Vokpi pakhat ih au-aw (autobiography)

15073510_183137108813672_4542284626718569559_nMilai pawl ih cawm cawp tul innzuat rannung pakhat ka rak si hi ka vansiatnak maw ka van thatnak sawn ha si ding. Ka suah semtir ihsin hruang sung ah kharhkhum ka rak si ih ka pitlin vivonak zalam tluanah hin saduhthah neih ve ding cu rello, covo timi hman hi ka rak nei lo cu a si. Ka nun lam tluan ah hin thuneihnak ziang hman ka nei ve lo ih milai pawl ih thununnak hnuaiih ka rak um hi cu sal si ding ih rak semsuak si awmtak in.. Lungsung ih ka tuarnak feeling pawl hi ka vun rel ve rengreng ding.

Milai pawl ih inn thatha phen, kelkawm le hruangsia sungah ka nu in in rak hring. Kan umnak inn tla cu milai pawl ih hnontak thingrua sia le belcawng taktak ih remkhawm tiamti mi a si. Suahpi unau kan hnihthum lai ah kha cun in cawmtu ka pi(milai) hi, in ra veh cang ah a lungawi theu nan vansiatthlak tak in ka unau pawlin in thihsan hai tikah ka pinu cu a mithmai a se ringring. A tong ka theih theumi cu “Hmm… Tui kum cu Bike thar kan lei thei ding tiih ka suangtuah rero lai ih nan thi hai cu aw! A budelh deuh pa 3 lawng nan tang lailai” ti hi a si. Aw.., a se zawng hlirih thlirah cun suahman nei lo tak cu ka rak si. Abik tak in milai pawl in ka thu an rel ih piangin an hlawknak ding thu le anmai diriamnak ding thu lawnglawng a si bik in ka thei.

A si ko, kei cu milai pawl kuthnuai ah an duhduh ih an hman dingmi sal vek cu ka si. Thla3 hman ka kim hlan ih sin ka nui tanghlum le ka unau pawl thawn ttangtthen kan si ih ka nui lungsiat zia kha a tu cun ka theihthiam pi sinsin. Ka sempi unau 2 phei cu ‘hmun dang ih tol ding’ ti tahrat in an duh lo cingih vok-awt bi tak sungah thahrum hmangin thun an tuar ih cubet ah mawtaw parah tleng le tleng lo in ben an tuar sabbei. Cui thu ka theihin ka lungsia in ka ninghang zet. Cui lak ah kei cu ka van tha ka ti ding maw hmun nai sawn ah in rak zuar ngah ih pi thar tla ka nei sal. Asinan hruangsia sungih khum bet thotho mi cu ka si. A cang le ka pi in rawl in pek hngilh theu ih rilrawng tuar lo ih hruang leng ka pawt suak can, zalen takin hun tawivak ve keng ka tizawn ah. Milai pawl in lungto thawn in deng, fungfek in vuak ka tuar. Kan hmuan ih thlairah na ei theh tin in camriam. Ka pi hnenah an heek ih cutin hrem ka tuar. Camsiatmi si awm takin! Rawl khop ih in pek lo can rilrawng in ka ai can ah, na nin um tleutleu in ti tu le tu kawk ka tuar fawn. Aw… Milai pawl hi an hmaikhua cu an va sial lawmlam em. “Duhdawtnak, Duhdawtnak” ti cu an rel hiamhiam theu nan an thinlung sung cu “Hamtamnak” sawn hin a luahkhat ih an tanghma sialnak hin an mit a cawter theh a si ko lo maw. An ni sunglawi ah le puai ni khua ah cun kan nih (vok pawl) cu a tam a mal in kan nun a liam ve ringring theu. A bik tak in Laimi pawl le phei cun kan sa hi a ngaina hleice cuang lailai… Ei ei ei.. Tuksumza tuksumza! Milai pawl ih ci-zu-shin kan rak si ringringnak mithmai tal zoh in tu hnak ih duat le ngeihsak cu kan phu tuk nan.

Vok rak si ceng cu ramlak ih a piangmi ram vok tla rak si sawn tak ding ka ti theu. Cutin hruang sung ih khum bet le milai pawl ih thuthu ih um tul lo in zalen tak in ram kaupi ah keimah ten ka duhzawng rawl ka hawl tak ding. Duhthusam vekin a cang thei fawn si lo. Hmansehla vokpi pakhat dinhmun in milai pawl hrang thlawsuah ka rak si thei hi khat lam ah cun ka van a tha ko. An fa le tlawngkainak ding ah kei ka fa le ka can ko ding. An hamthatnak hrangah kei cu hruang sungah um ko ning. An puai ni sunglawi tertu ding ah ka nunnak khal a liam leh lo ding ti ka rel thei lo. Tongka lawngih au kengkengtu milai pawl hnakin, a takih midang hrangih mi tangkai si hi ka uangaw zet ko.

Ta HniangÙk

Comments

comments

Comments

%d bloggers like this: