Vancung ih Tonghthamnak Duhnung

March 25
Zarhpi Ni

Vancung ih Tonghthamnak Duhnung

Bawipa ih hnenah ra uh; Amah cu minung in santlai lo tiin hnong hman hngai sehla Pathian in a sunglawi tiih a hrilmi a nungmi Lungto a si.
– 1 Peter 2:4

Bible Siar Ding: 1 Peter 2:1-16

Mi tampi cun nan ttongsuah hlan ah thu nan ruat taa ti ka thei. Hinah thu maksak a um: “Mi hmuahhmuah in Thuthangtha thu ahcun rinsantlak nan si kha an thei ttheh zo; curuangah keimah khal nan parah ka lung a awi. A thami thu ahcun mifim si uhla a ttha lomi ahcun ziang thei lo si uh ti ka lo duh” (Rom 16:19). Sunglam nun borhhlawh lo, rinlonak khal um lo, a thianghlim, Jesuh ih vanlam nun thawn a nungtu cun raalttha in a zum ngam ti cu ziangkim tithei Pathian in van ihsin a run zoh ti a fiang a si. Hallelujah! “Siatsuahnak zianghman na tong lo ding; Na inn kiangah thiisen luannak a thleng lo ding. Na fehnak hmunkip ih a lo humtu dingah le, a lo kilvengtu dingah Pathian in A vancungmi pawl a ret ding (Saam 91:10-11). Pathian fahniang a taangka ih a umtu cu vanlam nun ih tonghthammi a si dingih khuaitizu vekin a thlummi Pathian Ttongkam cu a nun in nitin a ceen ngah ringring.

Mithiang pawl in Pathian hmai ah ziangtluk ih mi sunglawi an si ti an theih ahcun (Isa.43:4) Pathian ih kilvennak le duhdawtnak thawih umpimi ruat in ihhmu thawzet in an it thei ringring ding a si. Aw, Amah cu a sunglawimi Jesuh a si. Amah cu duhnungza Rundamtu a si. Kan parih a neihmi thinlungput khal vanlam nunnak ihsin rami a si ih Amah in kan thinlung cu mei-alh bangin a kaangter. Amah bangtuk zohman an um lo. Emaus lamzin ih Jesuh thawn khualtlawngtu mi pahnih in, “Kan hnenih a fehlai le thu in simlai ahkhan kan thinlung cu mei alh vekin a hlio si lo maw?” an ti (Luke 24:32). Aw duhdawtmi, cumi cu tuni khal ah na nunram ah a cang theimi a si.

Thlarau Thianghlim in phaunlangnak a suahpi thei ti ruat ringring aw. Thlarau Thianghlim cu thaw (breath) vek a si ti kan theih a ttul, Thlarau Thianghlim cu mi (person) khal a si ih khuaruahhar a sibiknak cu Thlarau Thianghlim cun kan nunnak ah nasatak in hna a ttuan thei ringring timi hi a si. Na luzim ihsin na kezim tiang Amah ih a lo umpit zia na thei thei ding. Aw, Thlarau Thianghlim mei alh ding cu duh a va nung ve! Cutikah kan lei in A hnenah sunlawinak thangtthatnak a pe ding a si.

Nang hi Pathian sunloih thangthat ding na si. Thlarau Thianghlim cu Jesuh maksakzet ih thangthattu a si. “Lehhnu ahcun mi hmuahhmuah parah ka thlarau ka burh ding; Nan fapa le nan fanu pawl in, profet bangin thu an phuang ding” (Joel 2:28). Mi pakhat Thlarau sungih a nun ahcun Pathian sungah mi thar a si.

Zumnak cu Bawipa kan sungih a rung lutnak ding sangka a si.

@ Smith Wigglesworth

(Visited 27 times, 1 visits today)

Comments

comments

Comments

%d bloggers like this: