US Ralkap Kap Aw

US Ralkap Kap Aw
 
Theihzo vekin tihni sunah  US Texas ih ralkap umnak hmunpi Fort Hood ih ralkap pakhat Major, Nidal Malik Hasan kum 39 micun a rualpi pawl ih um menlai cu a kap ciamco ih ralkap 13 a kapthat ih midang 30 in hraimhma an tuar. Himi veten a kiangkap ih ralkap dang pawlin a mah khal an kapcih ve ih a taksa ah cerek pali a lutih tu ah hin sii zungah bese zetin tuamhlawm rero lai a si.
 
Hi Major Nidal Malik Hasan hin ziangruangah a rualpi a kap ti theihfiang nak a um hrihlo ih, Asinan a mai sungkhat Nader Hasan in a sim nakah  Major Malik Hasan hin Iraq leh Afghanistan ih feh  a duhlo ih, tuihlan ihsin Iraq leh Afghanistan ih fehlo dingin  ralkap thu neitu pawl hnenah a rak dil ttheuih, Asinan tui ttumah Afghanistan ih kautdingah a hmin a tel ih cu rangah hiti vekih buainak a tuah a si dingih a zumthu a sim.
 
Himi hmunih ralkap hotu Lt, General, Bob Cone cun himi buainak ah hin midang rolh awknak a um leh umlo zinzoi rero lai a si a tiih, President, Obama khalin himi buainak rapthlak thlengcu pawl a tithu leh mithi sungte pawl a tuarpi thu a simih , Iraq leh Afghanistan ih US Ralkap tampi an thihnak ih US mipi pawlih thinna ih tlunih hiti vekih ramsung ralkap buainak ruangih ralkap hizat an thi cu pawi a tithu a sim.
 
Fort Hood hi US ralkap pawl um khawmnak hmun pibik a siih ramdangih kuatsuak dingmi ralkap pawl cu himi hmunih si kuatsuak an siih, ramdang ihsi ra tlunglut lam pawlkhal himi hmunpi ah an um khawmnak bik a si, tui ttum ih buainak suahdankhalah  Afghanistan ih ralkap kuatding mipawl meithel kenglo um khawm pawlcu hi ralkap sual pahin a kap ciamco tiah an sim. tu ahhin himi hmun ah US ralkap 40,000 lenglo an um khawmnak hmun a si.
 
Thailand Leh Cambodia 
 
Thailand Deputy Prime Minister, Suthep Thaugsuban cun  Cambodia thawi an ramri cu Cambodia ram Cozah umdan in a zirlo a si ah cun kharpit a si ding tiah mizan sunah a sim. Cambodia ram Cozah umdan leh thilti dan cu Thailand in a zoh fiang ringring dingih Cambodia Cozah thilti dan a diklo a si ah cun ram 2 karlak boruak cu a sezet ding a si a ti.
 
Cambodia Cozah in tui kandung naite ih Thailand Prime MInister, hlun Thaksin  Shinwatra an ram hnattuan tu  Adviser ih an ret ruangah   Thailand leh Cambodia ram pahnih karlak hi a se zetih, an ram palai khal an ko tlaung vevezo.
 
Arunachal Pradesh Ah Dalai Lama A Tlawng Ding.
 
Tibet ram Buddhis biaknak sakhua hruaitu Dolai Lama cun thaisun ah India ram Arunachal Pradesh a tlawngdingih himi ruangah  ramdang ihsi  Arunachal Pradesh tlawng dingih diltu Thuthangca latu Media pawlcu India Cozah in an dilnak a hnawl sak thluh.
 
External Affairs Ministry thupuangtu in a simnak ah  Arunachal Pradesh ih Dalai Lama a tlawnnak ih rakzuk tumtu ramdang mi Media minung 4 pawlih dilnak khal India Cozah in a dawnsal tiah a sim. Dalai Lama in Arunachal Pradesh a tlawn dinghi China cun nasa zetin a sawiselih, Asinan Dalai Lama cun a tlawntum nak cu ttulh a tum cuanglo ih  Arunachal Pradesh, a caam sungah  Tawang Monastery khal a pal dingih Siizung thar an sak mikhal an ong terding.
 
British In Afghanistan Ah Ralkap Kuat Bet Tum
 
 
British rorel nak Inn sang House Of Lord, to khawm cun  kandung tlawngkai nihnih ih Afghanistan Cozah ralkap pakhat in  Helmand Province ih British ralkap 5 a kahthat thuhla an relih, Prime Minister, Gordon Brown cun Afghanistan ihsi British ralkap an lakkir sallo ding thu a sim.
 
Prime Minister, Gordon Brown cun  British ram ih buainak tuahtu leh siatsuah tumtu misual pawlcu Afghanistan leh Pakistan ihsi suakmi an si ruangah an ram kilhim nakih hna an ttuan micu dung sipsan a thianglo ih, an ram Cozah Opposition pawlih nawrnak ruangih an ram kilhim nakih hna an ttuanmi titawp a tumlo thu leh, tu ah hin Afghanistan ah  British Ralkap 80,000 an umih, hnakum ah cun 1,30,000 kimding ih kuatbet an tumthu a sim.
 
China President, In Dik Lo A Ti
 
China Vanzam ralkap kum 60 an kim lawm nak ih teldingih an sawmmi ram 30 palai pawlih hmai ah China President, Hu Jin Tao cun  ram dangdang pawlin China cu ralthuam hriam man thawi hrosuang ih mi hrodai tum vekih an puh nakcu thil diklo a si tiah a sim.
 
China cun a ralthuam neihmi pawlcu a mai ramsung kilhim nak tilo ramdang hnen ih hman a tumlo thu leh  Ralthuam neih tthat naklam ih tlanzuam awknak ah China cu tel a tumlo thu a sim. China hin tui naite ah khan a ralthuam neihmi pawlcu mipi vangtlang hmuh theih dingin an rak pholang zo ih cu ruangah ram hrekkhat in China cu a ralthuam pholang ih mi hrodai tum ah an rak puhzo.
(Visited 61 times, 1 visits today)

Comments

comments

Comments

%d bloggers like this: