Zaangfahnak Kiltu Ttha

June 7

Tlawngkai Nikhat

Zaangfahnak Kiltu Ttha

Siar:

1 Korin 15:1-11

Pathian laksawng dangdang kengtu ttha bangtuk in a hnen ihsin nan ngahmi laksawng cu midang tthatnak hrangah hmang fingfing uh.     -1Peter 4:10

Kumkhat Sung Baibal:

2 Sansiarnak 28-29

John 17

Kan dung zarh sung cu midang hnenah zaangfahnak langter dingin caan ttha tampi ka ngah. A famkim lo na’n ttum khat ih ka tuahmi cu ka lung a kimzet. Thinhengzet ding ai ah, “Ziangti’n hivek thil a ra cang thei ti ka theithiam ko. Keimah ka palh,” ka ti ih ka taanta.

Keimah le keimah hmat ka pek awk daan cun hmat saangzet ngah tlak ka si. Ka famkim ti cu a si lo na’n famkimnak ka hun naih deuh. Midang pakhatkhat parah zaangfahnak ka langter vekin hmailam ah zaangfahnak ka co ve leh ding tiah ruahsannak khal ka nei.

A hmai zarh Bawipa Ni biakkhawmnak ah, “Mangbangza Zaangfahnak” (Amazing Grace) Hla mipi in kan saklai ah ka thinlung sungih a suakmi cu, “Mangbangza zaangfahnak, keimah vek misual hman Bawipa in i ruunnak thu cu ziangtluk in a thlum,” ti’n.

Ka ruahsuakmi cu ziang a si? Midang hnenih kan langtermi zaangfahnak cu kanmai’ taa a si lo. Midang hnenah zaangfahnak kan pek theimi cu Pathian in kanmah in pek zo ruangah a si. A hnen ihsin kan ngahmi lawng kha midang hnenah kan peksinmi sawn a si.

Kilkhawitu ttha (good steward) cun Bawipa hnen ihsin a ngahmi thil midang pek sin theinak caan ttha a hawl ringring. Kan zate’n Pathian ih laksawng dangdang kengtu ttha si cio uhsi! (1Peter 4:10).     – Julie Ackerman Link

Tahtthim ding um lo Pathian ih dudawtnak,

Kalvary ihsin a tlang;

Ziangtluk lainat zaangfahnak in hmuh,

Jesuh thinglamtah parih a thih tikah . – Anon

Pathian ih zaangfahnak na thei tikah,

midang khal hmuhter hngai ve na duh ding.

(Visited 21 times, 1 visits today)

Comments

comments

Comments

%d bloggers like this: