US Ralkap Pawl In Bin Laden Ih Umnak Kulh

March 16th, 2009
 
US Ralkap Pawl In Osama Bin Laden Ih Um Nak Kulh
 
Septembet 11, 2001 ih US World Trade Centre Vanzam ih Ttaih ih  Minung 3,000 lenglo thihnak ih mawhphurtu Al-Qaida  hotu, Leitlun misual hnawksak ih ruahmi  Osama Bin Laden cu kum ziang mawzat sung  US Cozah leh NATO pawlin an hawl rero hnu ah a relhnak hmunih theihsuah mi Hindu Kush hramlak khamrang sengse zet Chitral bial ih tacu US ralkap pawlin kai ngah tengteng dingin an kulh rero lai a si tiah an sim.
 
New York Daily News in a sim nakah tui dinhmun ah Osama Bin Laden cu midang duhtawkih feh sukso theilo nakhmun Chitral thingtlang  thupkawm khamrang sengse zet lakah a umti US Cozah cun an thei fiangzo ih. US ralkap pawlcun kaisuak tengteng dingin an kulh lai rero ih himi hmunah hin midang zohman fehter an sianglo ih. A relh nakhmun hi  US ralkap pawlin raldo nak Vanzam Pilot umlo Drone thawn tlangtluan leh hawrkuam tinkim an kil ringring tiah asim.
 
Himi laiah Pakistan Intelligence thupuangtu cun kandung kar tlawngkai nilizan ah khan US ralkap Vanzam Pilot umlo Drone cun  Pakistan ram leh Afghanistan ramri Pakistan ramsungih  Chota Tamikhel khua ih Al-Qaida leh Taleban pawlih umnak Training Camp picu Missile in a kapsalih minung 24 hnakih mallo an thi tiah asim. himi hmunhi Taleban pawlin zohman feh theilo dingih an kham ruangah minung zianghmuah an thi ti leh ziangvek thil a thleng tikhal theifiang nak a umlo tiah asimbet.Hi US Vanzam Drone hi pahnih an siih an zuamthawm an thei hlanah an Missile cerek cun Taleban pawlih Training camp hi a rakkap thlengzo ih Taleban pawlih Training Camp Inn hmun 7 a kapsiat asi.
 
UK Siang Pa Hrang Tupa Pahnih Thah Tum
 
British Siang pa hrang tupa pahnih  Prince William, leh a nau Harry, cu  IRA pawlin thah an tum tiih thu theih asi ruangah an U nau hnih in tthazetih kilhim an si. Scotland Yard cun hite U nau hnih British ralbawi veve hi IRA pawlin thah an tum rori asi ti theih fiang asi ruangah an mah kiltu khalhi tamsawn ih ret an si tiah asim. Kan dung zarhih IRA pawlin ralkap pahnih leh Palik bawi pakhat an thah ruangah  hite U nau khalhi thazet ih kil an siih  William, leh Harry hi an Duty lo canah cun London khawpi sungih an lenve ttheu ruangah khawlak khalih kahthat thei ringring an siih cu ruangah  fimkhur zet a ttul asi tiah  Scotland Yard cun a sim.
 
Taxi Mawngtu In Nunau Ih Pi Tam
 
Britain ramih Taxi mawngtu John Worboys kum 51 micu an ramih nunau pawngsual tambikih relsuah asiih. Nunau 200 lenglo a sualpizo tiah an sim, Hipa hin Nunau a phurhmi cu rit theihthil pe in an rit ngah ciamciam in mawtaw dunglamah a sualpi ttheuih. Nunau pawlin an thil ritmi a rehhlan ah vawihnih vawi thum tla a sualpi tiah an sim. Himi pa hi tui kandung zarh ah London khawpi ah kaih ngah asiih  tutiangah nunau 85 hrawngin hipa ih a sualpi thu an phuangzo.
 
Israel Ram Politics Din Hmun.
 
Kandung thla ni 10th, ih hril aw Israel Parliament Seat 120 umnak cu tutiangah Cozah dinsuak thei  hrihlo  asi hnu ah. Kum 1990 hrawngih Israel Prime Minister rak ttuanzo tu  Likud Party hruaitu Benjamin Natanyahu cu Yisrael Beiteinu Party thawi Cozah tuah tlangding ih thuthlung an tuah ruangah  Israel Cozah tharih Prime Minister asi salding. Benjamin Natanyahu ih hruaimi Likud Party leh Yisrael Beiteinu Party in Ttangtlangih Cozah an tuahtlang ruangah Yisrael Beiteinu Party hruaitu Avigdor Lieberman cu Israel Foreign Minister asi dingih. An ttuanpi Party dangih minung 5 cu Cabinet Minister ah lakluh an si ding.
 
Banjamin Natanyahu hi April ni 3rd, hlan ah Israel Cozah thar dinsuak dingih canpek a si. Himi laiah Cozah hlunih Foreign Minister Kadima Party hruaitu  Nunau ropi zet Tzipi Livni cun an Party cu Opposition lamih ttangin Israel ram leh mipi hrangah  Opposition ttangkai zet si a tumthu a simzo.
 
Iraq Ram Mipi In Ram Dangmi Ning
 
Kum 2003 ih US in Iraq ram a siim hnuah Iraq ram buainak cun daih lam a pan vivo ih. Iraq ram mipi tamsawn cun buainak leh do awknak ih an nunnak humhim nakding thu hnakin  an ei leh in hawl nakding ah an thinlung leh an tikcucan an hmangthei thlang tiah an sim. BBC,ABC News leh NHK, ttangtlang pawlin tui kandung thla ih Iraq mipi ngaihdan an lakkhawm nakah. Iraq mipi pawlcun an hmailam tikcucan an hmannak dingah tikcu ttha an tawnding beisei nak sangzet annei ih. Cumi laiah Iraq mipi pawlcun an ram kaihhruai awknak dingah leh an hnattuan nakdingah ramdang mi an hrawlh aw tamtuk cu an ningzet tiah an sim.
 
Iraq mipi in Ramdangmi an nin bikmi  lakah US leh UK cu a langsar bikpawl an si. Iraq mipi ruahdan latu pawlhin Iraq ram Province 18 sungih sin minung 2,228 pawl hnen ihsin thusuh nak an neiih. An thusuh nak a sanglet tu pawllakah minung 85% cun  Iraq ram dinhmun cu tu ah cun a ttha vivo tiah an theiih.  Cumi lakah 8% cun Iraq ram buainak cu Nikum hnakin tuikum ah a sesawn tin an sim. Mipi tamsawn cun tuihlan ih Bomb puakleh Thah awk  do awk, miphun leh miphun do awknak leh thah awknak khal a zia um vivo tiah an sim.
 
Pathian cu Kancah nak a si.
 
(Visited 169 times, 1 visits today)

Comments

comments

Comments

%d bloggers like this: