US Ralkap In Missile In Kap

US Ralkap In Missile In Kap

Mizanah Pakistan ram thlanglam North Waziristan ih Taliban pawlih umnak hmuncu US Ralkap pawlin an raldo nak Vanzam Pilot umlo Drone ihsin Missile in an kap lala ih minung 5 an thi.
Mizansun khalah Taliban hotu, Maulana Ismail ih umnak Inn cu Missile 2 in an kap parh thluhih a si an himi Inn ah minung an umlo ih  mithi an umlo tiah an sim.
US ralkap pawlhin Mizan sun lawng hmanah  an raldonak Vanzam in Missile 8 an kapsuakih, Mizan zanlai fangkhalah Dargah Mandin khua cu Missile Voi 2 in an kapih minung zianghmuah an thi ti theihfiang nak a um hrihlo.
US Ralkap pawlin raldo nak Vanzam Pilot umlo ihsi Missile an kapsuak ringring cu Pakistan cozah leh leitlun ram hrekkhat pawlcun an sawisel nasa ih, Asi nan US lam cun an raldo nak Vanzam leh an Missile cu Pakistan  ram thlanglam North Waziristan ih an ral Taliban pawl kahnak lawngih an hman thu leh hmundangih an hman dahlo thu an simve.
A sawisel tu pawlcun Pilot umlo Vanzam ihsi Missile an kahsuak mi ruangah Civil mi tamtuk an thi ih US cu mi puarthau, mihngal, zohmanin zianghman inti ngamlo, kancakbik timi thinlungpu in a duh tawkin a nung tiah an sawisel.
Asinan US cun himi an puhnak thucu thuzik tluaklo leh zumtlaklo thu men a si tiah an tive ih, an raldo nak Vanzam Pilot umlo hmanding leh hman nawnlo ding thu ah US cun ziangthu hman a relsuak duh hrihlo.

Japan Ram Cozah Dinhmun

Kandungih Japan ram hrilawk nakih nehnak cotu Democratic Party cun an ram Cozah tuahnak dingah  Party dang pahnih New People Party leh Social Democratic Party cu ttuanpi dingin rem a tiih, Japan ramhi House pahnih nei a si ruangah, House pakhat ah nehzetin tlinghman sehla, Parliament House dangih thu neihnak cothei dingcun  DPJ hin Party dang ttuanpi a neih a ttulih,  Cu ruangah  Cozah nak tuahpi dingin Party dang 2 hi thuthlung a tuahpi nak a si. Hiti vekih Party dang ttuanpi ding hnget a neihzo ruangah  DPJ party hotu Yukio Hatayama cu hmaikar hrawngah Prime Minister ih laklut zum a si.

Turkey Ram Tilian

Turkey ram tilian in minung tampi a fenhlo mi sungah minung 7 ruangcu tuisun ah hmuhsuak an si. Hi tilian in an khawpi Istanbul pannak lamzinpi pahnih a tisiat ruangah Motor tamzet an tar tahak laiih. motor Driver ziangma wzatcu an motor tlunah kaiso ih runtu hngakin an um cuahco lai a si.
Hi tilian hi rinlopi ih thleng thut thi an si ruangah minung tampi a la ih, minung umnak Inn tampi leh lamzin pawimawh lilawn 2  khal a fenhlo a si. Hi tilian hi Turkey ramih a liamcia kum 80 hnulam ih vanduainak rapthlak an tawn a voi 1 nak a si. ruahpi nasa zetin a surih nazi 2 sungah  Centimetre 24 a surih nikhaw tahtu pawlin an sim nakah ruahhi a sur bet vivo men thei tiah an sim.

Aquino III In President Cuh A Tum

Tui kandung naite ih thi Phillipines ram President hlun Corazon Aquino in fapa Benigno “Noynoy” Aquino kum 49 micun  a nu leh a pai dungthlun in  Phillipines ram President cuh a tumthu a puangih, a nui hnattuanpi pawlkhalin President cuhdingih an sawmthu a sim. Noynoy hin a nu leh a pai duhdan vekih Phillipines ram cu mipi rorelnak a si vivo a duhthu a sim.
Noynoy hi Benigno “Ninoy” Aquino leh Corazon Aquino ih fapa neihsun a siih, A pa hi Phillipines ramih mipi rorelnak a um theinak dingih theihtawp raksuahtu a siih, Ralkap Cozah thuneihnak hmangih roreltu Ferdinand Marcos a rak dodal ruangah  US ah a tlanih US ihsin kum 1983 ah khan  Phillipines ramih a kirsal ah Airport ah kahthat a si, Cumi hnu ah a nupi Corazon Aquino cun a pasalih dungthlunin  ralkap Cozah rorel nakcu a run hlawnthla ih mipi Cozah a rundin suakih a mahcu President ah an hril.

India Home MInister US A Tlawng

India ram Union Home Minister, P Chidambaram cu ni 4 sung caam dingin US ah a caam laiih, a caam sungah hin US Cozah mi pawimawh pawlthawn misual dotlang ding dandingthu an rel tlangding.
Himi ih tlunah nikum Novenber ni 26 ih Pakistan ramsungih si misual pawlin Mumbai khawpi an rung siim ih mawhphur tu Pakistan ramsungih umlai misual pawl Pakistan Cozahn in a kaihih a hremduhlo thu leh Asia thlanglam rampawl thawi ram humhim awknak neihtlang danding pawlkhal an relding.
Union Home Minister, P Chidambaram hin Mizan ah Federal Bureau Of Invetigation (FBI) leh New York Police Department pawlleh United States Joint Terrorism Task Force pawlcu misual do tlang dandingthu a relpi zo ih, thaisun ah Secretary Of States Hilllary Clinton khal a kawm ding.

Afghanistan Ram Hrilawk Nak Result

Kandungthla ni 20 ih Afghanistan ram President hrilnak result 92% cu siar thluhzo a siih, tui result siarzo mi ih a langdan ah, President ttuanlaitu Hamid Karzai cun Vote 54,1% a hmuzo ih, a mah cuhtu Abdulllah Abdullah cun Vote 28% hrawng a hmuban a si. Hi an hrilawk nakah hin thil fello tampi a um tiah an simih cu ruangah UN cun an hrilawknak umdan zohfiang saldingin  Afghanistan Election Commission cu thu a pe zo.
Himi ruangah hi an hrilawknak resulah  President ttuanlaitu Hamid Karzai cu Vote 50% lenglo in cakzo hmansahla President ih an puan mai a zum umlo, Election Commission in thil umdan fiangten a zohsal dingih cumi hnu ah a ttuldan ih zirin hrilawknak an tuahsal tla  a si thei.
Himi laiah  Afghanistan ih NATO ralkap pawlih hmanding Zinen phurtu Motor tumpi 8 cu  Afghanistan leh Pakistan ramri Pkaistan ramsungih  Quetta khua ah  Taliban tapung pawlin tuizingah an kap ciamco ih, a alh puak thluh.
Asi nan mithi leh hriamhma tuarcu an umlo. kandung zarhte ni khalah  NATO ralkap pawlih hman ding Zinen  phurtu Motor tumpi 20  Taliban pawlin meisa in an nawk kangzo.

Iran Nuclear Thu

Fars News Agency in a tarlang nakah  Inran Foreign Minister, Manouchehr Mottaki cun an ram Nuclear  Programmme fehpi dancu leitlun theihpi dingih puan a remti tiah a tarlang, Iran cun an ram Nuclear Programme fehpi dancu leitlun ram 6  P5+1 an timi UN Security Council ram 5 Britain, China, France, Russia, US, leh Germany ram ai awhtu pawlih hmaiah a pharhding tiah Fars News Agency cun a tarlang. himi ih tlunah an ram Nuclear Programme thuhla ih biakawknak neih khal a duh tiah a tarlang.
Tu ah hin UN hnuaiih  ram dangdang Nuclear ralthuam zohfel tu International Atomic Energe Agency (IAEA) cu Vienna ah an tawngkhawmaw laiih, an hotu Mohammed Ei Baradei cun  Iran cu IAEA hnenah Ong aw deuh in hmailam tikcucaan zohphah ih thilti a duhsak thu a sim.
Iran hi Nuclear ralthuam a tuahtum ti a si ruangah UN in lamzin phunphun ah hremnak a pek laimi a siih, Iran President,  Ahmedijejad cun UN thilti dancu thil diklo a siih, Iran cun an ram hrangah Nuclear Power tuah theinak zalen nak a neiih, Nuclear ralthuam tuahcu a tumlo a si a ti.
(Visited 52 times, 1 visits today)

Comments

comments

Comments

%d bloggers like this: