Vic Team aiawh Chinmi Jerry San Luai Thang Jahau – Vice Captian ngah

CT| Melbourne

Australia ramkulh Vitoria aiawh ih futball leknakih Chinmi tel hmaisabik Jerry San Luai Thang Jahau cu Victoria aiawh ih futbal lek dingin mani sun 29th August 2010 ah Newcastle lam panin, a mah akilkhawi tu, a ni Mai Rebecca Ngun Cia Kil le an tlawng ihsin amah kilkhawi tu dingih an thlahmi an sazamah Jenny thawn an zuang. Jerry hi tlawngta mi 4500, Australia, Victoria state sungih thiamhlei mi 13 hrilmi lakih hrilmi a si hleiah an team vice captian ding khalah hril a si.

Vic Team

“Khawitawk hmun khalah a lekthei ih, a hleice in a lai ihsin dunglam leh hmailam bawhlung pe suaktu ah a tha, a zam a tha ih tlan acak, thu simmi a ngaiih, zuamnak a nei, kan team pawl kan dinhmun a that lo canah a nih hi kan rinsan bikmi a siih a ke kan zoh bikmi a si’ tiin Vic Team kai hruaitu Tean cun CT palai a sim. “Vic Team ih ka telthei cu Pathian zangfahnak a siih, vice captain tiang in hril cu ka lungawi tuk, ka theitawp suahin ka zuam ding” tin Jerry cun a lungawinak thu aipuang zetin a sim ve. “Kan Chinmi aiawh ih kan ni fale lak ihsin Jerry San Luai Thang  a rak tel ve theicu Pathian zangfahnak kan co hleice ih minung lamih kan ruah ban dahlomi le Pathian hnen khalih kan rak dil ngam dahmi a silo, Pathian thatnak a si ti lo cu relding kan neilo” tiin amah a kilkhawitu Nu No Than Thluai cun CT palai a sim. (Zuk- Vic Team, Jerry Jahau ahmailam tlar hnuai ta vorhlam ihsin pa linak)

Vic Team Assistant Coach Andrew Higgins khal cun, ‘Midang lakah hleicet cuangnak a neiih ka ruahsannak cu a ti hlawhtlin ka zum a si’ tiin a sim ve. Mooralbark Junior Soccer Club ah a lek theu ih, a lehnakah thiambik (best player) khal vei hnih a ngah zo.

New Castle ih kumtin te ih an tuah theumi Football Championship Nelson Bay, New South Wales ah zarhkhat sung an lek dingih September 3 ni ah an kir sal ding. Melbourne Airport tiang Lailun Pawlkom Melbourne hruaitu upa pa 4 leh rualpi pawl in thlahnak an nei. ‘Kan Falam mi hivek ih Australia, Victoria sung, a hleice in Melbourne ummi ih kan state aiawh rori ih a lek theicu Lailun Pawlkom Melbourne hminin kan lungawipi a si’ tiin LPM hotu Pa Van Nei Piang khal cun a duhsaknak a simih Melbourne ih Lai kumthar (Fanger) October 9 niih neih dingmi ah mi cungcuang laksawng pek ding an tum thu khal a sim tel bet.

Jerry hi Pa Mang Tin Hrem ih  fapa pahnihnak a siih unau paruk(6) an si. A pa le a unau dangpawl cu New Delhi, India ah an um ih Nu No Than Thluai le Mai Rebecca Ngun Cia Kil ih kilkhawinak in Melbourne ah 2006 ih thleng mi a si.

Vic Team pawl hin kan dungkum ah pahnihnak an rak ngah zoih tui kum khal nehnak ngahding an zum awk zet.

(Visited 74 times, 1 visits today)

Comments

comments

2 Comments

  1. CT palai nan ti tha nasa.Hivek ih mai mi phun, nan cawisan hi,na tuah tuan nak a va mawi in a va ro pi ve.Cun , Lailun pawlkom melbourne hruai tu upa pawl zohthim tlak nan va si tak em.

  2. Dear CT,

    Jerry hi Delhi a um lai ah nauhakte ngaingai asi.
    Hivek dinhmun a thleng theicu ka lungawi tuk aw.
    Pathian in cawisang vivo seh.

    Ukte

Comments

%d bloggers like this: