US Ram Ai Awh Tu Burma An Tlawng

US Ram Ai Awh Tu Burma An Tlawng

US Deputy Secretary Of State, Scot Marcial leh Assistant Secretary Of State, Kurt Camplell cun  Burma ram ralkap Cozah thu neitu pawl leh Aung San Suu Kyi tongdingin Mizan sunah Burma ram an thleng.Hi US  mi pawimawh minung 2 in Burma an tlawn naksan hi US President, Obama in Burma ram ralkap Cozah cu hremnak ti tawpih biak awknak ih dawr dingih a rak simcia mi thu bawhzui dingih feh an si, Hite pahnih hi kum 1995 hnu ih US ram mi pawimawh Burma ramih tlawng hmai sabik an si.
Burma ralkap Cozah thusuah nakin a tarlang nakah hi US mi pawimawh pahnih hin Aung San Suu KyiBurma ram hotu General, Than Shwe cu an tong theilo dingih Burma Foreign MInister, Thein Sein  cu Burma ram khawpi thar Naypidaw ah an tongding tiah an sim. Himi hnu ah Aung San Suu Kyi tongding in Rangoon an pansal ding.
Himi laiah National League For Democracy (NLD) thupuangtu Nyan Win cun  US ram mi pawimawh pawlin Burma ram an tlawn nakcu ram pahnih karlak ih rualrem awknak lamzin an hawl thok zikfang a siih, Asinan ram pahnih karlak rualrem nakhi ol ai tei tuah tthat thei ding a zumlo thu a simih, thinlung sangka ong zet leh zalen zetih be aw dingcun tikcu caan rei deuh hngah a ttul dingih a zum thu a sim.

Iran Nuclear Thuhla

International Atomic Energy Agency (IAEA) Director General, Mohamad Eibaradei cun  Iran in Nuclear ralthuam tuahnak ding Uranium a neihmi cu Nuclear ralthuam tuahnakih hmanglo dingih US, France leh Russia ram pathum in an nawr nakcu Iran in a pawm tengteng ding a si a ti.
IAEA hotu cun Iran in a ram dinhmun tuah tthat a duhih  ni tlaknak lam ram pawl thawi rualrem awk a duh a si ah cun ram lian leh ram thilti thei ram pathumih an nawr nakcu a ti hlawhtlin sak a ttulih, Iran in Nuclear   ralthuam tuah a tum ruangih ram dangdangin dung an tun nakcu zohfiang aw thiamin,  tui tikcu caan ttha a neih mihi pelhpeng ter lo hram sehla a duhthu a sim.
US Secretary Of State, Hillary Clinton khalin  Iran in a Nuclear tuah nakding thu ih ram pathum in an nawr nakcu pawm maisehla a hrangih thil ttha umsun a siih, Iran an nawrnak thu hi sutkir sal theih a silo a ti. British Foreign Secreatry, David Miliband khalin  ram pathum ih an nawrnak cu Iran in pawm hran sehla buainak tampi a pumpelh dingih a zum thu a simve.
France Foreign Minister, Bernerd Kouchner khalin  Iran hnenih an thil phut micu Iran in a letnak thu an hmuh zamrang a beisei thu a simih,An nawrnak thuhi Iran in a let zamranglo a si ah cun  nitlak nak lam rampawlcun tikcu caan reipi hngah ringring cu  an remtilo ding a ti.
US President, Obama khalin  Iran hin lehhnu ih thil rathleng leh dingmi leh  tikcu can remcang a neih mihi fimkhur zetih zohfiang awin himi ram pathum ih nawrnak hi  let zamrang dingih a duh thu leh tui tikcu caan ttha a neih mihi hmang ttangkai sehla a duhthu a sim. Himi thuhi Obama cun  kum 1979 November ni 4 ih Iran ram khawpi Tehran ih US Embassy Muslim tlanwgta pawlin an siatsuah nak kum 30 a kimnak tikcu US ih an hman nakih a simmi a si.
Himi laiah Iran Foreign Minister, Manouchehr Mottaki cun  Iran in Uranium a neihmi 70% ramdangih kuatsuak dingih ram 3 in an nawrnakcu sutkir salih tidanglam dingin  tihni sunah IAEA hnen ah an thlenzo thu a sim ve ih, tui a nawrtu ram pathum ih duhdan vekih an thlun a si khalle  Nuclear tuahnak thilri an neih mi pawlcu Iran Cozah duhdan in a feh thotho dingih  himi thu ah ram dang duhdan hlir thlun dingcu Iran ram hrangah a remlo ding a ti.

Fiji Ram Cozah In Dawi Suak

Fiji ram Cozah cun mizan sunah khan  a ram sungih Austrlia ram palai leh New Zealand ram palai cu nazi 24 sungih Fiji ram suahsan dingin thu a pe. Fiji ram hotu Commodore Bainimarama cun  an ram inn hnen Australia leh New Zealand cu Fiji ramsung thuhla ih rolh aw tukah a puh.
Fiji ram hruaitu Commodare Bainimarama hin Fiji ramih mipi rorel nak Cozah cu kum 2006 ah khan ralkap cahnak hmangin a hlawn thla ih a mah in thu neihnak a co. Cu rangah a mah leh a mah thu neihnak a pekawk dancu an ram court in a diklo tiah thu a suah ruangah an ram court thu reltu pawlcu a hlawn thluh betih  cumi pawlih ai awh tu dingah Sri Lanka ramih Judge pawl laklut a tumih, Australia leh New Zealand in an sawisel ruangah an ram palai pawlcu Fiji ramih si a dawisuak nak a si.
Australia leh New Zealand hin Fiji ramcu hna kumih hrilawk nak tuah dingin an nawrih, Asinan  Fiji ram hotu  pawlcun  kum 2014 hlanah cun an ramih hrilawk nak tuah an tumlo thu an simve.
Fiji ram ralkap Cozah in hiti vekih Australia ram palai leh New Zealand ram palai an ramih si a dawisuak ruangah Australia leh New Zealand khalin tuisun ah  an ramih Fiji ram palai cu an ram suahsan dingin thu an pe ve ih, Australia Foreign MInister, Stephen Smith cun  Fiji Cozah thiti mi ih a lungawilo thu a simih, Fiji ram Cozah thu neitu pawlin an ramih mipi rorel nak Cozah an din duh a si ah cun  Australia cun biak awknak nei dingin a thinlung sangka a ong ringring a si a ti
(Visited 45 times, 1 visits today)

Comments

comments

Comments

%d bloggers like this: