US Tlawng Thuhla le Laimi Refugee

(Education System in the U.S.A. for Chin Refugee)

 

By Za Mang

U.S cu mahte cang-ai khawrh (individualism) ram asi ruangah Kawlram vekin tlawng system pakhat lawng a um lo. Cozah/Public tlawng, Private tlawng le Home school tin a phunphun a um. Sumpai lam cu a cozah in a bawm nan State/Pi-ne pakhat cio in an duh dan in policy an tuah. County (kha-yai), city(myo-ne) ti’n tlawng pakhat cio in a duh dan in policy/daan a tuah thei vivo. Refugee pawl kaitam nak bik public school thu kan sim bik ding. Tlawng ca zirnak khal ah zuam dan vekin hlawhtlin ding ti mi daan asi bik ko.

U.S. ah a tlangpi thu’n kum 18 tiang tlawngkai tengteng a tul. Nauhak kum 4 or 5 in tlawng an kai thawk. Elementary School theh in Middle School ah cui hnu’n High School ah tin a um. High School theh in College, University tin a um vivo.  High School tiang cu a free ih kai asi. Tlawng tampi ah kum 21 kim tiang high school zir a theih. Feh tlun nak ah School Bus a um ih tlawng ah rawl an do bet lai. Tlawngrawl a ngah lo. Pelh loih nitin tlawngkai atul ih final result ah tampi mi a bawm thei. Tlawngtlan/rawl asi len nulepa hnen ah ca or phone in an sim thei. Ni 3 tluk theihternak asilole khuandilnak um lo in tlawngkai lo asi len umnak inn tiang an feh. Tlawng hnatuan tupawl in police an ko mei. Nauhak pawl phunhrek ihsin thawk in thusutnak le ruahdan simnak nitin in an nei ter. An sim lai ah upatnak thawn zirhtu pawl in an rak ngai. An sim theh ah zirhtu pawl in “Lungawi/Thank you” an ti. Hihi cawntlak bik pakhat asi. High school an thlen cun mipi hmai ah tihnak um lo in felfai zet in thurelnak an nei ngam cih.

Tlawngta pawl ih an tuahthat mi theihpinak laksawng/award an pe ringring. Nitin pelh lo ih tlawngkai le homework tuah ringring men hman ah laksawng an pe. Nauhak pawl laksawng ka ngah tin an lungawi thei zet. Thlatin tlawngta nauhak ih zirthiam mi le nuncan thansohdan nulepa hnen ah ca an pe. Nulepa le kilkhawitu pawl ih tuah ding  mi pawl an sim tel ringring. Nauhak vuaknak hriamhma thawn an hmuh le zirhtu pawl in police tiang an ko theu. U.S ah zo vek hman vuak awk a ngah lo.

Kum 20 luanzo tlawngkai duh pawl cu U.S thlen ve ten mirangca (ESL) zir thawk asi. Mirangca thiam lo cun tlawngkai a ngah lo tluk asi. GED diploma tla hi college lut nak ah an pawm cuang lo. Entrance Exam ah mirangca (test) tuah thotho atul. Himi test on ta lo len College Level zirmi/subject pawl zir a ngah lo. Maths cu a dang ten Entrance Exam tuah asi ih ngah mi marks/hmat vek in mirangca na on hlan ah college ah Maths na zir thei. Asinan, a dang Science Subject pawl cu mirangca college level on ta lo cun zir a ngah lo. High School theh hnu ah (an mah American mi pawl khal) College Level mirangca an zir ter sal thotho. Cuiruang ah High School theh pawl cu kawlram phun 12 vek an ti kha asi lo.

College hnu cun zir man pek a tul. Mizara’n le refugee tambik pawl cu Community College ti mi public tlawng ah kai asi. Hi hi tuition man ah private college tlawng hnak in a let in a awl deuh. Private College le University pawl ah subject pakhat ah a tlangpi’n semester pakhat hrang ah $1000.00 kiang kap asi. Himi Community College ah cun subject pakhat ah $400.00 hrawng in a ngah. Cu nah, mitam pi cu Community College ah an kai. Mirang tamsawn tla an kai ko.

Community College ah 60 (credit hours) ti mi subject 20 tiang zir a theih. Subject pakhat ah 3 asilole  4 credit hours a um. Kum 2 zirnak tlawng tin sim a theih ih bachelor degree si lo in diploma an pe. Hihi University kum 4 degree or bachelor degree ah ken so vivo asi. University ah a dang a mal bik subject 20 na zir bet a tul. Bachelar degree ngah ding ah a mal bik 120 (credit hours) or 40 subjects theh a tul. A tam sawn in kum 4 ah an theh. Parttime cun kum tampi a tul.

Subject pakhat U.S $1000.00 cem in ziang tin saw tlawng kan kai thei ding tin thin nau hlah. Zuam nak neih cun lamzin tampi a um. Keitla GED ka ong nan ESL in ka thawk ih University tiang pia-khat hman ka cem lo. Nitin rawl, inn man, le thildang cawm awk a tul tlun ah Kawlram sungkhat hrang thawn hnatuan tengteng a tul. Cozah tlawng bawmnak (federal financial aid) le bawmnak dang (scholarship etc..) ngah thei ding in fulltime student si a tul lala. Fulltime timi cu a malbik subject pa 4 zir a tul. Semester pakhat ah subject pa 4 hnak tam zir asi khal len pa 4 tiang lawng tangka pek asi. Company tampi’n an mai hnatuantu/employee tlawngkai duhtu pawl hrang ah TUITION fees or tlawngkai man an pek sak. Cuiruang ah hnatuan hawl tik ah tlawngkai an bawm le bawm lo sut-hliak-hlai a tha. Tlawngkai duh tu cun cuvek tlawngkai nak bawmtu company hnen ah hnatuan a tul. Keitla Fulltime in hna ka tuan ringring ko nan cozah bawmnak Full financial aid ka ngah thotho. Kumkhat ngah mi a mal tuk tik ah mi fa-rah (lower income) sung ah ka um thotho.

Ramdang pakhat khat ah B.A or B.Sc bachelar degree pakhat khat ngah zo mi cun U.S. cozah bawmnak (Federel Financial Aid) ngah a theih lo. Kawlram ih degree kha a leng ah na hmang thei cuang lo ding. Cumi bawmnak ngah duh cun Kawlram degree ngah khal len ngah lo ti a tul. Na thuthu asi ko. Kumkhat ah Public University ah zirman $10,000.00 tluk a cem. Hi mi bawmnak in tuition man a tuang thluh thei. Student Loan tangka cawi atheih ih tlawng cawlh ihsin thla 6 a kim in rulh sal a tul. Kumkhat lawng kai in tlawngcawlh asi khal len thla 6 cem in pek thawk a tul. Cawimi a hrek lawng a pungthang (interest) an la. Interest rate cu 8% hnak ih tam lo ding tin daan an tuah. Zovek khal in pek sal tengteng a tul.

Nulepa le lairam hrang ah tlawngkai in fimthiamnak zir a tul. Laimi kan farah tuk. Sumpai lennak in zohman kan bang thei lo ding. Fimthiamnak lawngin mi kan zuam thei. Ke-dil tha tiang suah a tul. Midang nuam zet ih caan an hman lai le khawp ko ih an itthat rero lai ah na itthat man lo ding. Fulltime tlawng kai le fulltime hnatuan in zankhat ah nazi 3 or 4 hrawng it nak caan a um. Class ah mal te kekki zir asi ih homework bawmpikhat mi an pe. Vawitampi rawl na ei man lo ding, social life nei in pawlkawmnak na tel man lo ding. Asinan, final exam na theh zan cu cuvek har buai nak(stress) hmuahhmuah cu thengre vuakthlak vek in a hlo viarviar ding. Cun, na tlawngkainak ih hlawkbik tu ding cu nangmah na si. Malaysia na um lai ah um men lo in mirangca zir aw. Ka sim zo vek in US ah tlawngtin in a duh dan in daan le dun a tuah thei ruang ah khaw dang tlawng dang tampi ah tui ka sim vek an si lem lo ding. A tam sawn cu an bangaw ko ding. Ka ton ka hmuh mi ka lakkhawm mi asi. Kan peh bet vivo ding.

(Visited 367 times, 1 visits today)

Comments

comments

5 Comments

  1. Chin Hero,

    Na post tha tuk.
    Theih tul tuk mi a si.

  2. Salai Puih Puih says:

    Siar tlak mi ro ri si..Na ngan tha na sa..

  3. Na ca ngan mi a tha tuk. Ca tampi ngantu ding na si.

  4. ka lungawi na sa, Bible tlawngkai theidan thuhla lam rawn ngan leh aw

  5. A tha tuk a thei rih lo pawl hrang ah theih teng teng ding mi pawl an si

Comments

%d bloggers like this: