US Ralkap Ko Tlung Sal Ding

February 28,2009.
Iraq Ram Ih US Ralkap Ko Tlung Sal Ding
US President Barack Obama in thla 18 sungah Iraq ram ihsin US ralkap Raldo pawl 90,000 hrawng cu US ah kawhtlung thluh an si ding tiih a puan hnuah. Iraq Cozah cun himi tikcu ah cun Iraq ralkap pawlin an ram cu an kilhim theiko ding tiah an sim. Iraq Prime Minister Nouri Al-Maliki,khalin Iraq ram kilhimtu dingah an ralkap pawlcu a rintawkthu a simbet.
President Obama cun North Carolina ih ralkap hmunpi ih thu a simnak ah  hnakum August ni 31 ah cun Iraq ramih US ralkap raldo tu pawlcu kawhtlung thluh an si dingtiah a sim. Tu ah hin Iraq ramah US ralkap 1,42,000 an umih mihi sungah raldo ci 90,000 an siih Hi pawlhi hnakum August 31 tiang sungah kawhtlung thluh an si dingih culo dang 50,000 hrawng cu an um hrih dingih an zaten kum 2011 kumcem zawngah Iraq ihsin US ralkap pawlcu US ramah kawhtlung sal thuh an si ding.
Bangladesh Ralkap Pawlih Thlan Hmuh Suak A Si
Relzo vekin Bangladesh Rifle (BDR) pawlin buainak an tuah nakah minung 100 lenglo an thi ih Ralkap Officer 70 tel in midang 130 cu an umnak leh an dinhmun zianghman theihnak umlo in an hlo ih. Tuizing ah Dhaka khawpi ih hmun thupkawmte ah mitamzet phum theinak thlan pathum hmuhsuak asi. Hi Thlanah hin ralkap Officer pawlih  ruang 50 hrawng a tel dingih zum asi. Cui tlunah tidai luannak Li hawng sung khalah ralkap Officer ruang 25 hrawng hmuhsuah asi tiah ralkap hotu  Sheikh Mohammad Ahahjalal cun a sim.
Thlan sungah hin ruang zianghmuah a um tihi theih fiang asi hrihlo ih (BDR) ralkap pawlih thilti dancu a rapthlak zet ticu a fiangih minung ruang pawlhi an sawp parh niai niai ih an rimkhal a sezetzo. ih mihrek khat tla cu an lutan mikhal an um, Tuizing ih ruang an laksuah mi lakah  (BDR) hotupa Maj General, Shakil Ahmed, ih nupi Nazneen ih ruang khal a tel ih an fapa ih dinhmun leh thuhla  umnak pawlcu theih a si hrihlo. Hi tivek ih minung phumnak thlan tampi hmuhsuak asi tikah Bangladesh mipi leh Cozah lam thinheng nak cu a sosang sinsin ih  Prime Minister Sheikh Hasina ih Cozah cun misual pawlcu hremlo ih an suah tumlo thu sim in  misual pawlcu an mahle an sual nak vekih hrem an si nakdingah Special Tribunal, khal an dincih. Prime Minister Sheikh Hasina,  ih Principal Staff Officer Lt General Mohammad Abdul Mubin, in mizan TV ih a simnak ah  Tuihlan ih Cozah in ngaidam nan si ding a timi ah thilsual dangdang tuahih tel pawl a huamtel lo tiah a sim.
Israel Cozah Dinhmun
Mizan sunah Israel ralkap pawlcun Gaza ih Hamas pawlin a thuptei ralthuam an lakluh nak hmunpi lamzin cu Missile in an kah siatsak salih. Israel leh Hamas pawlin rualrem nak Ceasefire an tuah sungah hin Hamas pawlin a thupten ralthuam hi an lalut theuih Israel kahnak ah a hmang theu ih  Cu ruangah Israel hin an ralthuam laknak hmun leh leihnuai zinpi a kah siatsak nak theu asi.
Cumi laiah Israel Cozah tuah dingih  President Shimon Peres, in a sawmmi Likud Party hruaitu Benjamin Natanyahu, cun Cozah tuahtlang dingih a sawmmi Kadima Party hruaitu Tzipi Livni, thawi an biakawknak cun zianghman rahttha a suahpilo thu a sim.Cozah tuahtlang dingih Benjamin Natanyahu in a sawmnak cu Tzipi Livni cun a el thlak thu a simih.  Cu ruangah Israel ram Cozah thar hi ziangtik ah a dingsuak ding tihi relthei asi hrihlo. Tzipi Livni cun Likud Party hruaitu Benjamin Natanyahu hoha nakih Cozah tuah tlang ding hnakcun Opposition lamih um a duhsawn thu a sim fiangzo ih. Tzipi Livni cun  West Bank leh Gaza lamih Palestinian ram tuah fel lawlaw a duh ih. Asinan Likud Party leh Party dangcun himi policy cu an pawmpi theilo ringring mi asi.
Tzipi Livni hi tu ah hin Israel Foreign Minister ttuanlaitu nunau ropi zet asiih Israel leh ramdangl an biakawk nak khalah Israel ram aiawh ih a thlah theu mi asi. Likud Party hruaitu Benjamin Natanyahu, khalhi Israel Prime Minister rak ttuanzo mi kawlhsen leh miropi zet Palestinian pawlin a duhlozet mi asi.
India In Mahatma Gandhi Ih Thilri Zuar Sianglo
India Cozah cun an ram rakdin suaktu Mahatma Gandhi ih thilri neihmi  a Tarmit, a Kedam, a Nazi, pawlcu  America ih kuatih Lilam dingah rem atilo ih. India Cozah cun himi neitu cu bia in ramdang ih kuatding ai cun India Cozah hnenah pe dingin an dilding, India Cozah ih dilnak hi a neitu in a duhlo ih ramdang ih a kuat thotho asi khalle Lilam nak a tuahtik ah Zo hmanih leilo dingin India Cozah cun dil a tum thotho ih. Himi cingih a neitu in a remtilo thotho asi len. Ram lengih India mi-milian pawl leiter ih  India hnenih pesal dingin an diltum asi.
Zimbabwe President sawisel
Zimbabwe President Robert Mugabe, cu an ram mipi pawlin hnattuan ding leh i le in ding an neih lo ih an harsat zet laileh, Tihri natnak in an ram mipi tamzet a thihter laiah a kum 85 kimnak a suahni lawmnak ding cu ropi zetih tuah a tumih. A suahni lawmnak dingah hin a mai lamttang pawlthawn paisa an khawng ih Dollar 2,50,000 lenglo an khawngzo tiah an sim. Relzo vekin Zimbabwe ramhi mipi 90% cun hnattuan ding an neilo ih,  an ram mipi a hrekkhat hrawngcu ramdang tlawmngai pawlih bawmnak ringih nungmi an siih. Cu ruangah Africa ram dangdang ah bawmnak  dollar Billion 2 hrawng an dil rero lai a si, Cumi lai ah hiti vekih an President in a suahni lawmnak dingih an ram mipi hnenih paisa a khawng cu mipi in an sawisel zet asi. President Robert Mugabe, ih suahni lawmnak ah hin Prime Minister  Morgan Tsvangirai, khal a tel dingih zum asi.
Colombia Ralkap pawlin Ei Negro Antonio An Kai
Mizan zingah Comlombia ralkap pawl leh Marxist tapung pawlcu Cundinamarca bialah an kap aw ciamco ih. Ralkap pawlin Tapung 10 an kapthat ih minung 8 nungdam in an kai. Ralkap pawlin nungdam ih an kaih ngahmi sungah an hotupa minung rukhlo hmangzet Ei Negro Antinio khal a tel. A mahhi ralkap pawlin kaih tumih kum tampi an rak hawl rero zomi asiih.  Ei Negro Antonio hin tuihlan ah tui an kah awknak hmun ihsin minung tampi a rakru hlozo ih Tapung pawlih umnak hmun hramlakah a rak hruai hlo theu asi.
Hi an kah awknak hi tapung pawl lamzin ih an fehlai khawvang zawngah ralkap pawlin an rakbawh ih cumi ih kapaw an si. Hi Tapung pawl lakah nunau pathum an tel ih hi nunaun pawlkhal in  AK 47 meithal thawn ralkap pawlhi an kap ciamco ve asi.
Pathian Cu Kancah nak a si

Comments

comments

Comments are closed.

%d bloggers like this: