Vanzam Ṭumnak le Chinram Dinhmun

Steven R Sunthang
MBA (Aviation Mgt), CPL, ATPL, BA, Dip Electronic Eng

Vanzam ṭumnak thu hi buaipitlak khal asiih, kan miphunpi in a buaipi reromi ah technical lam thu thei duh in in suttu an um phahphah heu ruangah mipi theih dingin tawitheibik in mallai ka run ngan.

Vanzam ṭumnak kan timi hi Mirang tong cun, Aircraft Landing Area, Airfield, Aerodrome, Airport tiin a phunphun in an ko. An zaten vanzam umnak Runway neimi an sinan, an thilri neihmi a bangaw cio lo.

Chinram ih tuah ding vanzam ṭumnak hi Airfield asilolen Aerodrome level hrawng asi ding ka zum. Asinan airport tiah kan ko hluarhlo thotho ding a zum um.

Mingalardon International Airport ah VHF Omnidirectional Range (VOR), Non-directional Beacon (NDB) le Instrument Landing System (ILS) an hmang. VOR le NDB cu a airport va thlengnak dingah a angkai zet. NDB hmangin runway hmuh theih tiang um a theih. ILS a hmangthiam pilot pawl cun mero lak le ruahsur durdo lak khalah olten an um thei. Mandalay Airport ahhin ILS hi Japan pawl ih bomnak in an bunnak a rei hrih lo. ILS an bun hnu lawngah International Airport tiah an run ko. Himi thilri pawl hi mankhung ngaingai pawl an si.

Ramsung vanzam an hmanmi Fokker 27, 28, ATR 72, MA60 tivek mawngtu pilot pawl lakah ILS hmangthiamlo an tam sawn. Lashio Airport ah VOR a um ih Kalaymyo Airport ah NDB (Frequency 225 Kz) a um. Kawlram airport a tam sawn cun VOR le NDB an nei lo. Chinram ah airport tuah ding asi tikah kan tlang pipi umdan in ruahtel ulmi (factors) tampi a um.

Tlang sang pipi umnak ah QNH, QNF, QFE timi pressure tahnak ah a buai thlak zet ding. Falam khua hi Sea level 5280ft timi hi QNH 1013 hPa ih tahmi asi. Vanzam umnak hmun hrangah QNF le NFE tla hman a ul. Ni khat le nikhat sungah siseh, nazi pakhat dan hmanah a bangaw lo ringring thei.

Chinram ih Mero umdan hi cumulus le Nimbostratus mero pawl an tam thei nasa ih mero malnak bik hmun ih airport tuah a ul ding. Thlihrandan ahcun Chinram ah cutluk in thlihrang na cu a mal nan, tlang pah thei lo thli a ra kirsalmi (windshear) pawl tampi an um.

Chinram ah airport tuahnak ding san a thupibik cu commercial hrang hnakin upa khualtlawnnak hrangah a si a zum um. Upa khual tlawnnak hrangah a remcan vivo asilen commercial hrangah an upgrade leh ding tiah ka zum.

Vanzam ṭumnak ding hmun ha ih ka ruahmi pawl cu Teddim khua luhhlan mual, Rih khawdar khawhlun mual le Surbungtlang an si. Cost and Benefit analysis tuah tikah, Teddim ahcun cozah in Airport a tuah duh ding ka zum lo; Kalaymyo airport thawn a nai aw tuk. Rih Khawdar khawhlun khal ah an tuah ding ka zum lo. Ziangahtilen, upa khualtlawnnak ding Haka khawpi thawn a hla aw tuk. Sumdawnnak ahcun Rih Khawdar cu a ṭhabikmi cu a si.

Ziangah Haka thawn nai aw dingin Haka khawpi kiangkap ah an tuah lo timi thusuhnak a um thei. Geographical location kan zoh asilen Haka khawpi kiang ih Rung tlang ruangah Haka khua thawn peng 20 kiangkap ah Pilot pawl ih ṭum duhnak hmun pakhat hman a um lo.

Surbungtlang hi Haka thawn a nai aw zetmi Falam peng sung ih um hmun asi. Curuangah, Surbungtlang ih an tuah ceng lo ahcun Kalaymyo Airport hman rero ding an duh sawn ding. Political pressure a tamtuk ih Haka kiangkap ih an tuah thotho asilen, hman lemlomi airfield fangfang ah a cang thei.

Chinram airport ahcun NDB tal cu bun thei hai sehla a duhum zet. Asinan, Aviation GPS hmang thiam Pilot pawl cun GPS khal hman theih asi ko. VOR, NDB, ILS le Aviation GPS tivek pawl a hmang thiamtu Chinmi lak khalah kan um ko.

Vanzam ṭumnak tivek thilṭha le thil thupi cu mai’ khua le ram cio ih umter kan duh ṭheh ko ding. Asinan, thilcang theimi asi lo ti kan thei thluh vekin Chinram ah mipi hmantlak dingmi vanzam ṭumnakkhawitawk hmun khalih a um hmanah kan ram ṭhansonak ih ṭulmi pakhat asi ti theithiam in peng tinkim, mitinkim ih lungawi dingmi asi tiah ka ruat.

Comments

comments

4 Comments

  1. lian (native kalay) says:

    thansonak lamzin a khamtu cu mitha lo ti men silo in nuipum sungin suak lo sehla atha sawn ti asi theu.. thuthangtha te in sim i ka lungawi zet,

  2. lian (native kalay) says:

    thansonak lamzin a khamtu cu mitha lo ti men siloin nuipum sungin suak lo sehla atha sawn ti asi theu.. thuthangtha te in sim i ka lungawi zet.

  3. Thang Lian Mung says:

    Hivek thu thatha in hlawmtu parah lungawinak tampi kan nei. Hi thu hi Chin mi zate in theitlang cio sehla ka duh.

  4. CHIN mi hmuah2 lak ih a um mi organization tete ih suah theu mi thu thang ca hmuah2 ah le CHIN mi unau pawl tlan len thei nak ti ih ruah mi website tete pawl khal ih thlah tlak mi ca hram tha a si ee.

Comments

%d bloggers like this: