Vahvaihnak Ram Ihsin Mirang Ram Nuam Australia An Timi Ah Ka Thleng

Vahvaihnak Ram Ihsin Australia Ka Thleng

………………………………………………………….

Ukte Thengre

Kum 15 zikte sung ka umnak Delhi suahsan ngaingai ding cu hreh deuh vekin ka um.  Rak um reinak tiah Vai hlapawl khalin ka lung in kuaizet theu. Thiam le thiamlo in bus to phah le khawlak leen phah ah ka sak ve theu. Mibang in visa le passport ti thepthep thawn ramdang feh ding ka silo ruangah thla khat sung lenglo office hmun dangdang ah feh in khualtlawnnakca pawimawh pawl tuah in leh ka hriselnaklam zohfelnak ah caan ka hmang.

Kawhhran, Khawtlang, Zung hnatuanpi le Calaipawlkom ih ka hnatuanpipawl cun thlahnak in tuah sak ciamco.  Rawl kan kiltlang khawm hlan ah tlamtlinglozet ih ka rak pekawknak pawl parah an lungawizia langternak laksawng phunphun in pe. Felzet bangin ka thuhla pakhat le pakhat hnen in an rel sawng aw zawk rero.  In faknak tongfangpawl ka hnathlam ah an cam thluh lai. Asinan, ka sambaunak pawl cu pakhat te khal an rel lang duh riai lo ticu ka thei ve keukeu.

Salai Van Biak Thang in Ukte kan lo hngilh dahlo ding timi hla a sah lai: New Delhi

Ka Phurh Tuah…

Ka Australia feh ve ding phurh tuah cu kan pipu lomi feh ding phurh tuah hnakin ka buaibai deuh. Ka cabupawl ken thluh a theih lo ding ruangah ka duhbik mipawl kha hmun khat ah ka ret khawm. Ken thluh ka duh lala fawn. Keng lo dingih ka ret cia mipawl ka zoh leuhleuh sal theu.

Ka angki neihmi pawl kha Mirang ram ahcun phurh ciamco a tlak lo ding tiin a mawi deuhbik pawl lawng keng dingah ka hril.  Ka zoh ka bih tikah thuamhnaw tha ngaingai ka rak neilo. Second hand le midangih in rak peksawng vivo mipawl lawng an rak si. Curuangah Australia thleng thei ding cazin ah ka ret thei nawn lo.

Cule, ka neihmi thilri dang pawl khal a sangsangte’n ka zoh derhdo tikah ken tlakmi zianghman ka hmu lo tluk a si. Curori cu, ka innsung khat liailiai in ka rak seek theu. Thilrisia ngainaa ih ‘kan hai leh pangah’ tiih ret tha hmang pawl ka rak si ngelcel. Nupinu hnawk ngaingai thawn danglamawknak kan nei lo lawlaw.

Airport Lam Kan Pan…

Ukte thlahtupawl...New Delhi Airport.

Thlacamnak kan neih hnu ah vanzam hmunlam pan in kan feh suak. Delhi ah ka thinlung ret nawn lo in ka va thlennak ding ram ah ka thinlung ka feh ter thlang. Khatlam ah ka thinlung in Delhi ih harsat ka tuarpipawl then lai a rel thei fawn lo.

Ram thlir ih vak sukso leh sumdawng vekih tlawng dualdo men thei ka si lo tikah a kumtel thenawknak  ni a si ti ka thei. ‘Mangtha’tiih thenawk cu a harsa fualfo. Dunglam hawi sal ngam nawnlo in ka rualpipawl cu ka taan ta hai.

Australia Ram Nuam Timi Ka Thleng…

Rampi hruaitu Prime Minister in rualremnak le daihnak thuhla tawlrel ding ih ram dangdang an tlawnkual vekin cu ka si lo. IOM bag keng phah te’n Malaysia Airport mangtara ihsin Melbourne, Australia Airport ah sungkua rualzet pakhat kaihruai phah in kan va thleng hnuanghno.

Airport ah sunglawizet in parthi orhtu ngaicu kan nei lo. IOM ca-ik kan ken mi khan bawmtul kan sizia a langter vivo sawn ih Australia nu pakhat thauzet cun lungawi soparte’n in rak hmuak. Well come to Australia! in ti. Thank you tinak cang khal thiam lo in ‘zes’ le ‘ok’ kan hmang.  Uite bangin in hruai khulhkho ih counter pawl ah kan thlenthu a sim thei vivo hai. Airport sung cu ngil lengleng a si tikah naal pang kan phang nasa.

Airport sungah kan thuamhnawpawl la dingah a tlarin kan ding. Cutheh in kan thuamhnawpawl a sangsang te’n uicopawl an hnim tir. Ngapih rak keng pang sehla an uicopawl cu vansang an laam hrimhrim ding. Kan thilri an cek ih in zoh tikah Australia rampi siatsuah thei ding terrorist hmuihmel keng kan silo asi hmang ding siangzet cun in feh liam tir.

Ka u tei in kan lo hmuak ding in ticia si khawh, kan hmuhawk ngah lo pang ahcun “bokio” ka si ding tiah airport sangka suah zawngah ka ruat. Sangka ka va suak cu ka u tei thawn hmakhat te ah kan hmu aw ngah. An lungawi tuknak ah mi tampi lakah ring nawn pin in ko. Tu lawng ah Australia ka thleng ngah ti ka fiang.

(Visited 47 times, 1 visits today)

Comments

comments

9 Comments

  1. vanneizing says:

    na ca hram te cu siar a va nuam ve.tluang te na va thleng thei cu kan lo lungawi pi zet.Na hmaikhua tluang vivo hram seh law.

  2. Siar a nuam nasa, a ngantu ih hmuhtawn a si ruangah
    theihthiampitu hrangah cun mithli hman tla zik te rori si.

    Cangantu in tongkam bungrua a hmang thiam zet.
    Ca duhumzet ke ngainuamzet a si.

  3. Calai thiam kutsuak cahram ka siar lo nak ka thei ban lo. Lolam zet thupi ngai2 ih nganthiam le thupi zet lolamzet ih ngan thiam cu cangan thiam ngai2 an si.

  4. Kan Ukte hi cu cangan na thiam thei tuk aw. Siar nuam le zangfah um a rawi aw.

  5. Henry vl Hmangaih says:

    Dear Ukte,
    Na khual tlawnnak lamzin tluan thuhla a thawk ihsin a cem tiang ka siar ih tampi thazang ka ngah. Na um zonak Delhi lam ah nasa takin mipi hrangah na tuan ti mi zuk le an lo seherh , uinak in ka thei thei. Pathian in tui na thlennak Australia khalah lo umpi in lo hmang vivo hram seh.

  6. Hrelh lo ten ka rak siar ve. Delhi lam cun an lo uizet ding. Australia ahcun mithar vek na va si ding fawn. Delhi lam na ngai zet ding ka zum.

    Na cangan ka rak siar theu. Na dinhmun tawite ka rak siar ngah bet. A tawi famkim zet.

    Na tluang vivo ding.

  7. Na taan ta mi rual pi pawl kan dam. Kan lo ngai zet. Kha tawk na thleng hnu na reh tuk kan lo ti rero. Ca in kuat hai theu awla.

    Thuhla kan lo than theu ding. Na cangan dan te cu, zangfah na um ual. Cuvek cu.

  8. Peh lai ding ka zum..bokio …lo nan, mithi thosal vek sinak, Bawipai’ kutcak langnakpawl..

  9. LAI RAWN SUAK ZAHAU says:

    eee…. ….kere…va sung lawi em ve le…..
    Facebook ah tla ca run tlah theu aw la @UKTE
    Ro pi tin maw ka ti mei ke le……hehehehhe

    Sunglawi ro pi ee…

Comments

%d bloggers like this: