US Ralkap Pawlih Sa Uite In Ei Ding

February 24, 2009.
 
Norht Korea In Rocket Kap Suak Ding
 
Communist ram North Korea cun  Vansangih biakpawp awknak Satellite phur Rocket kahsuak a tumthu a puangih Ziangtik ciah ah a kapsuak dingticu a puangsuak duh hrihlo. Hi Rocket a kapsuak thei taktak asi ah cun North Korea ram hrangih hminsin tlak tthanso nak pakhat ih ruahtheih asi dingih, Himi hin hmunhlapi kapban Missile kahsuak sal a tum ti a khih hmuh dingah zum asi. Kum 1998 ah khan North Korea hin Taepodong-1 Missile peng 4.200 kapban pawlkha a rak kapsuak zo ih. Taepodong-1 Missile khan  America ramih Alska a kapban ih ruah asi.
 
Tu ah hin biakpawp awknak  satellite phur  KwangMyongsong- 2 cu Vansangah kahsuaksal a tumsalih. Hi Rocket hi an ram saklam Hwadae ihsin kahsuak an tum asi. North Korea ih umdan leh thiti dan pawlcu leitlun ramdangdang pawlin an thir in an zoh thla ringringih. US  Secretary of State Hillary Clinton khalin tuikandung zarh ih Asia ram a tlawn ah khan  North Korea cu thil tthalo zawng leh leitlun ramdang leh ram In hnen pawlih um nuamlo zawng ih thilti loding in a raksim zo.
 
Japan PM Washington A ThlengZo
 
Japan ram Prime Minister Taro Aso, cu  America ram tlawngin Washington khawpi a thleng zo ih.  Ramdangmi White House ih President Obama tlawng hmaisabik a siding. US Secretary of State Hillary Clinton cun  kandung zarhih Tokyo a feh ttum ah PM Taro Aso hi tawngin thu a rakrelpi zo ih. Japan leh US ram pahnih rualpi that awknak leh pehtlaih awknak a tla niam deuhvek a bang ruangah. Tuhi a tharih biak awknak leh rualpi that awknak tuah an tum salih zum asi. Japan leh US rualpi that awknak leh pehtlaih awknak a siat deuh naksan hi George W Bush in North Korea cu tapung leh Misual pawl bawmtu ram cazin ihsin an hmin a hlawn ruangah Japan hi a lung a awilo nasa ih. Japan cun North Korea cu  ngaih thah mending mi asilo a ti. Cui tlunah Asia thlanglam ram ih Japan ram pawimawh nak leh ropit nak hi China in a khuh deuh thlang ruangah asi thei tiah ruah a si.
 
US Ralkap Pawlih Sa Uite In Ei Ding
 
Al-Qaida Tapung hotubik sangtu Ayman Al-Zawahiri ih thusim mi tihnisun ih an tisuak miah  Somalia ramih Islam tapung ralkap pawlih hnattuan dancu cawimawi tlak an si tithu sim in a fakzetih Somalia ramih Al-Qaida pawlih hnatuan danleh thil fehpi dan cun Islam pawlih hnattuan nak leh thilti mi a dikzia langter in lamzin tluang a zawh vivo lai timi lang fiangter tu asi tiah asim. Ayman Al- Zawahiri cun Yemen, Gaza, Afghanistan leh Pakistan ram pawlih dinhmun sim betin leitlun ih misualbik leh zohman ih ngaihlo mi ram US cun a ralkap pawl  Afghanistan ih Taliban leh Al_Qaida pawl doding ah kuat a tumih  a thil tisual leh a sir awkding mi thiltum bik a si ding ati.US ralkap pawlhi Afghanistan ihsin America ah nungdam in pakhat hman an kirsal ding asilo  Afghanistan ih Uite pawl ei dingah US in a ralkap pawlcu a rakkuat a si a ti.
 
CNN in a simnakah Ayman Al-Zawahiri ih thusim hi a mah taktak asi pei maw tihi thei fiangnak zianghman a umlo nan Tuihlan ih a thusim mileh a aw phawidan thawi tahthim in Ayman Al-Zawahiri ih aw a bangzet tiah a sim, Ayman Al-Zawahiri ih thusim mihi tuikum sungah vawithum anti suaknak asiih. A hmasa ah cun Gaza ih Hamas pawlih thilti dan ttha a tithu leh thazang a peknak thupawl a sim. Ayman Al-Zawahiri cun Yemen ram khalah Islam mipi pawlcun thinlung thlak thleng awknak an nei vivo zo ih. Yemen ramhi Soudia Arabia ihsi Al-Qaida mi lehsa  Cozah kaihttih ruangih minung thawngtel an tlan khawmnak hmunpi asiih. Hi pawl lakah Guamtanamo Bay ih thawngtla zo pawlkhal ziang mawzat an telsal tiah a sim. Al-Qaida hotu pa cun Yemen President Ali Abdullah Salih leh a cozah hnattuantu Upa dang pawlcu America ih Zawng um leh a salrual an si ih America thu hnuaiah an kum ringring a si ati.
 
Ban Ki-Moon In Suu Kyi Suah Ding IN Ngen
 
UN Secretary General Ban Ki-Moon cun  Burma ram ralkap Cozah hotu pawlcu Politics ruangih thawngtla pawl suahthluhsal dingin an ngen salbetih,Thu tiamkan awknak zianghman tuahter loin Opposition party hotu pawlkhal be ding in a ngencihbet. Ban Ki-Moon cun Burma ramih fehsal khal a ello thusim betin. Burma ramih mipi zalen nak leh thilttha a suah thei  nak dingah Ralkap Cozah hin Opposition hotu pawlhi a hrengbet ringring ding asilo a ti.
 
UN ai awhin lbrahim Gambari khalin tui naite ah Burma ramhi a feh rero zo nan  thilttha zawngih thlakthleng awmi hmelthar hmuhding ziang hman a um cuanglo a ti. UN cun Aung San Suu Kyi leh Politics ruangih thawg thlak mipawl minung 2,200 lenglo pawlcu suahsal thluh dingin leh hnakum ih Burma ram hril awknak dingah mipi zalen nak leh hril awknak diktak ih tuah dingin a ngen.
 
Obama In Helicopter Dang A Tullo A Ti
 
White House hrangih Helicopter thardang tuahbet ding thuthawi pehpar aw in  Mizansun ah Cozah Upa pawlin hithu hi White House ah reltlang khawmnak an neiih.  Republican leh Democrat Upa mi pawimawh pawlin President Obama  thusuh nak an nei. Hi thusut tu mipawi mawh lakah hin President hril awklaiih a mah rakcuhtu Senator John McCain khal a telih  John McCain cun ralkap leh ralthuam lan hrangih sumpai tamtuk cemter cu ttah a tilo thu a sim ih. Tu khal ah President ih hmanding Marine One Helicopter an timi vek pawl Phun 28 Lockheed Martin Corporation- in a tuah rero lai tiah a simih. Himi hrangih sumpai cemding zatcu dollar Billion 11.2 thazet asi dingruangah  President ih Vanzam Air Force One hnakin senso a tam sawn dingtiah John McCain cun a sim.
 
President Obama cun White House ih Helicopter cu tha a tithu leh a duhtawkthu sim in Tui hlan khalah Helicopter a hmandahlo thu leh tui a neihlai miih a lung awi tawkthu khal a sim.  .Cun tui hlan khalah Helicopter hi a nei dahlo ih tuihnu lamkhal ah neilo sehla a danglam nak a um cuanglo ding thu khal a simbet. Himi thuah Defence Secretary Robert Gates khal relpi ih zohfel sal a duhthu khal Obama cun a sim.
 
LocKheed Martin thupuangtu Troy Scully cun, Tui White House ih Helicopter pawlhi kum 30 lai hmanzomi an siih. Tui a thar an tuah dingmi pawlcu tulai thiri tthabik leh Missile lakkhal ah him thei dingih thilri tthabik pawlthawi thuam an si dingih  Air Force One hnakin a niam cuanglo ding thu a sim.
(Visited 95 times, 1 visits today)

Comments

comments

Comments

%d bloggers like this: