US Ralkap Ca Thuthup Leaked Out

US Ralkap Ca Thuthup Leaked Out

US Ralkap pawlin Afghanistan ramih Taliban pawl an donak thuhla ca thuthup pawimawh Afghanistan War Diary an timi Ca pawimawh 90.000 cu a Leaked Out ih, Hica thuthup pawimawh hi Wikileaks Website ah tarlang a si.

US National Security Adviser, General, James Jones cun  hica pawimawh leaked out hi kum 2004 leh kum 2009 karlakih thilthleng pawimawh pawl hminsin nak a si tiah a simih, Curuangah himi ca leaked out hin America mipi leh an hna ttuanpi pawlih dinhmun cu  ttihnung zet dinhmunah a thlengter a si tiah a sim.

Hi US ralkap thuthup ca pawl mipi vangtlang theih ih an tarlang mi sungah  US ralkap in Afghanistan ramih Taliban pawl an do nakih Civil mi thizat an tarlang duh dahlo mi pawlleh, US ralkap pawlin Taliban pawl do har an tizia pawlleh  Pakistan in Taliban pawl an bawm ti an theihthup thupawl khal tarlang a si. Hi cahi  Website ih an tarlang hlanah New York Times,leh  The Guardian leh German ramih Der Spiegel Thuthangca pawlih hnenkhalah kuat hmaisak a si.

US ih Pakistan ram palai  Ambassador, Husain Haqqani cun  Himi ca sungih US ralkap pawlin Taliban pawl bawmtu ih Pakistan Cozah an puh nakcu thudiklo a siih, a liamcia kum 2 ihsin Taliban pawlih ruangah Pakistan Cozah cun thil tamzet an sun phah zo ih, Pakistan cun a ram sungih Tapung pawl a do rero nak zoh tikah  Tapung pawl a bawmlo zia a langfiang a si a ti, Himi thu ruangah Pakistan cun a ram sungih Tapung pawl a donak ding lamzin a ruahman cia micu a ti danglam cuanglo ding tiah a simbet.

The Guardian leh New York Thuthangca pawlcun himi ca an hnenih petu thawi an biak pop awklo thu an simih, Guardian Thuthangca hotu, David Leigh cun  an thildawn mi sungah  US ralkap pawlin Afghanistan ih Civil mi an thahnak zuk tamzet khal a telih, mithi pawlhi Raldo nak Vanzam ih an kahmi lawng silo in US ralkap pawlin hmun leh hmunih  mihuat thu rello Civil mi an kahthat mi pawlih zuk khal a tel tiah a sim. Hi Afghanistan War Diary timi ca pawimawh Leaked out hi US ramih an ca pawimawh leaked out mi sungih pawimawh bik a tlingti ih an ruah mi a si.

Venezuela Leh Colombia Sihcih Awk Nak Sat Cat

Venezuela President, Hugo Chavez cun an ram inn hnen Colombia thawi an sihcih awknak leh pehtlaih awknak pawl a sahcat thluh thu a puangih, Venezuela ram sungih Colombia ram minung Cozah hnattuan pawlkhal tui zarh colhni hlanih Venezuela ram suhsan thluh dingin thu a pe.

Venezuela President, in hiti vekih thu tluknak a tuah nak sanhi Colombia Cozah in an ram siatsuah tumtu Tapung pawl Venezuela ram sungah an umih, Venezuela Cozah in an rak humhim tiih, a puh ruangah a si.

Tu ah hin Venezuela cun Colombia thawi an ramri ah ralkap a kuat ciamco ih, an President, cun an rakkap pawlcu ralring zetih um dingin a cah. Venezuela Foreign Minister, Nicolas Maduro khalin  Colombia thawi an sumdawn tonawk nak pawl titawp thluh a si thu leh an ram sungih Colombia Vanzam zuanlut an sian nawnlo thukhal a puang.

US ram khawpi Washington ih Organisation of America States, (OAS) aiawh tupawl tonkhawm awknak hmunah Colombia ram aiawh tu pawlcun  anram Tapung Marxist Farc leh ELN pawlcu Venezuela ram sungah an um timi theihfiang nak Video zuk tamzet an phosuak ih, Hiti vekih Tapung rak humhim tu ih Colombia in Venezuela a puh ruangah  Venezuela President, cu a thin a hengzetih,  OAS hmaiih colombia ram aiawh tu pawlih Video zuk pholang mi pawlcu a lem a si ih, Venezuela cun Tapung misual lut lo dingin an ram ramri cu thazet in a kilhim sawn a si tiah a sim.

I C J, in Kosovo Ram Pitling Ah  Pawm

The Hague khawpi ih Kosovo ram dinhmun ngaihtuah nakah International Court of Justice President, Hisashi Owada cun  kum 2008 ihsi lahran aw mahte rorel theinak nei ramih puangaw Kosovo cu  an rorel nakin International Law a kalhki lo  ruangah mahte rorel theinak nei ram siding in a puang.

I C J in hiti vekih  ram pakhat ih  a puan ruangah Kosovo ram mipi pawlcu an khawpi Pristina an minung tamzet pungkhawm in an ram Thantar, US, Thantar leh UK Thantar an zarih  Kosovo in mahte rorel theinak ram a neihcu US ih hnattuan nak rah a si tiah lungawi in an au ciamco.

Kosovo Foreign MInister, Skender Huseni cun  an ram cuhpi tu Serbia ram hruaitu pawlcu Kosovo thawi an ram pahnih karlak ih pehtlaih awknak tha leh zumawk tawnnak reltlang dingih biakawk nak neih an duh a zumthu a sim.

Himi laiah Serbia President, Boris Tadic cun  an ram ihsi lahran aw Kosovo cu Sewrbia ram sungih peng pakhat a si ringring thu leh  Kosovo ih mahte rorel theinak nei ramih a puanawk ve mai cu Serbia cun ziangtik hmanah a pawmlo dingthu a simve.

Comments

comments

Comments

%d bloggers like this: