Vanthatnak Cabuai

kinlan
Danny ih rawldawr cu a tumsuk vivo. Rawleitu an um lemlonak thla thum lai a si thlang! A hlanah cun rawleitu an tamtuk ih a buaithlak lamlam. Tuizanah a paisa zaten a siar fel thluh dingih, ziangzat tak sung hen kei maw? Thaizing cun dawr khar a tum thlang!

Rawl ei tikcu a si ko nan, dawr sungah pa fahnih te lawng an um. Cuhman cu rawl kaan khat an eitlang lai sapbai! Thutam rero mi nauhak te cu a thok ah cun a pa in hnaset a tun san men. Asinan netalam cu ninghmel zet fahranin dai teih um dingin a vun sim.

Culaifangah lukhum khum, mithmai pan lemlo, pacang pakhat dawr sungah a rung lut. Danny in a va hmuak. A thinlung ten,`Tuizan hi dawrtu ka neih netabik le a si awm si, tuahsak thei mi tampi ka nei lo nan, mangbang dingin cu ka tuah thei ko ding,´ tin a ruat.

Pacangpa in rawl a cah hnuah,

“Lungawi, tui na tonak hi vanthatnak cabuai sokhaw a si. Curuangah tui na cah mi rawl hi a lak ih na ei ngah hleiah na duhduh na cah bet thei. A zaten Free theh si mai.”

Danny ih tong mi ruangah pacangpa a lungawi fawn, a mangbang fawn. Hitlukin a vantha ding tin a rak ruat ban lo lawlaw. Danny in rawl a rak ken tikah pacang pa cu a lungawi, a hni siamsi. An kiangih nauhak te cun pacangpai´ cah mi vek rawl a ei duh, a pai´ hnenah a ngen rero. A pa in, `Paisa in a daih lo,´ tiih a vun hro kha Danny tei pahnih khalin an thei.

Pacangpa cun Danny hnenah, “Ka vanthatnak hi mi ka hlawm ve duh,” a tiih, rawl cu nauhak te a va pe. Nauhak te cu a duh mi rawl a hmuh veten a lungawi tukih a khir ciamco. Nauhak teih pa cu pacang pai´ tonak cabuai ah a feh ih lungawi thu a va sim.

Nauhakih pa cu pacang pai´ tonak cabuai ah a va to. Pacang pa in a hmin cu Kuer a si ih Company neitu a si thu a sim. Nang teh tiih a sut tikah nauhakih pa cun mithmai nuam lo zetin,

“Kei cu Marketing Manager ka si. Asinan kan thilri pawl kan zuar cak thei lo ruangah tui thla cem cun na hnatuan na cawl ding in ti,” tin a let.

Cu mi a theih veten Kuer cun, “Cuti maw? A va poi ve! Asinan kan company ah Maketing Manager kan tul cekci. Interview na ra phi sin pei maw?” a ti. Cu pa khal cun lungawi ten Interview ding cu a cohlang.

Ni khat a liam hnuah Danny khal a dawr cu khar hrih loin, nitin vanthatnak cabuai ih a to ngahtu cu, a lak in rawl a eiter theu. Cutin vanthatnak cabuai thuhla cu a darh vivo. Nitin vanthatnak cabuai ih to ngah duh ruangah, minung tampi dawr ah rawl an ra ei. Cutin rawldawr cu mi lutsuak an um ringring thlang!

Kum a rei vivo ih Kuer cu Danny dawr ringringtu ah a rung cang. Rualpi tha ah an cang lanta.

Ni khat cu Kuer in Danny kha, “Hmaisabik na rawl dawr ih rawl ka ra ei laiah ka thinlungah ziang a um ti na thei maw?” tin rinlopin a sut thutthi. Danny a lu a thing. Kuer cun,
“Ngaingai tiah cun khami zaan ah na dawr ah rawl puar koin ka ei ding. Cuthluh in keimah te ka thataw ding tin ka ruat. Khami ni ah ka nupiin ca in rak tan `Nang cu hnatuan lawnglawngah na buai ringring. Ka hrangah caan khal na nei dah lo. Keimah aiih hnatuan thupi sawn ih na ruah ringring hi ka tuar thei nawnlo. Curuangah hokhaw mipa dang dung ka thlun´ in ti. Cumi ca ka siar veten, ka santlailozia ka theifiangaw. Hitluk ka duh mi ka nupi rori hman ka duhdawt ti hi zum dingin ka tuah thei lo. Ziangtluk mi santlailo si ka si? Nungtlak ka si lo lawlaw. Thitlak ka si, tin ka ruat aw.”
Kuer cun a lu a tungih Danny a hnihsan. Cule a tong a pehsal,
“Asinan khami zaan ahkhan, na dawr ih `vanthatnak cabuai´ ah ka rak to ngah ngelcel. A thawk ahcun in capoh menah ka ruat. Sinan in capoh maw capoh lo ti cu tampi ka ruat lo. Cumi vanthatnak kha, ka kiangih nauhak pa te ka hlawm cih. Midang an lungawi mithmai ka hmuh tikah, kei hi midang hrangah thathnemnak cu ka nei lai ko hi teh! ka tiawsal. Cutin nun hram thawksal dingin thuthluknak ka tuah.”

Kuer a zoh ih Danny cu a mitthli a hal tiamti. Vanthatnak ngaingai ti mi cu mai hrang hlawknak si lo, ngahsal duhnak thinlung tel riai loin midang hrangih nun hi a si. Cutin midang hrangin kan nun kan hman tikah nunman nei, mi vantha kan rak si theu.

By/ Nine Nine Sanay
Letlingtu – Mai  Zilthli Lal Nei Thluai

Hminsin; Lungtar Quasquicetennial Magazine ih suah zomi a si.

(Visited 894 times, 1 visits today)

Comments

comments

Comments

%d bloggers like this: