USA Ah Fate 5 Kap That

April 6th,2009
 
Indonesia Vanzam A Tla
 
Tuisunah Indonesia ramih Ralkap Vanzam Fokker- 27 cu Bandung Airport ah a tla ih a mi phurhmi Minung 24 cu an thi thluh tiah theih asi. Hi Vanzam hin  Ralkap Special Force Trainee, Parachute hmandan zirlaipawl a phurih ni khua sia lai ah a tla asi. Air Force thupuangtu Bambang Sulistyo in a sim nakah mithi pawl lakah Vanzam hna ttuan 6 Instructor pakhat leh ralkap Training 17 an thi tiah a sim. Indonesia ralkap Vanzam pawlhi an hluntuk ruangah an tla phah phah theuih tui Vanzam tla khalhi kum 30 lenglo hmanzomi asi.
 
US Ah Fate 5 Kap That
 
US Washington State-ih James Harrison kum 34 mi cun a fate 5 a kah that thluh hnuah a mah a kap that aw.Police pawlin an sim nakah James Harrison hi a nupi in a tlan sanih, cumi thin heng ruangah an um nak Trailer House-ih a umpi a fate 5 cu a kapthatih a kahthat mi  a fate pawlhi kum 7 ihsin kum 16 karlak mi an si. Nauhak 4 cu an ih nak ihkhun ah an lu ah a kap hai ih pakhat cu tibual nak Inn sungah a kapthat tiah an sim. James Harrison hin a fale pawl a kahthat nak Rifle hmangin  Inn lengih  Car sungah a kapthat aw ih a ruang an hmuhtiangah a Car engine khal a nunglai tiah palik pawlcun an sim.
 
Barack Obama Turkey Khawpi A Thleng
 
US President Barack Obama cun  nihnih cam dingin  Turkey khawpi Ankara a thlengzo ih Turkey in European Union(EU) zawmve a tumcu a thlawpthu a sim. Mosolman ram Turkey in EU a zawm a si ah cun Mosolman ramdang pawl khal in thinlung thar thawn thuruah nak an neih a beisei thu a sim.  Obama hi tuizan ah Istanbul khawpi a lutsal ding ruangah Security Palik 9,000 ret an si. Himi laiah US huatu mipi ziang mawzat in an lungawi lo nak an rak langter rero.
 
Turkey a luhhlan ah hin Obama cun  Prague ah thu a simih EU leh US cun Mosolman ram pawlcu Ule nau vekih a pawl ngaih a pawimawh asi ati. Mosolman ram pawlthawi theihthiam awknak thukzet kan neih asi ah cun  diklo nak leh thahrum hmangih buainak pawlcu kan do neh ding  ati, Leitlun ih rualrem awk leh daihnak a suah thei nakdingah  Nuclear ralthuam nei hrihlo pawl khalin tuahlo in leh a neicia pawlkhal in tisiat dingin hmalak a ttul a si ati.
 
Gawahati Ah Bomb A Puak
 
Tuisun ah India ram  Gawahati  Airport ihsi Km 15 ihhla Maligaon ih, Julukbari Bazar ah Motor Cycle ih kammi Bomb cakzet a puakih a hmun ah Minung 6 an thiih midang 32 in hriamhma nazet an tuar. NDTV in a simnakah mithi leh hriamhma tuartu pawlhi famkim ten theihkim an si hrihlo ih  khawsung mipawl cun himi hnakih tam an thih an zumthu an sim.
 
Palik pawlin an simnakah hi Bomb puakhi ULFA pawlin an hman theumi IED Bomb a si ruangah  ULFA pawlih puahmi a si an zumthu an sim. Palik pawlin an simbet nakah Maligaon bialhi Bangali pawlih umtam nakbik hmun asiih  cu ruangah ULFA pawlhin State dangmi an duhlo nak an lengter nakleh tui ttum Lok Sabha hrilawk nakdingih Campaign dingin thaisun ah Prime Minister Manmohan Singh in Gawahati a hung pal dingmi rak hrinhro nak asi an zumthu an sim.
 
Himi hnuah tui sun thotho ah  Assam ram thotho Sonitpur Dist, ih Dhekiajuli ah thirleng parih kammi Bomb dang a puakih Minung 6 in hriamhma nazet an tuar. Prime Minister Office cun himi Bamb puak ruangah PM cun Gawahati fehdingih Programme a neihcia micu tidanglam asi cuanglo ding tiah a sim. India Central Cozah cun hi Bomb puahdan hi famkim tei Central ih Report pedingin Assam State Cozah cu thu a pe cihih.  Bomb tipuaktu misual pawl hawlsuak dingin Central Cozah cun Assam State Cozah cu a bawm vivo ding atiah an sim.
 
Italy Ram Ling Hnin
 
Italy ramah Richter Scale 6.3 ih na in Ling a hninih theiban cinah minung 50 an thiih Midang tamzetin hriam hma an tuar. Hi Ling hnin hi Rome khawpim ihsi Kilometre 95 ih hla leihnuai Kilometre 10 ih thuk ihsin a suakih. Hi Ling hnin hin tlangsang zimih L’Aguila khua ih minung umnak Inn 10,000 hrawngcu a cim ter thluh tiah Mayor, Massimo Cialente cun a sim.
Italy Prime Minister Silvio Berlusconi cun ling hninnak hmun cu a pan cihih runhsuah nak hna ttuantu pawlin cakzetih hna an tuan thei nakdingah  Emergency a puangcih ih  Russia ram khawpi Moscow tlawn a tummi khal a ttulsal. Hi ling hnin hin lamzin leh Power leh biak awknak khal tamzet a ti siat thluh ih hna ttuantu pawlkhal in duhvekih cakin hna na tuan theilo.
 
Sri Lanka Ralkap In LTTE 420 That
 
Sri Lanka ralkap pawlcun Liberation Tiger of Tamil Eelam (LTTE) pawlih tannak kawtawp Pudukudirippu khua cu an la thluhzo ih hi khua ah hin LTTE ralkap 420 an that. Ralkap thupuangtu Udaya Nanayakkara, in a sim nakah LTTE pawlih umnak hmun a tawp tiang laksak an sizo ih  LTTE hotu pawimawh ziangmawzat khal thah an si tiah a sim LTTE mi le sa tangsun pawlkhalin Ralkap ih kaih leh thah tuar dinglo cu hril dingdang an nei nawnlo tiah an sim.
 
Pakistan Ah Bomb Puak
 
Mizan sunah Pakistan ram Punjab Provice ih Shia Muslim Biak Inn ah thihcil Bomb a puakih  minung 22 an thiih midang 40 lenglo in hriam hma an tuar. Hi Bomb tipuak tu nauhak kum 15 mite hin Shia Muslim Biak Inn minung 1,000 lenglo um khawmnak hmunih Bomb pailut a tumih Gate kiltu ralkap pawlin an dinter laiah a bomb pai micu a ti puak asi.
 
Shia Muslim pawlhi Bomb thawi thah ringring mi an si ruangah Biak Inn sung khalah kil ringring an siih. Hi Bomb puahnak hmun hi Lo neitu milian pawlih umnak hmun Lahore khawpi pannak lamzin a siih tuihlan ah cun hmunnuam leh hmun thianghlimzet asi. Hi Bomb paitu hin a Bomb paimi hi Biak Inn kulhnak sungah luhpi mansehla minung tamzet an thih zum a si.
 
Himi laiah US ralbawi hlun General David H, Petraeus ih Adviser hlun David Kilcullen cun Pakistan ramih Tapung misual pawlih umdan zohtikah  hi ramcu thlaruk hrawngih siatbal thluh theiding dinhmun ah a ding a si ati. Pakistan ramcu Nuclear ralthuam neileh Al-Qaida pawlih umnak hmunpi a si ruangah Tapung kutsungah a thleng thei mi dinhmun ah a ding a si ati.
 
New York Time thuthangca pakhat cun  President Obama in Pakistan ramih misual Tapung pawl do nehdingih timtuah nak a neih micu a hlawhtlin a zum umtuk lo tiah a tarlang. Pakistan ram ih fehnak ding lamzin cu a thim a si a tibet. Obama ih timtuah mi US in Pakistan ram sumpai tamzet a bawm micu a lenglam cun Pakistan cu a lungawi zet nan  Pakistan ram Cozah hnattuan nak zoh tikah US paisa hin  that hnemnak tamtuk a nei dingah zum a umlo a ti.
 
North Korea Hrem Dingah UN Security Council Lung RualLo
 
Mizan sunah North Korea cun a tum vekin Setellite Rocket cu a kapsuakih ramdang thawn buainak an neih thu theihnak a umlo. North Korea Rocket kahsuak thuhla ruangih UN Security Council in Emergency Meeting a tuahmi cu an thu a rual theilo ruangah thu thluk nak felfai tuah theilo in an tawp. Japan ih ngennak vekin  UN Security Council in North Korea ram thuhla rel tlang dingcu rem an ti tlangih. Asinan US ih timi sumpai bawmnak leh North Korea ram hnenih Ralthuam zuar titawp dingcu  Russia leh  China pawlin nasazet in an el ciamco ih. North Korea in Ballistic Missile kahsuak a tummi kham dingih US in a timi khal hiram pawlhin an relpi duhlo an pawmpi duhlo.
(Visited 63 times, 1 visits today)

Comments

comments

Comments

%d bloggers like this: