawtnak thu midang hnenih sim theinak dingah kan thinlung sungih a taap ringringmi phuleisam duhnak kha hlon in kan raal pawl ngaidam dingah in fial thei men. Amah ih hrangah kan tikcu caan, sumpai le nunnak tivek pawl thawinak ah pe dingin in ko thei men. A duhdawtnak le rundamnak thuthangttha sim dingah ram hlapi ah feh dingin kan fanu fapa pawl in dil thei men. In dilmi parah ziang tivek in kan sawn timi in a parah ziangvek thinlung kan nei ti sim cawk lo um ding a si.

 

Thil hleifuan pek theih asinain ziang dang hnakin Pathian a duhsawntu lawng in Amah kha thil tthabik an pek ding.

 

Na thinglamtah thawn i thlun aw tiah,

Sunglawi Runtu ih kawhnak ka thei;

Ziangti’n a fatemi thawinak cu ka peek thei ding,

A neih hmuah i petu Jesuh hnenah.

 

A neih hmuahhmuah ka hrang ih thawinak a petu hrang ahcun

kan peekmi thawinak hi a tumtuk ti a um dah lo

(Visited 30 times, 1 visits today)

Comments

comments

Comments

%d bloggers like this: