Vanlam Nun Kilkhawi

April 20
Tlawngkai Ninga

Vanlam Nun Kilkhawi

Simon Peter in, “Bawipa, zo ih hnenah so kan feh cuang ding? Kumkhua nunnak petu Ttongkam a neitu cu Nangmah na sisi!” Cule atu cun Pathian hnen ihsin a rami Mi Thianghlim na si ti kha ka zum ih ka thei ngah a si,” tiah a ti.
– Johan 6:68-69

Bible Siar Ding: Johan 6:63-69; 14:1-8

Pathian in vanlam nunnak cu kumkhua nunnak a hawltu pawl hnen lawngah a pe ding. Himi ihsin lamhlapi ah tlan pang hlah. Ziangahtile mi hmuahhmuah kumkhua nunnak an neih ding cu Pathian ih tumtahmi a si. Pathian Fapa ih rin-umnak a si, ih vancung ah an hmin ngan cia in a ummi Pathian ih fatir pawl lungawi aipuang ih an pumkhawmnak ah na thleng zo a si. Mi hmuahhmuah thutthentu Pathian le famkimter zomi miding pawl ih thlarau hnenah nan thleng zo (Hebru 12:23). Cumi cu Pathian ih fahniang thar, sersiam thar, vancungram luahtu dingih ruangzingmi le ziangtinkim remciami a si. Atu ah cuih nunnak cu na thinlung takte’n na hawl a si ahcun sunlawinak sungah na um a si. Cumi cu vanlam nun, kumkhua nunnak, a thianghlimmi nunnak a si. Pathian ih pekmi a si ih zohman in Pathian kut sung ihsin an lon sak thei lo.

Zohman in, “Smith Wigglesworth in kumkhua humhimnak thu a phuang” an ti ding ka ruahsan lo. Ka phuang lo. Ka thinlung sungah cumi hnakih a let thawng tampi in a ttha sawnmi ka nei. Ka phuanmi cu himi hi a si: Ka hnen ihsin in laaksak thei nawn lo dingmi ka nei” timi thu a si (Luka 10:42).

Kei cu Cungnungbik, zaangfah lainatnak, le a cem thei lomi Pathian duhdawtnak sungah ka um zo. Pathian ih mangbangza huham cahnak sungah tlanglengmi ka si zo. Van le lei le ziangtinkim hi Cungnungbik Pathian kut hnuai ih ummi hlir an si. Satan huham cun Pathian ih kumkhua bawi tokham huham hrangah hmun a kian zo. “Mi hmuahhmuah an khuk an bil ding” (Isaiah 45:23), khawsia khuavang hmuahhmuah an khur ding ih Pathian in kumkhua in a uk lanta ding. A tleuvarnak cu a thianghlim lomi pawl parah tletter thluh a si dingih satan huham cu tawpit lo kua sungah kumkhua in thlak a si ding. Aw ziangtlukin so a sunlawi, Jesuh Bawipa kan neih cu!

Sihmansehla, Bawipa taansan ding na hril a si ahcun khui ah na feh ding? Khui hmun ah so kan feh thei ding? Kan taksa ruangpum tonghtham kan duh asile khui ah kan feh ding? Nunnak kan duh asile khui ah kan feh ding? Hmun dang a um maw?

Kan pehzom awknak a tthat le kumkhua sunlawinak ih in tongtham ahcun ziangtluk mangbangza vanram nuam so a si!

@ Smith Wigglesworth

(Visited 22 times, 1 visits today)

Comments

comments

One Comment

  1. Siangte Senhri says:

    Hi tawk ih Peter ih ttong mi hi ka duh tuk. ….hi thu hin ka nun in neh nasa,ka lungawi

Comments

%d bloggers like this: