Vaphai JAC In Saikhumphai Bawm Hrihlo Ding Ti: Saikhumphai Dinhmun Thlirnak

Van Bawi Lian425203_376244139146975_1245140408_n-580x435
Chinland Today
13 June 2013

Champhai: Saikhumphai pawl ei ding le bar ding harsa ih an um rero laiah Vaphai khua pawl cun Saikhumphai khua ih bawmnak petu pawl hnenah bawmnak pe hrih lo dingin an sim.

Tuizing Champhai ih tualsung thuthang ah Vaphai JAC pawl cun Saikhumphai bawmnak petu, pawlkom, mimal, Kohhran le pawl dangdang hnenah bawmnak pe hrih lo dingin le a cozah lam ih thusuah ngai hrih ding an sim thu an phuang.

Ziangruangah khamnak hi

Hi tiih thusuah hi Saikhumphai Emergency Relief Committee, Global Laimi Facebook pawl ih tuahmi  le Chin mi USA, Australia le hmun dangdang ihsin bawmnak tete an pek thluh hnu ihsi thusuah tuah sal an si.

Saikhumphai thuhla theifiang tu hmintarlang duhlo cun, ‘Vaphai pawl ih an cangvaih dan hi a tituk deuh a si, tu ah Saikhumphai pawl in ei ding hman neinawnlo in Champhai DC hnen ah fangfai an dil laiah, bawmnak pek ding pawl rak kham hi cu minung hmuhsuamawknak rori a si’ tin telephone thawi biakawknak ah sim.

Zo pawl in an bawm

Saikhumphai khua pawl bawm dingin ramtin ih um Chin mi pawl cun sumpai thawh khawm in bawmnak an pe rero zo. Tunai Saikhumphai Emergency Relief Committee hnen ih sumpai lut zo hi an hotu Joseph Sui Uk Lian ih a sim nakah cun Rs 580’642.38 a sizo. Saikhumphai pawl hnenah Rs 90000 lenglo khal pek a si zo tiin Saikhumphai hotu hnen ihsin thu kan dawng. USA, Australia le hmun dangdang ihsi Rs 15000 lenglo khal mimal le pawlkom tete in an kuat thei ti khal cun Chinland Today cun thu kan dawng.

Ziangtin bawmnak a lut

Saikhumphai bawmnak hi fangfai, thuamhnaw le thil dangdang in pek ngam a silo, ziangah tile Vaphai khua paltlang a ṭul ruangah harsatnak tampi a um.

Curuangah sumfaiin an mah hnenah pek a siih an mah sawn in Champhai lamah an duhmi le an ṭul mi pawl cu leiin an phur ti khal cun Champhai ih khawsa, Saikhumphai ngaihventu le thuhla theifiang tu cun Chinland Today hnenah a sim.

Saikhumphai mipi au aw

Vaphai pawl ih an khua pawh an urkang hnu ih Vaphai khua ih ben aw ding ih Saikhumphai pawl an ti mi ah Saikhumphai khawpawh cun pompi thei lo in um bet vivo an um.

Guwahati High Court ih a pompi mi le theihpi mi dan vek ih um an si hlei ah diklo zet ih an puh mi hi minung covo palbetnak a si tiin an um hmun cu tlansan an tum lo. Hi tiih tlansan an tum lo ruangah Vaphai khaw pawl cun hringhro in le thuhla dangdang tuah in Saikhumphai an khua zate ih hnawhsuah rori an tum ve thung.

Hi tivek law mamih hi hmun an cuhawknak hi ramri sumtuahnak hrang ih hmun lailai ih hman ding ti thuhla a um ruangah khal a si tiih rak titu khal an um. Vaphai khua an Veng upa pawl ih an ṭong suah mi khalah ‘ hi hmun cu Saikhumphai pawl in an ti lawng dingih cumi thluh ihsin hmunlawng pawl le inn hmun pawl khal khaw thar din a si tikah an mah Saikhumphai pawl khalin an dil sal leh ding ih daan vekin an um leh thei sal ko ding’ tiih rak rel khal an um.

Cozah lam dinhmun

Tutiangah hi khua inn 44 ur kang tu hi mi pakhat hman kaih an si hrihlo. CYMA le pawlkom dangdang pawl hin zianghman thusuah an tuah duh lo. CSU, MSU ih bawmnak an pek mi le thuhla an suh hliah mi khal maimalh sak in a um ih tu ni tiang ah hi thu ruangah acozah ih hmalaknak zianghman hmuh ding a um lo.

Hivek ih uktu party pawl ih cangvaihnak an neih duhlo mi hi Mizoram hrilawknak a naih ruangih cangvaih duh lo an si khal cu a zum um zet. Mizo NGO tumbik CYMA an thuken, ‘bawmṭulmi bawm’ ti rori nei hman ih bawmnak pek ding a kham hin rellang duhlo mi thuthup Vaiphai le CYMA karlak, political party karlak ah a um ti cu a ti lang fiang zet kan ti lo thei lo a si.

Comments

comments

Comments

%d bloggers like this: