A Vei (3) Nak CBANA Youth Conference A Hlunghlai Ding

USA ih um Chin mino pawl tonkhawm thuruahnak cu a ra lai dingmi May 26 – 28 tiang Midland, Texas, USA ih Christian Fellowship Church of Midland ah neih a si ding. An khamwpi ih thupi hrangah “Muvanlai Bang Cak Le No In” timi a si ding ih Kawhhran 25 ihsin Mino pawl an tel ding. Myanmar ram ihsin a hleice in Praise and Worship hruainak lam hohatu dingah Zan Te ( Numberz 12) Guitarist le Thuthangtha simnak le Hmailam Chinram le Chin Mino thuhla relpi dingah CCIT ih Professor Pastor Lal Biak Hnem pawl khal in an tel pi ding.

Hi a vei thumnak CBANA Mino khawmpi ah thulu pali pawl hmangin thuhla zirhnak thawn caan hman a si dingih Mino thutiinak Youth Talk khalin caan hman a si ding. Thulu pali hrilcia mi pawl cu : Thlarau Thianghlim (Holy Spirit), Mino le Zumtu Ngaizawngawknak (Youth and Christian Dating), Baptist Rothil, Zumnak le danglam thupitnak (Baptist Heritage, Faith, and Distinctive), Tuilai leitlun ih mino hmaton sualsuah ding mi (The Challenges of Young Christian Today) ti pawl a si ding.

Zirhtu ding pawl tla cu, Rev. Dr. Biak Hlei Mang , Rev. Dr. Thian Nun Piang , Rev. Thomas Suisan Lal Rev. Dr. San No Thuan pawl an si ding. Youth Talk hrang ih thupi hril mi pawl cu, Youth and Mental Health, Youth and Social Media, Youth and Higher Education timi pawl a si ding.

“Tukum kan Khawmpi hi Texas ih kan tuah ruangah suksonak a harsa deuh hleiah, State tam nawnah High School Graduation a um ruangah kawhhran 15 lai an ra tel thei lo ding. Asina’n, tuanvo neitu lam le innteek pawl nih a tha theibikin USA ih Mino pawl thlarau taksa thansonak ding le Pathian thangthat tlangnak dingah kan titheitawkin kan zuam rero. Hmailam ahcu, USA lawng siloin, Burma telin leitlun ram dang ih kan Chin mino tampi kan khawmpi ah in ra telpi theinak ding lamzin hawl dingin kan timlaam” Justin Thang, Coordinator: CBANA Youth Conference cun Chinland Today Media hnen ah a sim.#

Comments

comments

Comments

%d bloggers like this: